Firim fafu Fásum me ti
Maruk
anabaw ahiĉ fo me
Waf waw wabaj me n’élebur yauye
Elébur yauye Maruk nahiĉyohiĉ bi n’ejangaraay galelen me bugo ᵽe Esúif gúttut. Yo eomme ewansil yay yafaŋ me n’ereore sasuso saamme sífaji. Ebajut to lobi mala fiñile Yésu. Ebajut ᵽoᵽ balober bahulie baa Yésu. Bare til egitengiten bagitener bammeŋe baa bíemor, bal esen úsota gahoy ni baa síceŋor. Ticeto egitengiten báᵽajuler balet dó ni sasu siewansil.
Ewansil yay yaa Maruk enabennaben bajaer babu baa siewansil sasu saa Mácie ni Lík. Ni buju babu bala yo egitengiten búoh Yésu aamme Añol Aláemit (Maruk 1.1). Mb’uĉigal ni fúbanum yo, Añol Aláemit nabbaŋi n’ekurua min aĉet (Maruk 15.39).
Ni gaŋas gagu gátiar gagu gal élebur yay (Maruk 1.1–8.26), Yésu amaŋut min bugan bugagu gufaen guffas o aamme ay. Nah’asen gahoy úsotaaw, náh’áᵽuren siseytane sasu ni bugan bugagu, nah’alob ni sembe sámah ró. Bugan bugagu nihi gurorenor ñer guoh : « An ahumu o aamme ay ? » Bare Yésu naah bugan bugagu gajoh me búoh guffasol : « Jambi jigiten ánoan ínje iomme ay. »
Gaŋas gagu gáutten gagu gal élebur yay (Maruk 8.27–16.20) gukakan min fasi bu Yésu áamum me Añol Aláemit. Bugan bugagu bugaa no guruhenenruhen bugan bugagu búgamah bugagu gajogi me maageima ti úlaemit. Bugan bugaubugi búgamah bugagu nihi gukanenkan waf wajahaliene, gúpiraenete, nihi guteb ebeŋ ni mataño mánoman.
Bare Yésu hani min áni me arafuhow, o bae Añol Aláemit nam. Ulagorol to baenah gujogenut yo iki gujunden Yésu tinah talu to nabelei me n’eĉet. Afan ekosombil ace no najuh me Yésu aam n’eĉet naah : « Aíne ahumu maagen Añol Aláemit omene ! » (Maruk 15.39)
1
Gavare gagu gaa Saaŋ Batis
(Mácie 3.1 ; Lík 3.1-18 ; Saaŋ 1.19-28)
1 Firim fafu fásum me faa Yésu Kirista, Añol Aláemit, maa fíĉili. 2 N’élebur yay yal aboñer ahu Esai, Aláemit naage :
« Ᵽan iboñ ájaenumaom gahoŋen ayabi gayoŋ min mb’ateŋen bulago babu bi n’aw* 1.2 Juluj Malaki 3.1. »
3 « Firim fúᵽureul baubu n’eᵽarandaŋ yay nihi fuoh fatiya :
“Jiteŋen fukaen bi ni Ataw !
Jiyaol ulago waĉole† 1.3 Juluj Esai 40.3 !” »
4 Ajáenuma-gahoŋen ahumu o aamme Saaŋ Batis. Babu ni gafit gagu gámah gagu náᵽullo nah’avare bugan bugagu naagil : « Jíbahen bakanerul min íbatiseul, min mbi Aláemit aboketul utilul. » 5 Bugaa mof mamu ᵽe maa Yúde bi ni bugaa Yérusalem ró ᵽooil nihi gujow gutogol bo, ban n’gugiten utilil bújoŋor ésuh yay ᵽe, min ñer Saaŋ ábatiseil ni fal fafu faa Suruden. 6 Saaŋ ahumu bisimool ni bufal eñokombo bucokori, ban nah’ahogo gasinja gaa gabaŋ ni fuhoŋolol. Ujamen-émit ni múhum maa baha nah’atiñen. 7 Nah’avare aah : « An ahu afaŋom me sembe fúf umu n’éjoul búsolom, ban ínje iᵽilout bi éñuᵽ ijal unew sidalaol. 8 Injé ni mal níbatiseeul, bare aĉila ᵽan ábatiseul ni Biinum Banabe. »
Saaŋ o n’gábatise Yésu
(Mácie 3.13–4.11 ; Lík 3.21-22 ; 4.1-13)
9 Ni gunah gaugu, Yésu náᵽurul Nasaret ni mof mamu maa Gálile ákail Saaŋ ábatiseol ni fal fafu faa Suruden. 10 No Yésu aamme n’éᵽurul ni mal mamu, najuh émit yay épegulo, ban Biinum Banabe m’búavul birembor ni o ti gálab. 11 Ni baj firim fúᵽurul n’émit fuoh : « Aw uomme Añolom o nifaŋ me níbbolie ; ésumayom ᵽe ni aw yom. »
Seytane o n’élingen Yésu
(Mácie 4.1-11 ; Lík 4.1-13)
12 To baenah, Biinum Banabe m’biilen Yésu ajow bi ni gafit gagu gámah gagu. 13 Nanamo bo gunah úvi gúuba (40) ; ban ni gunah gaugu, Seytane náh’álingen gáinen gagu gola. Narobo bo o ni súnuhureŋ sasu saa baha, ban emalakaay nihi gucokorol bo.
