1 Gɑri yiniwɑ bɑ ɡeruɑ Mɔɑbubɑn sɔ̃.

Mɔɑbun tem kpuro mu koo kɑm ko,

kpɑ bu Ari Mɔɑbu kɑ Kiri Mɔɑbu kɔsuku wɔ̃ku teeru.

2 Diboniɡibu bɑ dɑ bũu sɑ̃ɑ yerɔ

kɑ ɡuunu wɔllɔ bu kɑ swĩ.

Mɔɑbubɑ bɑ weeweenu mɔ̀ wuu si bɑ mɔ̀ Nɛbo kɑ Mɛdebɑn sɔ̃.

Mɑ bɑ ben winu kɑ ben tobunu kɔnɑ nuku sɑnkirɑnun sɔ̃.

3 Mɑ bɑ sɑɑkibɑ sebuɑ bɑ wɑ̃ɑ swɛɛ sɔɔ

kɑ dii tɛɛriɔ kɑ dii yɑɑriɔ nuku sɑnkirɑnun sɔ̃.

Mɑ bɑ weeweenu mɔ̀ bɑ sumɔ kɑ nɔni yĩresu.

4 Hɛsiboniɡibu kɑ Eleɑleɡibu bɑ fɑɑbɑ kɑnɑmɔ

mɑ bɑ ben nɔɔ nɔɔmɔ sere Yɑhɑsiɔ.

Bɑɑ Mɔɑbun tɑbu kowobun tii bɑ wuri mɔ̀wɑ bɛrum sɔ̃.

5 Nɑ fɑɑbɑ kɑnɑmɔ Mɔɑbubɑn sɔ̃

be bɑ kpikiru suɔ bɑ dɔɔ Soɑriɔ kɑ Eɡɑlɑti Selisiyɑɔ.

Domi bɑ sumɔ bɑ kɑ Lusitin ɡuunu yɔɔmɔ,

bɑ wuri mɔ̀ Koronɑimun swɑɑɔ nuku sɑnkirɑnun sɔ̃.

6 Dɑɑ te bɑ mɔ̀ Nimurimu ten nim mu ɡberɑ.

Yɑkɑ si su wɑ̃ɑ ten ɡɑ̃ɑrɔ su ɡberɑ.

Gɑ̃ɑnu kun mɑɑ kpiɑ mi.

7 Yen sɔ̃nɑ bɑ ben ɑrumɑni ɡurɑ

ye yɑ bu tie

bɑ kɑ tɔburɑmɔ nim torɑn ɡuru ɡiɔ mi dɑ̃nu wɑ̃ɑ.

8 Mɔɑbubɑn tem nɔɔ burɑ yenu

kpuro sɔɔ, wuri nɔɔrɑmɔ.

Ben weeweenu nu nɔɔrɑmɔ sere Eɡɑlɑimuɔ, kɑ mɑɑ Elimun dɔkɔwɔ.

9 Dɑɑ te tɑ wɑ̃ɑ Dimɔniɔ ten nim

mu yɛm yibɑ tɔn be bɑ ɡon sɔ̃.

Adɑmɑ Yinni Gusunɔ u koo kpɑm Dimɔni ye nɔni swɑ̃ɑru kpɛ̃ɛ.

U koo de yibɛrɛbɑ bu Mɔɑbun kpikobu,

kɑ be bɑ tie tem mɛ sɔɔ wɔri nɡe ɡbee sinɑnsu.