27
इसहाकमी आसीक गेशो
1 मिनु इसहाक खाल्पा दुम्शा, ब्राब्रा पा मिक्च मताइब दुम्माक्त। मिनु मेकोमी आ ङोंइती जरमेशो तौ एसाव कली “आं तौ” दे ब्रेत्ता बाक्त। मिनु एसावमी “मार देंनी?” दे लोव़ लेत्ता बाक्त। 2 मिनु इसहाकमी “नेनो, गो खाल्पा दुम्ती, आं बेक्ची ना मतुइक्नुङ। 3 इ लिब्रा लाइश्शा, सिखार ग्यारथ लावो। मिनु आं कली सिखार चाक्को। 4 मिनु नोले आं दाक्शो ब्रोव़ब्रोव़शो क्येशा, गेयी। गो आं बेक्चा क्येङा ङोंइती जशा ब्वशा, इ कली आसीक गेनुङ” देंमाक्त।
5 मिनु रेबेकामी इसहाक नु एसाव लोव़ पशो नेंशो बाक्माक्त। मिनु एसाव ब्वाकी सिखार ग्यारथ लमेनु, 6 रेबेकामी आ तौ याकूब कली “आं तौ नेनो, गो इ आफोमी एसाव कली लोव़ पशो नेंता। 7 मेकोमी एसाव कली ‘आं कली सिखार चाक्को। ब्रोव़शो क्येवो। गो जशा ब्वशा नोले परमप्रभु यावे आ ङोंइती आं बेक्चा क्येङा ङोंइती इ कली आसीक गेनुङ’ देंत। 8 मोपतीके आं तौ, आं देंशो टिवो। दोपा अरेना, मोपा पावो। 9 मुल गोठ लावो। क्यारश आन दाते रे रिम्शो पाठा निक्शी चाक्को। मिनु गो इ आफ कली आ दाक्शो ब्रोव़शो क्येनुङ। 10 मिनु गे चहिं लाइश्शा, इ आफ कली ख्रेत्तो। मेकोमी जशा ब्वशा, आ बेक्चा क्येङा ङोंइती इ कली आसीक गेवल” देंमाक्त। 11 मिनु याकूबम आ ममा कली “नेनीन, आं लोक्ब एसाव शुश चां पाइश्शो बाक्ब। गो मोदेंशो मनङ। उत्पत्ती २५:२५ 12 मिनु आं आफोम आं कली थिशा, तुइक्ब। मिनु गो जोल पाइब दुम्शा, आसीक मतथु, सराप राइनुङ” देंमाक्त। 13 मिनु आ ममामी “इ कली पशो सराप गो रङल, आं तौ। गे आं देंशो पावो। पाठा निक्शी ब्रथ लावो” देंमाक्त। 14 मिनु याकूबम गोठ लशा, पाठा निक्शी चाक्शा, आ ममा कली गेवा बाक्त। मिनु आ ममामी आ आफ कली आ दाक्शो ब्रोव़शो श्ये क्येवा बाक्त। 15 मिनु रेबेकामी आ खिंमी वोइश्शो आ ङोंइती जरमेशो तौ एसाव आ नक वा लाइश्शा, आ कान्छा याकूब कली फेक्पदा बाक्त। 16 मिनु मेको पाठा आस कुशुल याकूब आ गुइ तारी नु आ शुर तारी क्येप्ता बाक्त। 17 मिनु आ क्येशो ब्रोव़शो श्ये नु शोब्ले याकूब कली गेवा बाक्त।
18 मिनु याकूबम आ आफ बाक्तीके लशा, मेको कली “आं आफ” देंमाक्त। मिनु “गो बाक्ती। आं तौ, गे सु नवे” दे हिल्लो पवा बाक्त। 19 याकूबम आ आफ कली “गो इन ङोंइती जरमेशो तौ, एसाव, नङ। इन पुंइशो गो पाता। बोक्शा निश्शा, आं सिखार ब्वने। मिनु आं कली आसीक गेयीनी” देंमाक्त। लेवी १९:१४ 20 मिनु इसहाकमी “गिश रीब पा पवी, आं तौ?” दे हिल्लो पवा बाक्त। मिनु “परमप्रभु यावे, इन परमप्रभुमी सिखार आं नेक्था चाक्तु” देंमाक्त। 21 मिनु इसहाकम याकूब कली “आं नेक्था पिवो। इ कली थीनन, आं तौ। गे थमा पा, आं तौ एसाव नवे कों, मनवे” दे मदा बाक्त। 22 मिनु याकूब आ आफ आ नेक्था लमाक्त। इसहाकम मेको कली सुल्शा “आ सेंदा याकूब के बाक्त, आ गुइ चहिं एसाव के बाक्त” देंमाक्त। 23 मिनु मेको कली मतुइक्ता बाक्त। मारदे हना आ गुइ एसाव खोदेंशो पा चां पाइश्शो बाक्माक्त। मोपतीके आसीक गेवा बाक्त। 24 मिनु “गे थमा पा आं तौ एसाव नवे?” दे हिल्लो पवानु “गो नङ” देंमाक्त। 25 मिनु इसहाकम “लो, इ सेल्शो जचा ब्वचा थोव़क चाक्को। इ कली आसीक गेनन” देंमाक्त। मिनु याकूबमी चाक्गा बाक्त। मिनु आ आफोम ब्ववा बाक्त। मिनु याकूबमी अङगुर शांबु यो चाक्शा, गेवा बाक्त। मिनु मेको यो तूङा बाक्त। 