1 मिनु येसु मेकेर रे ल‍शा, डोंगामी ङोइश्‍शा समुन्‍द्र शोक्‍शा, आ सहरमी जाक्‍माक्‍त। मत्ती ४:१३ 2 मिनु मार दुम्‍माक्‍त देंशा हना, आ गुइ खोइल मदुक्‍ब मुर का कली आ ब्राख्‍येमी कुरशा चाक्‍गमे बाक्‍त। मिनु येसुमी “मेको मुर कली चाक्‍बपुकीमी थमा सुइक्‍यीमी बाक्‍त” दे तुइश्‍शा, मेको गुइ खोइल मदुक्‍ब कली “आं तौ, इ पाप क्‍याम्‍साक्‍व। मिनु इ थुं बारपतो” दे मदा बाक्‍त। प्रस्‍थान ३४:६-७; भजन संग्रह १०३:३ 3 सास्‍त्री का निक्‍शीमी “इ पाप क्‍याम्‍साक्‍व” देंशो नेंशा “मेकोमी परमप्रभु यावे कली शुक्‍शी पाइबाक्‍माक्‍त” दे मिम्‍तमे बाक्‍त। मत्ती २६:६५ 4 मिनु येसुमी मेको आन मिम्‍शो तुइश्‍शा, मेको आन कली “मारदे मरिम्‍शो मिम्‍तीनी? यूहन्‍ना २:२५ 5 ‘इ पाप क्‍याम्‍साक्‍व’ देंचा देय ‘छुल बोक्‍शा एर ओंथ हिरशा कोंइदो’ देंचा तेको सज्‍लो बाक्‍बा? 6 रागीमी जरमेशोमी पाप क्‍याम्‍चा अधिकार तशो बाक्‍माक्‍त, दे गेपुकीमी यो तुइक्‍तीनील” देंशा, गुइ खोइल मदुक्‍ब कली “छुल बोक्‍शा, इ ब्राख्‍ये कुरशा खिं लेत्‍तो” दे मदा बाक्‍त। यूहन्‍ना १७:२ 7 मिनु मेको छुल बोक्‍शा, आ खिं लेम्‍माक्‍त। 8 मोदेंब दुम्‍शो तशा, मेकेर देल्‍शोपुकी हिंमा बाक्‍त। मिनु मुर आन कली मोदेंशो अधिकार गेब परमप्रभु कली ठेयब सुइश्‍शा मान पामे बाक्‍त।

9 मिनु येसु मेकेर रे लमेनु, मत्ती माइश्‍शो तिरो पोक्‍ब मुर का आ अडडाम बाक्‍शो ताप्‍तु। मिनु येसुमी “आं नोले खोइय्‍यी” दे मदानु, मेको छुल बोक्‍शा, येसु आ नोले खोइक्‍तु। मत्ती १०:३ 10 मिनु येसु नु आ शेंसीबपुकी खिंमी जना जन बाक्‍मानु, तिरो पोक्‍ब नु पापीपुकी शुश यो मेकोपुकी नु काथा जाम्‍तेक्‍म। 11 मिनु फरिसीपुकीमी मेको नेल्‍ल आन कली काथा बाक्‍शा जशो तशा, येसु आ शेंसीब आन कली “मारदे इन शेंबमी तिरो पोक्‍ब नु पापीपुकी नु काथा बाक्‍शा जाइबा?” देंतेक्‍म। 12 येसुमी मेको आन देंशो नेंशा “रोइ मपशो मुर सापाइक्‍ब ममाल्‍नीम। रोइ पशो मुर चहिं सापाइक्‍ब माल्‍नीम। इजीकीएल ३४:१६ 13 चढ़ेतीक ममाइ, तन्‍न शिशी पशो तचा दाक्‍नुङ, दे देंशो आ अर्थ मार बाक्‍म, दे शेंसीने। ठीक पाइब आन कली ब्रेत्‍थ जाक्‍शो मनङ। पापी आन कली ब्रेत्‍थ जाक्‍शो नङ” दे माइक्‍तीमी। होसे ६:६; मत्ती १२:७; १सामुएल १५:२२; मत्ती १८:११

14 मिनु यूहन्‍ना आ शेंसीबपुकी जाक्‍शा, येसु कली “मारदे गो नु फरिसीपुकी शुश बर्त बाक्‍नीकी, इन शेंसीबपुकी चहिं बर्त मबाक्‍नीमी?” दे हिल्‍लो पाम्‍तेक्‍म। लूका १८:१२ 15 मिनु येसुमी “जन्‍तीपुकी ग्‍युम्‍ले नु काथा बाक्‍मानु, हिशेक पा ङाक्‍नीमी ङा? काबु ग्‍युम्‍ले नु फ्राचा पुंइसीनीम। मिनु मेना बर्त बाक्‍नीम। यूहन्‍ना ३:२९ 16 सुइमी माइत वामी नक वा केप्‍शा मफेरनीम। फेरतेक्‍म हना, नक वा चुप्‍शा, माइत वा कली खाक्‍शा, ङोंइती ङा गाक्‍शो क्‍येङा ठेयब सेल्‍ब। रोमी ७:६ 17 सुइमी माइत कुशुल के थैलोमी नक अङगुर शांबु कुर मपाइनीम। कुर पाम्‍तेक्‍म हना, शांबु बोरशा, थैलो खाक्‍शा, क्‍युप्‍ब। नक शांबु कली नक थैलोमी कुर पचा माल्‍ब। मोपा कुर पशोनु, थैलो मगाक्‍बा, शांबु यो मक्‍युप्‍ब” दे शेंताक्‍मी।

