64
Yenmiaru nba saa gɔɔr bonbiir
1 Yennu, gbatir n miaru, n be daamii niŋe.
Gɔɔt n datai ki bi daa nyint n manfoor.
2 Guutin, ki min nyi nɔɔnbiit damm lora ni
nan toonbiit damm tintaanu ni.
3 Bi ŋat bi jerima, ki li di nan jukbanjai nae,
ki bia nyint bi mɔbonbiit, ki li tɔ nan tɔrbanpeenii na,
4 ki kakii ki mɔɔntir bi faak maan nba tee fei
ki dia sanbiiuk ki biir niŋamm,
5 ki korin leeb nan lorbiit,
ki bikii baa saa pii bi barit siaminba,
ŋaan yaa, “Ŋmee saa lati?”
6 ki lorin lorbiit, ki yaa, “Ti lor ki soor linba ŋane na.”
Barmɔnii, nisaarik par nan u dudukit tee linba sumiie.
7 Yennu saa yekib u peenii, ki li saa turib danii yiama.
8 Yennu saa biirib, kimaan bi mɔbonbiit na paak,
ki binba kur saa lab saa pak bi yura,
9 ki jaŋmaanii saa soor nisaarik kur,
ki bi saa mɔɔnt Yennu toona nba tee,
ki bia dukin waa tun toona nba.
10 Ki niŋamm kur sii kpamm
nan toonŋana nba ki Yennu tun.
Bi saa la gungurboor u nie,
ki binba kur para yeen saa dont u sann.