115
1 Yinni Gusunɔ, n ǹ bɛsɛ sɑ bɛɛrɛ mɔ,
wunɑ ɑ bɛɛrɛ mɔ wunɛn tɔn ɡeeru kɑ wunɛn bɔrɔkinirun sɔ̃.
2 Mbɑn sɔ̃nɑ tɔn tukobu bɑ koo nɛɛ,
mɑnɑ Gusunɔ bɛsɛn Yinni u wɑ̃ɑ.
3 Gusunɔ bɛsɛn Yinni u wɑ̃ɑ wɔllɔ, u mɔ̀ ye u kĩ.
4 Adɑmɑ tɔn tukobɑ ben bũnun bwɑ̃ɑrokunu kuɑwɑ kɑ wurɑ kɑ sii ɡeesu.
Nu sɑ̃ɑwɑ tɔmbun nɔmɑn sɔmɑ.
5 Bwɑ̃ɑroku ni, nu nɔsu mɔ, ɑdɑmɑ nu ku rɑ ɡɑri ɡere.
Nu nɔni mɔ, ɑdɑmɑ nu ǹ yɑm wɑɑmɔ.
6 Nu swɑsu mɔ, ɑdɑmɑ nu ǹ ɡɑri nɔɔmɔ.
Nu wɛ̃ru mɔ, ɑdɑmɑ nu ǹ numiɑmɔ.
7 Nu nɔmɑ mɔ, ɑdɑmɑ nu ǹ kɑ ɡɑ̃ɑnu bɑbɑmɔ.
Nu nɑɑsu mɔ, ɑdɑmɑ nu ku rɑ sĩ.
Nin dɔkɔrɑ kun mɑɑ nɔɔrɔ.
8 Be bɑ bwɑ̃ɑroku ni mɔ̀ kɑ be bɑ ben nɑɑnɛ doke ni sɔɔ,
bɑ sɑ̃ɑwɑ nɡe ni.
9 Bɛɛ Isirelibɑ, i bɛɛn nɑɑnɛ dokeo Yinni Gusunɔ sɔɔ.
U sɑ̃ɑwɑ bɛɛn fɑɑbɑ kowo kɑ bɛɛn tɛrɛru.
10 Bɛɛ yɑ̃ku kowobu Aronin bweseru,
i bɛɛn nɑɑnɛ dokeo Yinni Gusunɔ sɔɔ.
U sɑ̃ɑwɑ bɛɛn fɑɑbɑ kowo kɑ bɛɛn tɛrɛru.
11 Bɛɛ be i Yinni Gusunɔ nɑsie,
i bɛɛn nɑɑnɛ dokeo wi sɔɔ.
U sɑ̃ɑwɑ bɛɛn fɑɑbɑ kowo kɑ bɛɛn tɛrɛru.
12 Yinni Gusunɔ u sun yɑɑye.
U koo sun domɑru kuɑ.
U koo Isirelibɑ domɑru kuɑ.
U koo Aronin bibun bweseru domɑru kuɑ.
13 U koo be bɑ nùn nɑsie domɑru kuɑ, bukurobu kɑ bibu.
14 U koo bɛɛ kɑ bɛɛn bibu win durom dɑbiɑsiɑ.
15 Yinni Gusunɔ u bɛɛ domɑru kuo wi, wi u wɔllu kɑ tem tɑkɑ kuɑ.
16 Wɔllu tɑ sɑ̃ɑwɑ wiɡiru,
mɑ u tɔmbu tem wɛ̃.
17 N ǹ ɡɔribu bɑ rɑ Yinni Gusunɔ sɑ̃
be, be bɑ wɑ̃ɑ mi yɑm dɑ n mɑɑri sɔ̃ɔ sɔ̃ɔ.
18 Adɑmɑ bɛsɛrɑ sɑ ko nùn sɑ̃ sɑɑ tɛ̃n di sere kɑ bɑɑdommɑɔ.
Yen sɔ̃, i Yinni Gusunɔ siɑro.