26 मिनु आ आफ इसहाकम “आं नेक्था पिवो, आं कली पुक्पु पावो, आं तौ” देंमाक्त। 27 मिनु आ नेक्था लशा, पुक्पु पवा बाक्त। इसहाकमी आ वा आ रिना नाम्शा, आसीक गेवा बाक्त। मिनु मेकोमी “आं तौ आ रिना परमप्रभु यावेमी आसीक गेशो रू आ रिना खोदेंशो बाक्ब। 28 परमप्रभुमी इ कली सरीङ ङा सीत रे नु रिम्शो खप रे शुश चेरब नु अङगुर शांबु गेवल। 29 मुरपुकीम इ कली गेय पामेक्ल। रागी रागी ङा मुरपुकी इ ङोंइती खुम्की पा बाम्मल। इ लोक्ब आन दातेमी गे ठेयब दुमो। इ ममा आ तौपुकी इ ङोंइती बाम्मल। सु सुम इ कली सराप पामे, मेको आंमान रमल। सु सुम इ कली आसीक गेमे, मेको आसीक रमल” दे आसीक गेवा बाक्त। उत्पत्ती २३:२५; उत्पत्ती १२:३
30 मिनु इसहाकमी आसीक गेवा नोले, याकूब आ आफ आ बाक्तीक रे लमेनु, आ लोक्ब एसाव आ सिखार ग्यारतीक रे जाक्माक्त। 31 मेकोमी ब्रोव़शो श्ये क्येशा, आ आफ आ बाक्तीके जाक्शा, आ आफ कली “आं आफ बोक्कीन। आं सिखार ब्वशा, आं कली आसीक गेयीनी” देंमाक्त। 32 मिनु आ आफ, इसहाकमी मेको कली “गे सु नवे?” दे हिल्लो पवानु “गो इन ङोंइती जरमेशो तौ, एसाव नङ” देंमाक्त। 33 मिनु इसहाक शुश ख्रिंख्रि पा “सुमी आं कली सिखार चाक्गा? इ जाक्चा क्येङा ङोंइती गो जाता। मिनु आसीक गेता। आं आसीक लीब” देंमाक्त। 34 मिनु एसाव आ आफ आ लोव़ नेंशा, ठेयब सेंदा पा ङाक्माक्त। मिनु आ आफ कली “आं आफ, आं कली यो आसीक गेयीनी” देंमाक्त। हिब्रू १२:१७ 35 मिनु “इ लोक्ब जाक्शा, जोल पशा, इ आसीक रोइक्ताक्व” देंमाक्त। 36 मिनु एसावमी “आ नें याकूब दुम्शो, ठीक बाक्ब। मुल आं कली निक्शी खेयप ठगेती। आं ङोंइती जरमेशो तौ आ अधिकार रोइक्ताक्यी। मुल आं आसीक यो लाइक्तु। गे आं कली आसीक महेंदीनी?” दे ङाक्शा, देंमाक्त। उत्पत्ती २५:२६; उत्पत्ती २५:३३ 37 मिनु इसहाकम एसाव कली “नेनो, गो मेको कली इ प्रभु सेल्ता। आ लोक्ब नेल्ल आन कली मेको आ गेय पाइब सेल्ता। चेरब नु अङगुर शांबु शुश ग्रेल्मल, दे लोव़ पाता। मिनु इ कली मार गेनना ङा, आं तौ?” दे लोव़ पवा बाक्त। 38 मिनु एसावमी आ आफ कली “इन के आसीक का ला बाक्बा ङा, आं आफ? आं कली यो आसीक गेयीनी” दे शुश ङाक्माक्त।
39 मिनु आ आफ इसहाकम “नेनो, मलिलो खप नु सरीङ ङा सीत इ बाक्तीक रे ङोन बाक्ब। 40 इ तरवारम इ गेय पाइनेवे। इ लोक्ब कली गेय पाइनेवे। २राजा ८:२०,२२ गे बोल्यो दुम्ते हना, आ जुवा इ शुर रे ताइक्नेवे” दे एसाव कली यो आसीक गेवा बाक्त।
41 मिनु एसावमी आ आफोम याकूब कली गेशो आसीक लोव़ आ पर्बम, याकूब कली काइ मदाक्ता बाक्त। आ थुंमी “आं आफ बेक्शा रोंका पने थुम्शो नोले, आं लोक्ब याकूब कली साइक्नुङ” दे मिम्ता बाक्त। 42 मिनु रेबेकामी आ तौ आ लोव़ नेना बाक्त। मिनु मेकोमी याकूब कली ब्रेश्शा “नेनो, इ लोक्बमी इ कली साइक्चा कली मिम्ब। 43 मोपतीके आं तौ, गे आं देंशो पावो। बोक्को, आं लोक्ब लाबान आ बाक्तीके, हारान सहर प्रोक्को। उत्पत्ती २४:२९ 44 इ लोक्ब आ गाइश्शो मनांइसे सम्म मेक उइ बाक्को। 45 मिनु इ लोक्बमी इ पशो प्रेंशा, मचुरत हना, गो इ कली ब्रथ सोइक्नुङ। गो दोपा नाक्त कामी आं मुर निक्शी जाम्शो तने चाप्नुङ ङा?” दे आ तौ कली देंमाक्त।
46 मिनु रेबेकामी इसहाक कली “गो हित्ती आ तमी आस पर्बम बेक्चा ङा दुम्ती। याकूबमी यो एको खोदेंशो पा एको रागी ङा हित्ती आ तमी का चाक्तु हना, गो ब्रोंइचा मदाक्नुङ” दे मदा बाक्त। उत्पत्ती २६:३४-३५