16
Paul ae Silas demi Timothy kundo daedo maunsitera.
1 Ango edo Paul awa nasi Debi gundo aundo nasi Laisitara esisina. Edo ambodani da (1) dao Timothy, yai ainda isima edo esisina. Edo ainda ai awa Judah eutu ami Yesu gebé esisina. Ata ainda mamo awa Guriki embo. 2 Edo nanonameji* nanonameji da moka einda awa Yesu da gebé ari embo eutu. Laisitara edo Ikonium nasida ami ainda daoda ge davegave tedo esitera. 3 Ango edo Paul embo awa kundo daedo pepeta ain jipapa esisina. Aindabé Judah embobo yai nenei ainda isima esitera, awamane berari garibé embo ainda mamo awa Guriki, awatedo, Paul mi embo ainda tamo jiugesisina. 4 Ango edo awamane pepeta edo nasi babain ainda torido idegedo eite awamanemi aodari ro awa Yesu da piari aimbari embobo ae orobeda kopuru mamai demi Jerusalem ainda katedo Judah embomai ae awa kera orote teoro gido esitera. 5 Awatedo, God mi Yesu gebé ari embomainda doregari yai tegerida kondade euri awamaneda tumonda ari Badari da yai goroba bureite, edo deguta da (1) dowae awamaneda ajijigari bajido esisina.
Paul mi garago giragoda Masedonia embo da (1) gosisina.
6 Ango edo Paul ae ainda buro ari otatawo de pepeta edo yai Perijia edo yai Galesia torido idegedo aimbero, Asisi Kotopu mi yai Asia ainda embomainde ge karigeorekae engiregesisina. 7 Edo awamane yai Maisia atutumbedo yai Baitenia torain tedo esitera. Ata Asisi Kotopu mi awamane tororekae dowae esisina. 8 Awatedo, awamane yai Maisia daginegedo dodo aundo Toroas nasida wowositera. 9 Edo muyaende Paul mi garago giragoda Masedonia embo da (1) petedo embo ainda yai atega eiri gosisina, “Imo temundo gumbuyo Masedonia edo nakare kondade ate!” sisina. 10 Ainda amboda Paul mi garago girago giri, nakare† nakare. Ge jirari eiwa gisida, ge Luke mi gagureite ainda doda, imo akuta embomai neneinde daedo piae doturisina. Ata Luke tuturoda gano einda imo akuta ge jirari doda embomainde daedo dada edo ge nakare jigamo esisina. Awatedo, ge jirari einda arapa eira awa, imo Paul ae Silas de Timothy de daedo Toroas nasida ainda dada esisina. ge katedo God mi nakare dao sisina, ainda bino dave awamanede karigorote. Awatedo, nakare boraebé siya edo Masedonia mamain esitera.
Badari mi Lydia da do pirigesisina.
11 Awatedo, Toroas ainda edo nakare ewada made gaigedo idegedo dambu darari Samoteras gategada maunsitera. Edo deguta neinde Niapolisi nasida gundo denembesitera. 12 Edo Niapolisi dodo nakare butuda pepeta edo Pilipai da guputera. Awa nasi bajina dariga yai Masedonia ainda da (1). Edo nasi bajina awa Rome da sima ari daveda isima edo esisina. Edo nakare deguta nenei ainda isima esitera.
13 Ango edo Oena Apari Degutade nakare nasi bajina idegedo un bengida maundo yai nonda embomaimi matawa gundo benunu teora awa taputera. Edo nakare anumbedo eutumai matu gundo dada etero awamanede ge sitera. 14 Edo eutu da (1)mi natokare ge ingeite isima esisina, ainda dao awa Lydia. Edo eutu awa gongo ove tokona de‡ gongo ove tokona de awa mina bajinabé piedo bari gongo. Ove tokona awa dangiri ae ororo deda baige ari. oriedo esisina. Eutu awa Taiyataira nasi bajina eutu edo God tumondebain edo esisina. Edo Badari mi ainda do pirigesiri Paul da ge ingido gebé esisina. 15 Ango edo eutu awa ae embomai berari ainde daedo isima edo esitera, awamane bapataito esitera. Edo eutu ami namondekare tedogosisina, “Inemanemi na awa Badari gebé ari eutu gido ewa gido, gumbuwo edo namonde daedo mando natoda kaen itane!” Edo eutu ami nakare atega edo dowae esiri ainda yai maunsitera.
Paul ae Silas de bundari oroda pipisitera.
