10
1 Mga hali nako sa pagtu-o, hugot sa ako tagipusuon kag ako hanrom ag pangamuyo para sa ako mga kalahing Hudyo, nak kabay pang sinra ay maluwas. 2 Makakapamatuor ako nak abang rako kag inra pagpursige sa pagserbisyo sa Dios, ugaling kali ay buko kumporme sa tamang pagkaintyendi. 3 Dahil waya sinra it pagkaayam kung pauno kag tawo ay puyde nak himuon it Dios nak matarong sa Ida pagmuyat, kada padayon yang kag inra pagtinguha nak magkainggwa it karapatan sa Ida atubangan parayan sa inra maadong buhat. Ag buko sinra hanra nak magpasakop sa Ida, agor makaagom it pagka-matarong nak ingtata-o it Dios. 4 Dahil sa kamatuuran, si Kristo kag katuparan it Kasuguan ni Moises agor kag tanan nak nagtutu-o sa Ida ay magiging matarong sa pagmuyat it Dios.
5 Kada, gingsuyat ni Moises sa Sagradong Kasuyatan kag tungor sa pagka-matarong it tawo parayan sa ida pagtuman it Kasuguan sa pagsiling, “Aber siong tawo nak nagtutuman it tanang Kasuguan ay imaw kag ida parayan kung pauno sida magkakainggwa it kabuhi nak waya't katapusan.”
* 6 Pero inggwa ra it nakasuyat raha tungor kung pauno kag tawo ay puyding maging matarong parayan sa pagtu-o yang, nak nagsiling, “Aya gisiling sa imo sarili nak, ‘Si-o ara kag masaka sa langit para sa ato?’ Pay ingpapapilhig ray nimo si Kristo dili.
7 Ag aya gisiling ra nak, ‘Si-o ara kag mapilhig sa lugar it mga minatay para sa ato?’ Pay ingbabanhaw ray nimo si Kristo.
8 Dahil ni-o pa kag gingsiling ni Moises? Siling Nida nak,
“Kag mga bisaya it Dios ay mayungot sa inro,
hina sa inro isip ag tagipusuon,
ag pay hina yang sa ugbos it inro rila.”
† Kaling mga bisaya ay imaw kag mensahe nak amo ingpapalapnag tungor sa pagtu-o. 9 Dahil kung masiling kamo sa inro mga isigkatawo nak, “Si Hesus kag Gino-o,” ag kung hugot sa inro tagipusuon kag inro pagpati nak gingbanhaw Sida it Dios, kamo ay maluluwas. 10 Kumo parayan sa ato hugot nak pagtu-o kang Kristo, kita ay ahimuon it Dios nak matarong. Ag parayan ra sa ato pagsiling tungor raha, kita ay nakakasiguro nak kita ay maluluwas, 11 kumo gingsiling ra sa Sagradong Kasuyatan nak,
“Tanang tawo nak nagtutu-o sa Ida ay indi nak gador sinra mahuda.”
‡ 12 Matuor, waya it diperensya sa among mga lahi it Hudyo ag sa inrong mga buko Hudyo
§ sa pagmuyat it Dios. Ausa yang kag Gino-o ag Sida kag Gino-o it tanan. Ag abang rako kag kaluoy nak Ida ingpapakita sa aber siong tawo nak nag-aayaba sa Ida.
13 Dahil nakasuyat ra sa Sagradong Kasuyatan nak,
“Tanang tawo nak nag-aayaba sa Gino-o ay maluluwas.”
* 14 Pero pauno sinra maayaba sa Dios kung waya sinra'g tutu-o? Ag pauno magtu-o sinra kung waya pa sinra nakakarungog tungor sa Ida? Ag pauno ra ninra marurunggan kung waya it nagbabantala sa inra it tungor dili? 15 Ag pauno magkainggwa't mabantala sa inra kung waya sinra igsugu-a? Ugaling inggwa it mga ingsugo, kumo nakasuyat sa Sagradong Kasuyatan nak,
“Abang ado kag nagraraya it maadong balita.”
† 16 Pero buko tanang amo mga kalahing Hudyo nak nagrungog sa Maadong Balita ay nagpati. Kada gingsiling ni Propeta Isaias nak,
“Gino-o, apila yang kag nagtu-o sa amo gingbabantala.”
‡ 17 Ngani, kag pagtu-o ay mahalin yang sa pagrungog it mensahe, ag kag mensahe nak dapat arunggan ay kag mga bisaya tungor kang Kristo. 18 Pero inggwa ako it pangutana, “Maari baga nak wayang gador ninra narunggi kag tungor kang Kristo?” Pero siguradong inggway sinra it narunggan, kumo imaw kina kag nakasiling sa Sagradong Kasuyatan,
“Kag inra pagbantala ay pay nagpangkalat sa tanang parti it duta,
ag kag inra mga bisaya ay pay nakaabot sa bug-os nak kalibutan.”
§ 19 Pero inggwa pa ako it usang pangutana, “Maari baga nak waya naintyendihe it amo mga kalahing Hudyo
* kag inra narunggan?”
Ag kag ako dapat isabat ay, “Naintyendihaney ninra,” kumo gingsiling ni Moises kag ingbisaya it Dios sa inra nak,
“Kamong mga lahi it Hudyo, ay apahilion Nako
sa nasyon it buko Hudyo,
nak pay sa inro pagmuyat ay waya't puyos,
ag kamo ay magiging mahangiton sa inra,
dahil pay waya sinra it pagkaintyendi.”
† 20 Ag usa pa, si Propeta Isaias ay waya nak gador nahadlok nak ipaathag sa inra kag gingbisaya it Dios tungor sa buko Hudyo nak,
“Nakitaey Ako it mga waya naghahanap,
ag nagpakitaey Ako sa mga waya nag-aayaba.”
‡ 21 Ag masunor ray, ay tungor sa mga lahi it Hudyo,
§ siling Nida,
“Adlaw gab-i, padayon Nakong ginghuhunat
kag Ako mga damot
pramas papayunguton tan-a kamo sa Ako,
pero kamo'y mga pasaway ag matugas