1 गो दोपा ख्रीस्‍त आ पशो खोदेंशो पङा, मोपा गे यो आं पशो खोदेंशो पाइब दुमीन। 2 इन कली शेंशो लोव़ का यो मप्रेंथु, टिशा बाक्‍तीनी दे तुइक्‍ताक्‍ङ। मिनु गे आ शेंशो नेल्‍ल पाइतीनी। 3 वोंइश मुर नेल्‍ल आन पिया ख्रीस्‍त बाक्‍ब, मेको रुपीन। मीश मुर आन पिया मेको आन वोंइश बाक्‍ब। ख्रीस्‍त आ पिया परमप्रभु यावे बाक्‍ब दे रुपीन। उत्‍पत्ती ३:१६; एफिसी ५:२३; १कोरिन्‍थी ३:२३

4 खुम्‍सीशा, प्रार्थना पनीनु, परमप्रभु यावेमी तुइक्‍पाइश्‍शो लोव़ पनीनु, वोंइश मुरपुकीमी पियामी मारेइ मसुम्‍सीचा। सुम्‍साक्‍नी हना, ख्रीस्‍त कली आइक्‍च सेल्‍शो खोदेंशो दुम्‍ब। 5 मीश मुरपुकी चहिं आन पिया सुम्‍सीचा माल्‍नीम। मसुम्‍सीशो बाक्‍तेक्‍म हना, आन वोंइश आन कली आइक्‍च सेल्‍शो खोदेंशो दुम्‍ब। मसुम्‍सीथु बाक्‍ब आन कली चां प्रेक्‍शो खोदेंशो मिम्‍सीब। 6 पिया मसुम्‍नुङ देंबम चहिं आन चां प्रेक्‍समल। चां प्रेक्‍शो आन कली मुरपुकीम मरिम्‍शो मिम्‍‍नीम, दे गो नेल्‍लेमी तुइक्‍नय। मोपतीके मीश मुरपुकीमी आन पिया सुम्‍समल। 7 वोंइश मुरुम पिया सुम्‍चा मदुम्‍ब। मारदे हना मेको परमप्रभु यावे खोदेंशो पा सेल्‍सीशो नु आ दारस पाइश्‍शो बाक्‍नीम। मीश मुरपुकी चहिं आन वोंइश आन दारस पाइश्‍शो बाक्‍नीम। मोपतीके सुम्‍सीचा माल्‍नीम। 8 वोंइश मुर मीश मुर आ रां रे सेल्‍शो मबाक्‍ब। तन्‍न मीश मुर वोंइश मुर आ रां रे सेल्‍शो बाक्‍ब। उत्‍पत्ती २:२१:३ 9 वोंइश मुर मीश मुर कली वारच पचा कली सेल्‍शो ममाइ। तन्‍न मीश मुर आ वोंइश कली वारच प‍चा कली सेल्‍शो बाक्‍ब। उत्‍पत्ती २:१८ 10 मीश मुरुमी आन पिया सुम्‍सीचा माल्‍नीम। मारदे हना परमप्रभु यावे आ स्‍वर्ग ङा गेय पाइबपुकीमी कोव़शो बाक्‍नीम। 11 मोदेंशो दुम्‍त हना यो, प्रभुमी “वोंइश मुर कली मीश मुर माल्‍ब। मीश मुर कली वोंइश मुर माल्‍ब। मबाक्‍थु मदुम्‍ब दे सेल्‍शो बाक्‍त” देंत। 12 मीश मुर वोंइश मुर आ रां रे सेल्‍शो बाक्‍त हना यो, मुल वोंइश मुर मीश मुर रे थिशो बाक्‍नीम। मेको मोदेंशो परमप्रभु यावे आ पशो बाक्‍ब। 13 लो आंमा मिम्‍तीन मीश मुरपुकीमी आन पिया मसुम्‍थु परमप्रभु यावे कली प्रार्थना पचा दुम्‍बा? 14 वोंइश मुरपुकीमी लाइश्‍शो चां थुल्‍चा मुने दुम्‍ब, दे आंमा मतुइक्‍नीनी? 15 तन्‍न मीश मुरपुकीमी लाइश्‍शो चां थुल्‍शो चहिं आन मान ततीक बाक्‍ब। आन रां सुम्‍चा कली लाइश्‍शो चां गेशो बाक्‍ब। साइ ङोंइती रे ङा मोदेंशो लोव़ बाक्‍ब दे मतुइक्‍नीनी ङा? 16 गे नु बाक्‍ब आं शेंशो आ पर्बम जिचा पोक्‍ब आन कली मार देंनुङ देंशा हना, तेइ तेइ शेंथ गाक्‍कानु, मोदेंशो शेंनीकी। परमप्रभु यावे आ ग्रुम्‍तीक खिंमी यो मोदेंशो शेंनीकी।