16 Edo iji angode, nakare benunu tari yaida auntero, buro gagara da (1)mi nakare tapusina. Edo gagara awa asisi beyaemi gisijijieiuri ima edo esisina, edo iji ambo awa tedo esisina. Edo gagara ami emboda iji ambo awa teuri ainda badararimi ganu jiwaebé budo esitera. 17 Gagara emi nakare ae Paul de ambo ambo eite aorogatedo tedo esisina, “Embomai eiwa God Ikanebé ikane ainda buro ari embobo! Amimi kaenamonde tonembarida begata awa ganate karigetera.” 18 Ango edo gagara awa ge engo deguta jiwae teuri gido esitera. Ata Paul do buriyabé esiri wareregedo asisi ainde sisina, “Yesu Keriso da daoda imonde ge okain tena. Gagara eiwa dodo idege!” Edo dá iji ainde asisi awa dodo idegesisina.
19 Ata iji nonde, buro gagarada badararimi awamaneda ganu bari begata itae esiri gido gido, Paul ae Silas de kundo dumundo origarori ari yaida torido nasi bajinada gisijijiegarida yaida esitera. 20 Edo awamane kundo gundo sitera, “Embomai eiwa Judah embomai, edo awamanemi nasi bajina kaenato embomai awa ero do buriya bajinabé eira. 21 Kaena awa Rome embomai. Awatedo, kaenanemi kaenato Rome da ewowo gawowoda atopatari ae aodari de ambo ambo edo era. Edo embo eiwamanemi kaena Judah ewowo gawowoda atopatari ambo ambo orote jipapa era. Edo ango ara, kaenato aodari daro erigaina.”
22 Ango edo embo jisi da gundo dada edo Paul ae Silas de daedo bekumba esitera. Edo gisijijiegarimi tetero itoro embobomi Paul ae Silas deda ombari jiari jiero kokumbesiri awamane ikutami vedorote sitera. 23 Edo amboda awamane vedetero kambo jiwae etero bundari oroda pietero torero bundari oro sima ari embode ge okain tedo sima dave arate sitera. 24 Ango edo bundari oro sima ari embo ge eiwa budo embo ami awamane awa bundari oroda dobéda piedo awamaneda tai awa ikuta dugada sinegesiri torero bunjisina.
Pilipai bundari oro sima ari embomi ainda do Badari da yai wareregesisina.
25 Ata muyae toropuda Paul ae Silas de God da yai benunu site ya site itero bundari embobo nenei awamane ingero jijirisina. 26 Edo boraebé jijira duga ami bundari oroda dasivi awa jipisina. Edo iji dá ainde bundari oro manguro berari jipesiri pirigesiri embo berarida asi okain aurimi ari awa udedegedo duduritera. 27 Ainda amboda, bundari oro sima ari embo jitao dodo erido oro manguro pirigari gido, bundari embomai awa erido idegari kotembesite, ainda kasiwo budo akuta gaiedo betain esisina. 28 Ata Paul mi aoro ikanade gatedo sisina “Imo akuta kambo piote! Nakare berari itera evire!”
29 Edo bundari oro sima ari embo parara atega edo tumundo gundo yai ainda toriri Paul ae Silas deda taida ipatai jipeiri baongo dadari esisina. 30 Edo embo ami Paul ae Silas de kundo idegedo awamanede tedogosisina, “Dave embobo, na buro nongo edo tonembari bani?”
31 Edo awamanemi mina sitera, “Badari Yesu Keriso da yai gebé eyo, edo imo tonembari bata. Imo ae embomai berari imo daedo isima edo era ainde, imomane berari awa begata dá awara ami tonembari bawa.” 32 Ango edo awamane Badari da ge embo ainda yai sitera edo embo berari ainda mandoda itero, awamanede daedo. 33 Edo muyae dá ainde bundari oro sima ari embo Paul ae Silas de budo aundo, awamaneda kambo awa un mi teisina. Edo ainda amboda, embo awa ae ainda orobe berari de bapataito esitera. 34 Ango edo bundari oro sima ari embo Paul ae Silas de kundo gundo ainda mandoda torido indari awamaneda yai piesiri injitera. Edo embo awa ae embomai berari imonde daedo isima edo esitera, awamane God da yai gebé esitera. Awatedo, awamane dubo yawa bajinabé esitera.
35 Edo sipo atesiri gisijijiegarimi itoro embobo pietero bundari oro sima ari emboda yai maunsitera, ge okain engo embo ainde torote sitera, “Embobo awawa udegeyo mambore!” ango sitera. 36 Edo bundari oro sima ari embomi ge eiwa Paul de sisina, “Gisijijiegarimi imo ae Silas de awa udegano idegawate tetera. Awatedo, imomane boroko idegedo aimbuwo bégade.”
