2
1 N tee nan tipuuk nba be Saronn tiŋ ni nae,
ki bia tee nan tipuuk nba be baauk ni na.
Jɔɔ lomm yaŋ
2 Tipuuk nba fan ki gar kunkonii biaŋinba na,
nnae ki n yɔɔk fan ki gar pooleeb.
Poo lomm yaŋ
3 Tilontii nba ŋan ki gar tilei biaŋinba na,
nnae ki n yɔɔk fan ki gar jaleeb.
N loon ki mii kaar u maasu, ki u lɔɔna na-ii man n mɔb ni.
4 U jiin ki baar nanin u jeet dindiboor,
ki chaan lomm fariŋ n yur paak.
5 A jii tilɔɔnkoona ki lin turin paŋ,
ki bia turin tilɔɔnmɔna ki lin turin paŋ.
A niɔŋ te ki n baŋa.
6 N yur kpaak n yɔɔk niigaŋe, ki u niidiitu barimin.
7 Jerusalem poob, satir mɔb nanin.
Ii sat mɔb, piarɔ nan kɔɔk nba tiin bonchiann na sann ni
nan i kan te lomm n baar, ŋaan ki li yoo daa ki baari.
Yaŋ nba pukin munlee
Poo lomm yaŋ
8 N gbat n yɔɔk kunkɔr.
U baat ki tiin jɔɔt ni, ki tiin kunkona paak, ki baat n boor.
9 N yɔɔk tee nan kɔɔk koo pajak nba tee biaŋinba nae,
ki see kpia joonn ki got gaan takoru ni, ki gorii diiuk na ni.
10 Ki n yɔɔk maŋ ji piak nanin.
Jɔɔ lomm yaŋ
N yɔɔk, ii saana.
N yɔɔk, baat ki tin tɔk saan.
11 Siɔk gara, saak nyik baanuwa;
12 tipuuk yite tiŋ na ni.
Yoo nba na tee yanii yooe, ki ti gbia lanjerii mɔnii kpaant ni.
13 Kinkana piin mɔnnuwa; ki wouŋ yent nan tipuuk nubiru.
N yɔɔk, ii saana. N yɔɔk, baat ki tin tɔk saan.
14 A tee nan ŋmandajuuk nba bɔrii tanfiat ni biaŋinba nae.
Ŋaant ki man la a ningorsin nba ŋan na,
ki bia te ki n gbat a kunkɔr nba man na.
15 Soot lunlona na ki turit, lunlona nba waar,
ki tee binba biir ti kpaant ni tilontii nba yinn puuk na.
Poo lomm yaŋ
16 Mine yen n yɔɔk, ki u mun yenin.
N yɔɔk kpaar u pei titubira na ni.
17 Ki li-i taŋi yentir ki bunbɔnn na n bot,
n yɔɔk, chiat ki jen n boor yian nan kɔɔk
koo pajak nba tuu tiin jɔgbaak paak biaŋinba na.