18 मोदेंशो शेंना शेंन बाक्‍मेनु, मेकेर ङा ग्रुम्‍तीक खिं ङा ठेयब मुर का जाक्‍शा, पोक्‍च थेक्‍शा बाप्‍शा “आं तमी बेक्‍त। गे आं तमी तारी इन गुइ वोइक्‍तीनी हना, ब्रोंइब” दे सेउ पाप्‍तु। 19 मिनु येसु नु आ शेंसीबपुकी मेको आ खिं लाम्‍तेक्‍म। 20 मिनु मार दुम्‍त देंशा हना, लना लन बाक्‍मानु, १२ बर्स ङोंइती रे हुश याप्‍शा रोइ पशो मीश मुर कामी मेको आन नोले खोइश्‍शा, येसु आ फेक्‍शो वा थिवा बाक्‍त। 21 मारदे हना “आ फेक्‍शो वा थिचा ताता हना, सानुङ” दे थमा सुइश्‍शो बाक्‍माक्‍त। मत्ती १४:३६ 22 मिनु येसुमी फिर लेश्‍शा कोव़शा, मेको मीश मुर कली तशा “आं तमी, इ थुं बारपतो। इ थमा सुइश्‍शोमी साते” दे माइक्‍तु। मो देंमेनु, आ रोइ ब्रा सामाक्‍त।

23 मिनु ठेयब मुर आ खिं जाक्‍दीम्‍मानु, येसुमी शुश मुर देल्‍शा बाजा ताप्‍शा, रोंका पा ङाक्‍ना ङाक्‍न बाक्‍शो ताप्‍तु। 24 मिनु मेको आन कली “कतीने। एको आल बेक्‍शो ममाइ, इप्‍शो बाक्‍ब” दे माइक्‍तीमी। मेकोपुकीमी “मबाक्‍शो लोव़ पाइबाक्‍त” दे शुक्‍शी पाम्‍तेक्‍म। यूहन्‍ना ११:११,१४,२५ 25 मेको आन कली सोइश्‍शा, खिं ओव़त। मिनु आल आ गुइ ग्‍याइक्‍तानु, छुल बोक्‍त। 26 मिनु मेको लोव़ मेको रागी नेल्‍लेम ब्रम्‍माक्‍त।

27 मिनु येसु मेकेर रे लमेनु, मिक्‍च मताइब निक्‍शीमी “ए दाऊद पिप आ तौ, आंस कली शिशी पांइस्‍की” दे रेयके पा वाइ ब्रेश्‍शा, आ नोले खोइक्‍ताक्‍स। मत्ती २०:३० 28 मिनु खिं ओव़मेनु, मेको निक्‍शी यो ओव़ताक्‍स। मिनु येसुमी “गो इस कली सापाइक्‍ने चाप्‍नन्‍सी, दे थमा सुइक्‍नीसी?” देंमेनु “थमा सुइक्‍नस्‍कु, प्रभु” देंताक्‍स। प्रेरित १४:९ 29 मिनु येसुमी आस मिक्‍च थिशा “इस थमा सुइश्‍शो बुदी दुम्‍ल” देंत। मत्ती ८:१३ 30 मिनु मिक्‍च ताइब दुम्‍ताक्‍स। मिनु “एको लोव़ सुइ कली मशोव़ङीसे” दे सोइक्‍ताक्‍म्‍सी। मत्ती ८:४ 31 तन्‍न मेको निक्‍शीमी चहिं आस रागी ङा मुर नेल्‍ल आन कली येसु आ पशो तुइक्‍पदसे बाक्‍त।

32 मिनु येसु नु आ शेंसीबपुकी मेको खिं रे ग्रूशा लमानु, मार दुम्‍त देंशा हना, वोलमी सुम्‍शो लाटा का चाक्‍तेक्‍म। 33 मिनु येसुमी वोल कली ग्रुंइताक्‍व। मिनु मेको मुरुमी लोव़ पाप्‍तु। मिनु मेकेर बाक्‍बपुकीमी छक लाक्‍शा “इं इस्राएलमी ओदेंशो दुम्‍शो गेनायो मतशो नय” देंमुम्‍तेक्‍म। 34 फरिसीपुकीमी चहिं “वोल आन पिप आ नें थिशा, वोल आन कली ग्रुंइबाक्‍त” देंतेक्‍म। मत्ती १२:२४-३२

35 येसु गालील रागी ङा सहर गाउं नेल्‍ल हिरना हिरन ग्रुम्‍तीक खिंमी मुर आन कली स्‍वर्ग ङा राज्‍य ङा लोव़ शेंना शेंन, रोइमी गुरशो नु रोइ पशो मुर नेल्‍ल आन कली सापाइक्‍ना पाइक्‍न गाक्‍त। 36 शुश मुर आन कली तशा, शिशी पाइक्‍तीमी। मारदे हना गोठला मबाक्‍शो भेडापुकी खोदेंशो पा दशो बाक्‍मा बाक्‍त। १राजा २२:१७; इजीकीएल ३४:५; मर्कूस ६:३४ 37 मिनु आ शेंसीब आन कली “बाली नाली रुप्‍चा माल्‍शो शुश बाक्‍ब। रुप्‍ब मुर चहिं का निक्‍शी ला बाक्‍नीम। 38 मोपतीके ‘रुप्‍चा कली मुर योव़शा सोइक्‍तीने’ दे बाली नाली आ परमप्रभु कली पुनीने” दे माइक्‍तीमी। लूका १०:२