37 Ata Paul mi itoro embobode sisina, “Awamanemi nakare, Rome embobo,§ Rome embobo. Iji ounde, edo imo ‘Rome embo’ da dao bain jipapa esiteta, begata tamonde (3) akuta imo inono ambo ambo edo bata: 1) Edo gido imo buro davebé dave Caesar awa embo ata, ami dao ‘Rome embo’ ito yaida piae esira; 2) Edo ganu ito awa jiwaebé, inemi Rome da gisijijiegarida yaida maundo ‘Rome embo’ da dao oriae eteta; 3) Edo ito aimamo awa Rome embomai bé, imo inono‘Rome embo’ da dao daedo bata. katae dodo emboda jisida vededo bundari oroda pietera. Ango edo boroko onjigarida nakare dowain tera. Ata ango ainyae! Awamanemi akuta gundo nakare kundo idegore.”
38 Edo itoro embobomi maundo gisijijiegaride ge eiwa pietero, awamanemi Paul ae Silas de awa Rome embobo awa gido adu esitera.* Paul ae Silas de awa Rome embobo awa gido adu esitera. Iji ainde Paul ae Silas de isima edo esitera, Caesar mi yai jiwaebé sima edo esisina. Daedo, embomai avekave Caesar da sima ari doda isima edo esitera, Rome da aodari neindekaindemi awamane dave edo dedegedo esitera. Rome da aodari da (1) awa, edo embo neimi imo bekumba aina, embo awa imo katari yai mambae gisida mana vedaina. Ata gisibé imo ae embo neinde katari yaida mambawa. Ainda amboda, katari embomi ge katedo itae edo imo udegaina ko vedaina. Awarata, bekumba embo aimi imo katae dodo imo boraebé vedaina, Rome da itoro embomi rirowa bajinabé ainda yai piara. 39 Edo gisijijiegarimi gundo awamanede engega esitera. Edo awamanemi Paul ae Silas de bundari oroda kundo idegedo tedogido esitera, “Nasi bajina awa dodo aimbavi?” 40 Ango edo Paul ae Silas de bundari oroda awa dodo idegedo, Lydia da mandoda maundo nanonameji yai ainda etega edo, kondade ari ge awamanede tedo yai awa dodo maunsitera.
*16:2 nanonameji da moka einda awa Yesu da gebé ari embo eutu.
†16:10 nakare. Ge jirari eiwa gisida, ge Luke mi gagureite ainda doda, imo akuta embomai neneinde daedo piae doturisina. Ata Luke tuturoda gano einda imo akuta ge jirari doda embomainde daedo dada edo ge nakare jigamo esisina. Awatedo, ge jirari einda arapa eira awa, imo Paul ae Silas de Timothy de daedo Toroas nasida ainda dada esisina.
‡16:14 gongo ove tokona de awa mina bajinabé piedo bari gongo. Ove tokona awa dangiri ae ororo deda baige ari.
§16:37 Rome embobo. Iji ounde, edo imo ‘Rome embo’ da dao bain jipapa esiteta, begata tamonde (3) akuta imo inono ambo ambo edo bata: 1) Edo gido imo buro davebé dave Caesar awa embo ata, ami dao ‘Rome embo’ ito yaida piae esira; 2) Edo ganu ito awa jiwaebé, inemi Rome da gisijijiegarida yaida maundo ‘Rome embo’ da dao oriae eteta; 3) Edo ito aimamo awa Rome embomai bé, imo inono‘Rome embo’ da dao daedo bata.
*16:38 Paul ae Silas de awa Rome embobo awa gido adu esitera. Iji ainde Paul ae Silas de isima edo esitera, Caesar mi yai jiwaebé sima edo esisina. Daedo, embomai avekave Caesar da sima ari doda isima edo esitera, Rome da aodari neindekaindemi awamane dave edo dedegedo esitera. Rome da aodari da (1) awa, edo embo neimi imo bekumba aina, embo awa imo katari yai mambae gisida mana vedaina. Ata gisibé imo ae embo neinde katari yaida mambawa. Ainda amboda, katari embomi ge katedo itae edo imo udegaina ko vedaina. Awarata, bekumba embo aimi imo katae dodo imo boraebé vedaina, Rome da itoro embomi rirowa bajinabé ainda yai piara.