79
Yenmiaru nba jiin Israel teeb po
1 Yennu, binba ki waa-a na lek a tiŋa.
Bi biir a kasii ŋasaakak nawa ki but Jerusalem.
2 Bi jii a niib gbanant ki tur juut nan muuk ni bonkobit,
a bin di.
3 Bi kpii a niib ki bi sɔn puub nan nyun na.
Sɔn puube nan nyun na Jerusalem kur po,
ki sɔɔ ki be ki saa pii niib na gbanant.
4 Digbana nba kpiat na sukiite ki bia laat, ki sarikitit.
5 Yennu, a wutoor saa do ti paak ki lin wei nlee?
A wutoor sii tun ki dite nan muu na-a?
6 Ŋmantir a wutoor ki paan digbana nba ki jiantira na paak,
niib nba ki meia na.
7 Bi kpii a niib, ki boont a tingbouŋa.
8 A daa daar ti tuba, ti yeejamm yanbɔmm paaki,
a tint ninbaauk mɔtana, ti ji ki mɔk dindanni.
9 Yennu, a sommit, ki tinnit.
A fatit ki nyik chab ti yanbɔmm, kimaan a mɔŋ sanŋann paak.
10 Bee teen ki boorganu na boit a, “I Yennu na be lee?”
Yennu, ŋaant ki tin la nan ti ninbina,
ki a dat binba kpii a niib na tuba.
11 Gbiintir dansarkɔɔra na fabinii,
ki jii a paŋ ki fat binba ki bi pak biirib ki loon bin kpib na.
12 Yennu, digbanlia nba sukii ki biira na,
jiint pab taar munlore bi biit paak.
13 Ki timm nba tee a niib, ki tee a pelook ni pei na
sii teena niipoouk nan yoo nba kaa paak,
ki bia sii dontira yoo kur.