1 पलिस्‍तीपुकीम परमप्रभु आ कबल पशो सन्‍दोस रोइश्‍शा लाइश्‍शा, एबेन-एजेर रे अश्‍दोद सहरम चाक्‍ग‍मे बाक्‍त। यहोसु १५:४७ 2 मिनु मेकोपुकीम मेको कली लाइश्‍शा दागोन मूर्ति आ थानम चाक्‍दीत्‍मे बाक्‍त। मिनु दागोन आ नेक्‍था वोदमे बाक्‍त। न्‍यायाधीस १६:२३ 3 मिनु आ दीसा अश्‍दोद ङा मुरपुकी सुनी कना बोक्‍शा कोव़ङमेनु, दागोन आ मूर्ति गोल्‍शा, परमप्रभु यावे आ कबल पशो सन्‍दोस आ ङोंइती बाप्‍शो तामे बाक्‍त। मिनु मेकोपुकीम दागोन कली पोक्‍शा, आ बाक्‍तीकेम वोदमे बाक्‍त। 4 मिनु मेकोपुकी लेंशा आ दीसा सुनी कना बोक्‍शा कोव़ङमेनु, दागोन परमप्रभु यावे आ कबल पशो सन्‍दोस आ ङोंइती गोल्‍शो तामे बाक्‍त। मिनु मेको मूर्ति आ पिया नु गुइ निक्‍शी जिक्‍शा, लाप्‍चो ङा शीम बाक्‍शो तामे बाक्‍त। दागोन आ रां ला लीशो बाक्‍माक्‍त। 5 मोपतीके मेको नाक्‍त रे अश्‍दोद सहरमी दागोन कली चढ़ेबपुकी नु सु सु दागोन आ थानम ओव़बाक्‍मा, मेकोपुकीम दागोन आ थान ङा लाप्‍चो ङा शी मदिम्‍थु, ख्राक्‍शा ओव़बाक्‍मा बाक्‍त। सेफन्‍याह १:९

6 मिनु परमप्रभु यावेमी अश्‍दोद ङा मुर आन कली शुश श्‍येत गेमी बाक्‍त। मेकोमी मेको अश्‍दोद ङा नु मेको आ एर ओंथ ङा मुर आन कली गार मुतीक रोइमी श्‍येत गेमी बाक्‍त। मिनु मेको आन रागीम शुश यिच ग्रूमा बाक्‍त। मिनु मेको आन सहर नेल्‍लेम मारेइ मारेइ खतम दुम्‍तीक नु बेक्‍तीकेम सुमा बाक्‍त। भजन संग्रह ७८:६६ 7 मिनु अश्‍दोद ङा मुरपुकीम मोदेंशो दुम्‍शो तशा “इस्राएली आन परमप्रभु आ कबल पशो सन्‍दोस एक वोइक्‍चा मदुम्‍ब। मारदे हना मेको आ गाइश्‍शोमी इं कली नु इं देवता दागोन कली श्‍येत दुम्‍शो बाक्‍ब” देंमा बाक्‍त। 8 मोपतीके मेकोपुकीम पलिस्‍ती आन ठेयब मुर आन कली ब्रेश्‍शा खुप्‍शा “गो इस्राएली आन परमप्रभु आ कबल पशो सन्‍दोस मार पय?” दे हिल्‍लो पामे बाक्‍त। मिनु मेकोपुकीमी “परमप्रभु आ कबल पशो सन्‍दोस गाथ सहरम लतीन” देंमा बाक्‍त। मिनु मेकोपुकीम इस्राएली आन परमप्रभु आ सन्‍दोस गाथम चाक्गमे बाक्‍त। यहोसु ११:२२ 9 मिनु गाथम लदमे नोले परमप्रभु यावेम मेको सहर ङा मुर आन कली शुश हिंचा ङा श्‍येत गेमी बाक्‍त। मेकेर ङा ठेयब रे आइक्‍च मुर नेल्‍ल आन कली गार मुतीक रोइ पपाइक्‍मी बाक्‍त। 10 मिनु मेकोपुकीमी परमप्रभु आ कबल पशो सन्‍दोस एक्रोनम सोइक्‍तमे बाक्‍त। मिनु इस्राएली आन परमप्रभु आ कबल पशो सन्‍दोस एक्रोनमी चाक्‍दीत्‍मेनु, मेकेर ङा मुरपुकीम “मारदे मेकोपुकीम इं कली नु इं खिं ङा मुर आन कली साइक्‍चा कली इस्राएली आन परमप्रभु आ कबल पशो सन्‍दोस एक चाक्‍मे?” दे ग्रीशा रेयके पामे बाक्‍त। यहोसु १५:४५ 11 मोपतीके मेकोपुकीम पलिस्‍ती आन ठेयब मुर नेल्‍ल आन कली ग्रुम्‍शा लोव़ पचा कली ब्रेत्‍थ सोइक्‍तमे बाक्‍त। मिनु मेको आन कली “इस्राएली आन परमप्रभु आ कबल पशो सन्‍दोस आ बाक्‍तीकेम लेश्‍शा सोइक्‍तीन। मेको कली आ बाक्‍तीकेम चाक्‍दीतीन। मो मपाइतीनी हना, गो नेल्‍ल बेक्‍नय” देंमा बाक्‍त। सहर ङा मुर नेल्‍ल शुश हिंशो बाक्‍मा बाक्‍त। मारदे हना परमप्रभु शुश गाइश्‍शो बाक्‍माक्‍त। 12 मिनु मबेक्‍शो आन कली गार मुतीक रोइम श्‍येत जपाइश्‍शो बाक्‍माक्‍त। मेको सहर ङा मुर आन ङाक्‍शो सरीङ सम्‍म जाक्‍दीमाक्‍त।