GBOUŊ ŊANNA
90
(Yanii 90 -- 106)
Ki jiin Yennu nan nisaarik po
1 N Yomdaanɔ, fine tun tee ti binbeboor.
2 Faa daa din ki nan kunkona nan durinya na,
ŋaan sɔɔ ki a poŋ din tee Yennu nba kaa gbennue,
ki bia sii tun tee Yennu yaayoo siiyoo.
3 A te ki nisaarik ŋmat waa bo be sian,
ki lebitirɔ ki u kpantir tant.
4 Bina tusir tee nan daar yennkɔɔ nae a boor,
li tee nan wonn nba tuu gar nae, koo ki jin nan nyiɔk na.
5 A jikitit ki yaatir nant nan nyunmɔnn nba tuu pubir nae.
Ti manfoor jin nan damiit nae,
ki tee nan sanyiɔk ni mɔmaatuk na.
6 Li lek tuu fiir sanyiɔk ni ki paane, ki yit puuk,
ŋaan daajoouk po lin koor ki suur.
7 A wutoor di ki boontirite, ki a parbiir na jek ti gbanu.
8 A bir ti yanbɔmm a tɔɔnn po,
ki bir ti bunbɔr yanbɔmm yeenin ni, siaminba ki a sii laatir.
9 A wutoor chɔɔ jiŋ ti manfoawa,
ki ti bina tuu bot yiama nan kukura na.
10 Ti manfoor tee bina piinlore-e,
koo li-i tee ki ti mɔk paŋ, tin baar bina piinniin,
ŋaan li kur na teent bakint nan ninbaatire;
ti manfoor tuu gbenne yian, ki ti ji ki be.
11 Ŋmee mi a wutoor paŋ nba tee?
Ŋmee mi a wutoor nba saa baar nan jaŋmaansooruk nba?
12 A wannit ti manfoor nba tenn ki jin biaŋinba,
ki tin la yan kii sub.
13 A wutoor saa do ki wei nlee?
Yennu, tinin timm a daaba ninbaauk.
14 Kɔɔntit a lomm nba kaa gbennu na ni sanyiɔk kur,
ki li saa te ki ti mɔk parpeenn kii yiin yanii nan ti manfoor terik.
15 Ŋaant ki tii mɔk parpeenn ki lin wei
nan faa bo turit parbiir ki li wei biaŋinba na.
16 Ŋaant timm a daaba na n la a toonjaana,
ki ti yaaboona n la a baakir yabint.
17 Ti Yomdaanɔ Yennu, ŋaant ki a piisim-ii be nant,
ki te ki tin nyann linba kur ki ti tuun ni.