1 Hɑnduniɑ yeni sɔɔ, tɔnun wɑ̃ɑrɑ sɛ̃wɑ nɡe tɑbu kowo,

ǹ kun mɛ nɡe wi u sɔm sɛ̃sɔɡinu mɔ̀,

2 ǹ kun mɛ nɡe yoo wi u wɑ̃ɑ sɔ̃ɔ sɔɔ u sɑɑru kɑsu u wɛ̃rɑ,

ǹ kun mɛ nɡe sɔm kowo wi u mɑrɑ bu nùn kɔsiɑ.

3 Nɡe mɛyɑ nɛn tii nɑ sɑ̃ɑ.

Suru dɑbinu nɑ wɑ̃ɑ nɔni swɑ̃ɑru sɔɔ.

Wɔ̃ku dɑbinɑ nɑ rɑ n wɑ̃ɑ wɑhɑlɑ sɔɔ.

4 Nɑ̀ n kpunɑ nɑ rɑ tii bikiewɑ n nɛɛ, dommɑ kon se.

Dommɑ wɔ̃kurɑ koo kpe.

Domi nɑ wɑsirɑ nɑ n kɑ sunɑmɔ sere yɑm mu kɑ sɑ̃rɑ.

5 Wee nɛn wɑsi kɔ̃simɔ, yi kɔkɔnu mɔ̀,

mɑ yin kokosu wɔbirirɑmɔ.

Mɛyɑ nɛn ɡɔnɑ yɑ booboosu mɔ si su numu.

6 Nɛn wɛ̃siɑru tɑ weson kɔkɔrɔru sɑ̃ɑbu kere.

Nɑ ǹ yĩiyɔbu mɔ, Yinni Gusunɔ.

7 A yɑɑyo mɑ nɛn wɑ̃ɑrɑ sɑ̃ɑwɑ wɛ̃siɑ teeru.

Nɛn nɔni kun mɑɑ durom wɑsi.

8 Wunɛ wi ɑ mɑn mɛɛrɑ, ɑ ǹ mɑɑ mɑn wɑsi.

À n mɑn kɑsu, nɑ ǹ ko nɑ n mɑɑ wɑ̃ɑ mi.

9 Nɡe mɛ kɑkoru tɑ rɑ yɑrinɛ tu doonɑ,

nɡe mɛyɑ tɔnu ù n ɡu, u ǹ mɑɑ seemɔ ɡɔribun wɑ̃ɑ yerun di.

10 U ǹ mɑɑ wee u sinɑ win yɛnuɔ.

Bɑ koo nùn duɑriwɑ mɑm mɑm.

11 Nɑ ǹ kpɛ̃ n nɔɔ mɑri, domi nɑ nuki sɑnkire.

Kon nun weeweenu koosi, domi nɑ nɔni sɔ̃ɔre.

12 Yinni Gusunɔ, ɑ tɑmɑɑ nɑ sɑ̃ɑwɑ nɡe nim wɔ̃kun nim,

ǹ kun mɛ ɡen yɑɑ ɡɔbɑ ɡɑɑ, ɑ kɑ mɑn ɡɑnuɑ mɛ beri berikɑ?

13 Nɑ̀ n kpunɑ nɑ nɛɛ, kon bɔri yɛndu wɑ,

kpɑ n nɛn weeweenu mɑri,

14 sɑɑ yerɑ ɑ rɑ mɑn nɑndɑsie

kɑ dosu kɔ̃susu, ǹ kun mɛ kɑ kɑ̃sinu.

15 A yɑnde mɑn soorɑ dokeo n ɡbi,

ye ko nɑ n kɑ kuku nini sɔɔwɑ.

16 Wɑ̃ɑrɑ den mɑn tusɑ mɛ.

Nɑ ǹ mɑɑ kĩ nɑ n wɑ̃ɑ sere kɑ bɑɑdommɑɔ.

Nɛn wɑ̃ɑrɑ kun sɑ̃ɑ ɡɑ̃ɑnu, ɑ mɑn derio sɛ̃ɛ.

17 Yinni Gusunɔ, wɑrɑ rɑ n tɔnu,

ɑ n kɑ sere win bwisikunu mɔ̀.

Mbɑn sɔ̃nɑ ɑ nùn ɡɑrisi ɡɑ̃ɑnu,

18 mɑ ɑ nùn nɔni ɡirɑri bururu bɑɑtere,

mɑ ɑ nùn wɛ̃ɛrimɔ sɑɑ bɑɑyere.

19 Sere dommɑ kɑɑ mɑn deri sɛ̃ɛ.

Sere dommɑ kɑɑ de n wɛ̃siɑ.

20 Torɑru mbɑ nɑ torɑ.

A mɑn sɔ̃ɔwɔ wunɛ wi ɑ rɑ n tɔmbun sɑnu sɑnusu mɛɛrɑ.

Mbɑn sɔ̃nɑ ɑ mɑn sɛɛyɑsiɑmɔ mɛ.

Mbɑn sɔ̃nɑ nɑ kuɑ wunɛn sɔmunu.

21 Mbɑn sɔ̃nɑ ɑ ǹ nɛn durum wunɛ.

Mbɑn sɔ̃nɑ ɑ ǹ nɛn torɑru duɑri.

Tɛ̃, wee kon kpunɑ n ɡbi.

Kɑɑ mɑn kɑsu, kpɑ ɑ kun mɑn wɑ.