17 मुल इन कली शेंशो लोव़म गे रिम्‍शो दुम्‍नीनी देंने मचाप्‍नुङ। मारदे हना ग्रुम्‍नीनु, इन कली रिम्‍शो ममाइ, मरिम्‍शो दुम्‍ब। 18 खुम्‍सीशा बाक्‍नीनु, थुं का दुम्‍शा मबाक्‍नीनी। एर ओंथ ब्राशा बाक्‍नीनी देंशो नेंता। एको लोव़ नेंशा, इच्‍का थमा सुइक्‍ता। १कोरिन्‍थी १:१२; १कोरिन्‍थी ३:३ 19 एर ओंथ ब्रा‍शा बाक्‍चा चहिं दुम्‍चा माल्‍ब। मारदे हना लोव़ रुप्‍ब नु मरुप्‍बपुकी दिल्‍नीम। मत्ती १८:७; १यूहन्‍ना २:१९ 20 गे खुम्‍सीशा बाक्‍नीनु। मार मार जाइनीनी, मेको प्रभु भोज ममाइ। 21 मारदे हना आंम आंमा चाक्‍शो जचा थोव़क जाइनीनी। मिनु मोपान का निक्‍शी जचा मतथु, शोव़लु बेक्‍शो बाक्‍नीनी, का निक्‍शी दुक्‍शा बाक्‍नीनी। यहूदा १२ 22 मार, मोदेंशो पा जचा तूचा कली इन खिं मबाक्‍बा ङा? मार, गे परमप्रभु यावे आ ग्रुम्‍तीक खिं कली आइक्‍च मिम्‍नीनी? जचा तूचा मताइब आन कली मुने तोक्‍नीनी? मिनु मुल इन कली मार देंनुङा? रिम्‍शो पाइतीनी देंनुङा ङा? गो मदेंनुङ। याकूब २:५-६

23 मारदे हना प्रभुमी आं कली मार शेंदा, मेको इन कली शेंताक्‍ङ। मेको ग्‍याइक्‍चा पुंइसीशो नाक्‍दो प्रभु येसुम शोब्‍ले शे‍शा, मत्ती २६:२६-२८; मर्कूस १४:२२-२४; लूका २२:१९-२० 24 “परमप्रभु गे रिम्‍शो पाइब बाक्‍नीनी” दे मेको शोब्‍ले जिक्‍शा “एको आ रां बाक्‍ब। एको इन कली बाक्‍ब। एको ओदेंशो आं कली मिम्‍चा कली पने” देंत। 25 मिनु मोपान जने थुम्‍शा, कचौरा शेशा “एको कचौरा आं हुश ङा नक कबल बाक्‍ब। गे गेना एको तूनीनी, मेना आं कली मिम्‍शा तूङीन” देंत। 26 गे गेना एको शोब्‍ले जाइनीनी नु कचौरा रे तूनीनी, मेना प्रभु लेश्‍शा मजाक्‍म सम्‍म मेको आ बेक्‍शो आ पर्बम शेंनीनी। मत्ती २६:२९

27 सु सुमी हेंथे पा प्रभु भोज ङा शोब्‍ले रे जाइबा नु कचौरा रे तूबा, मेकोमी पाप पा प्रभु आ रां नु आ हुश कली मरिम्‍शो सेल्‍ब। १कोरिन्‍थी १२:२१-२२ 28 तन्‍न गे नेल्‍लेमी आंम कली नाक्‍तीन। मिनु ला मेको शोब्‍ले जन नु कचौरा रे तूङीन। मत्ती २६:२२ 29 मारदे हना सु सुमी जशा तूशा, प्रभु आ रां बाक्‍ब, दे ममिम्‍नीमी, मेको सजाइ गेचा पुंइसीनीम। १कोरिन्‍थी १०:१६-१७ 30 मोपतीके इन दातेमी शुश मचाप्‍ब दुम्‍शो बाक्‍नीनी। शुश रोइ पशो बाक्‍नीनी। का निक्‍शी बेक्‍शा यो लाम्‍तेक्‍म। 31 तन्‍न गोपुकीमी आंम कली ठीक पा नाक्‍शा, प्रभु भोज जाइतय हना, सजाइ गेचा मपुंइसीनय। 32 तन्‍न प्रभुमी आंइ कली नाक्‍शा सजाइ गेब। मेको शेंचा कली बाक्‍ब। मोपा रागी ङा मुर नु काथा बाक्‍शा, जाम्‍शा मलाइनीकी। हितोपदेस ३:११-१२

33 मोपतीके आं लोक्‍बपुकी, गे जचा कली खुम्‍सीनीनु, नेल्‍ल जाक्‍ने थुम्‍मे नोले ला जने। 34 शोव़लु फाल्‍ने मचाप्‍बपुकीमी आन खिंम जशा जाक्‍‍मल। मो मपाइतीनी हना, प्रभु भोज मरिम्‍शो सेल्‍शा नु दोसी दुम्‍नीनी। अरु थोव़क आन पर्बम गो इन कली नोले जाक्‍ची ना शेंनुङ।