Taitus
Pol Unda Ingiso Taitus Du Gefiria, Aná Evere.
Taitus umó Jiusi enemboda gitofoda eini re. Tago, Pol na Taitus unda ambo nimbi eini ari-du rururie. Pol umó, Taitus butu ragaro Krit anava, ekaresia* dumeni kaifa ari-du rea, avo doa arieta vitiria aghade, aghajora ghaeko* 64 Iesu siroruturia-da ambova, Pol unda ingiso tutunova Timoti du gefirie, kotú ená ingiso beago Taitus du gefirie.
Pol unda ingiso Taitus du gefiria-da bee evere. Krit enemboda irari jo taubana irambi-gea, Taitus na irari taubanada emboro irugea, ekaresiada babarigari gategea, kotú embó bee, evetu bee, irugea, mendi rekade, sabuade* dano irugari-du rea, Pol na Taitus daiyagha irugasua-da emboro isuri urota, ená ingiso gefirie.
Pol Ená Buka Gefiria Gagada Mendó Mane, Aná Evere:
1:1-4 Pol da Taitus ghanena uria re.
1:5-9 Taitus na enemboda irarinu gerurota, ekaresiada babarigari gategasua-da gaga re.
1:10-16 Irugari kakato sembago mane ambova siroraita rousua-da gaga re.
2:1-15 Ekaresia rova noni daba-daba buro daiyagha egegasua-da gaga re.
3:1-11 Taitus gaga donu rasua, kotú daiyagha irugasua-nu, Pol na undú nghaĩ ititurota riria re.
3:12-15 Pol tofo unda irarida gaga rea, unda ambo gajari ghanena Taitus du uria re.
1
1-4 2 Ko 8:23; Gal 2:3; 2 Ti 4:10Ariee, Taitus, anda mendi! Imó ghanena rore. God da sabua* imonu iruguturieta, tutuno ea, angá danode God gaabee egeguturota vitera, aná amó Pol re. Imó ghanena bee roreta, yata bua gi!
Iesu Keriso da aghi kato ari-du rea, God na amó gategea, unda gateguturia enembo Keriso da bingá gaabee arida mendó jojabe eini tanana egegari-du rea, amó ninenguturieta, unda ragarova deĩ urota vitere. Mendó jojabe eini kaifa gigita rosara, retora, aná evere. Namonde jebuga tumanadu irari ananu ambo-ambo urota bubugaita rosore. Enda ata sirorambi-va, angá anda God gavera jo rambi eta rouvia-mi aná jebuga utaita be gajiturie.
Aghá ea, unda itituria fefera furia buburiturieta, unda gaga isagha urie. Aghá urieta, God namonde anda Sonemba Kato aná gaga andú utua ririeta, amó unda gaganu minono rirota vitereta, yata bua gi!
God Afa kotú Iesu Keriso namonde anda Sonemba Katona indú sonembade, siriri aride utota badi!
1:5-16 Ekaresiada* Babarigari Avonu Gategasua Mo, Numane Eghá Iririgasue.
5 Anda imó Butu Krit avo doa futara-da bee mo, anda ritara aghagonu urota, buro avo vitia aná ea simbugota sidara ata, beforo righari naa inono gategadi rea, doa futare. 6 1 Ti 3:2-7Atá, aná beforo ririkigari númane enembo bingá taubana mane, evetu dabako, kotú númanda sasingu beago, God gaabee egeguturota, enemboda dibeva deriva ambi, enembomi númanenu kera egegasue. 7 Avore, aná beforo righari bingá taubana irari embó irasue. Kotú kofiri-kofiri ambi, neno gambari tutomi ambi, uvu fakara jo gogorego undambi, tiná-tiná ambi, kotú guridu jo daghari ambi egegasua rera-da bee mo, umó God da buroda beforo ririkurota vitie. 8 Umó esega enembodu ghaito teno fugari embó eini irasue. Umó ari-bari taubana nuenembo uno urota, undufa durumuguturota, aito fugari dambu, kakara urota irasue. Kotú, umó tamoda uno buregari inono ari embó eini irasue. 9 God da Gaga irugeta rousua-du, jo mana-mana ari aghago irambi re. Avore, aná beforo ririkigari rera-mi aná Gaga righia goghó urota, ikoko mendi, ariri gharovudava neno evurari gaga regegasue. Tago, enembo avona aná Gagada beedu besiga egegadua mo, aná beforo ririkigarimi dibeva rirota, númanda sembago isuri asueta niningigasue.
10 Anada bee mo, gaa ningambi enembo oruabe, gogorego Jiusi enemboda rova sirorari enembodu rera, númane tefo-tafo rirota, vii mendó andoro tafugari gaa rirota, enembo kuvia gerurota vitie. 11 Númane tefo guri bubugaita rea, gaga sembago, jo irugambi asua-nu, irugeaveta abua-abua dumeni númanda sasingudeda gaabee ari bebeta eta rousue. Amindu rea, númanda irugeta rousua gaganu buregadi rere. 12 Atá, seibe Krit enemboda iraridu númanda feroveta einimi eghá ririe, “Krit enembo númane fefera inono gavera kakato, digheghe ari kakato, injigha kakato kotú undari borega kakato re.” 13-14 Aná gaa bee re. Amindu númane dibeva ininigha rege, gaabee ea goghó urota, Jiusi enemboda evovo kiki niningigambi asue! Kotú, aná enembo gaabee injigha urota, irugari gavera eta rousua beago, Krit enembo gaabee egegauve-degea radi rere! 15 Enembo avona neno roo simbuguturota iradua mo, númanda neno roo jo tutomi sembago ea bebeta ambi aita rousue. Avotago, gaabee ambi, bebeta eta rousua enembodava, taubana eini tefo re. Anada bee mo, númanda neno roode nundubaride sembagomi eaveta, bebeta eta rousue. 16 Númane God tanana ari gaa reta rousue-tago, númanda ivatami númane God kivu eta rousue. Númane gaa ningambi kakato, kotú númane gerurota, obero neno eta rosore. Eini-eini taubana numanena ari inono irambi re.