Yésu o n’evoh ulagorol gútiar
(Mácie 4.12-22 ; Lík 4.14-15 ; 5.1-11)
14 Ni gunah gaugu, n’gujoh Saaŋ Batis gúrur ni fipeh. Ᵽúrto, Yésu najow bi Gálile ; navare bo Firim fafu Fásum me fal Aláemit. 15 Nah’aah : « Tinah talu tabeli me tiĉige, Jávi Aláemit julofulo ! Jihat bakanerul baarat me min jíinen Firim fafu Fásum me ! »
16 Funah fice, Yésu o n’ejow galam fal fafu fáᵽurut me faa Gálile, najuh umbala gúuba, Simoŋ ni atiol Andere, gubet simbalil dó ni fal faufu. 17 Naagil : « Jújoul jilagenom, ban ᵽan ikanul jíni umbala bugan. » 18 To baenah, n’guhato simbalil min gulagenol.
19 No Yésu abbañ me atos ráli maa, najuh Saak ni atiol Saaŋ, guñol Sebede, gúni m’busanail n’gaheten simbalil. 20 To baenah navogil ; n’guhat ᵽail ni urokaaw dó ni busana babu min gúᵽurul gujaor ni Yésu.
Yésu náᵽuren eseytane ni an
(Lík 4.31-37)
21 Ᵽúrto, Yésu ni ulagorol n’gujow bi n’ésuh ece yo guvoge me Kaᵽerinaum. No fíiyay Esúif yay fiĉih me, Yésu nanogen ni yaŋ yay yaa galaw, aban nanamo éᵽajul ésuh yay gurim Aláemit. 22 Bugan bugagu n’gujahali baligenerol faŋ, mata naligeneligen ti an ayabe sembe, búli ni wo úᵽajula gúboñ Aláemit bugagu nihi guligen me.
23 Bajen dó ni yaŋ yauyu yaa galaw ace áine o eseytane enone ; áine ahumu náᵽib aah : 24 « Yésu ala Nasaret, wa numaŋe ni wóli ? Nukelo jabanóli ? Niffase ay nom : An ahu anab me ala Aláemit. » 25 Yésu nannur yo aah : « Uᵽanor, ban núᵽur cab n’áine ahumu ! » 26 Ñer eseytane yay nekan áine ahu nailo avenjeŋor, mbiban néᵽur ni o n’eya nímoro gáᵽib gámah. 27 Bugo ᵽe gajahali n’gunonil iki nihi gurorenor guoh : « Dáuru wa uomme úru ? Baligener mul bice buvugul bal an ayabe sembe ! Hani may siseytane sasu nihi súttun wo nalobe so me. » 28 Ñer gajaol n’gufaen guuno ni mof mamu ᵽe maa Gálile.
Yésu o n’esen gahoy aol Simoŋ Ᵽier ni guce ᵽoᵽ gammeŋe
(Mácie 8.14-17 ; Lík 4.38-41)
29 No Yésu áᵽullo me ni yaŋ yay yaa galaw, najow bi yaŋ Simoŋ ni Andere, manur ni Saak ni Saaŋ. 30 Toker aol Simoŋ aarema umuen dó min afiye bújusa bajogerol ; n’gufaen gulob Yésu mola. 31 Ñer Yésu nalofol, najogol n’gañen ailen, ban bújusa babu m’búᵽur to baenah ni o, min ñer aare ahu anamo ecokoril.
32 Mb’uĉiga gállim, no fíbiñel fulo me, n’guŋallol úsotaaw ᵽe ni bugagu bugo siseytane sunogen me. 33 Esúh yay ᵽe n’gúᵽurul gúkail guomunor to bújoŋor ganegen yaŋ yay. 34 Ñer Yésu nasen gahoy bugan gammeŋe bugal úsomut wábuliore. Naham ᵽoᵽ siseytane sammeŋe, ban nemme siffasol, ahalut so min sulob.
Yésu o n’ejow Gálile ᵽooyo
(Lík 4.42-44)
35 Tinahurab, to m’basarerut, Yésu nailo aban náᵽurul ajow bi tiñ talikoe ak’anamo bo galaw. 36 Simoŋ ni bugagu gaamen to me ni o, no guiyulo me, n’guilo guliᵽol. 37 No gujugol me, n’guogol : « Bugan bugagu ᵽe aw guliᵽe mee ! » 38 Naagil : « Utosal mbaa sasu súsuh salof me yauye, tima nivare bo may ; mata dáuru diĉile níjoul. » 39 Ᵽúrto, najow mof mamu maa Gálile ᵽoomo, nah’avare ni saŋ sasu saa galaw n’eham siseytane sasu nímoro.
Yésu o n’esen gahoy an ala háhae
(Mácie 8.1-4 ; Lík 5.12-16)
40 Funah fice, ni baj ánaine o háhae ejoge ájoul atoh Yésu. No nalofol me, nalo aya gújulol naagol n’efotenor dó : « Umaŋ me, nújue ukanom nihoy ijañ ti no ! » 41 Yésu enilol nerum áine ahumu bireg naalen gañenol agorol naagol : « Yoo, nimaŋe. Uhoy ujañ ! » 42 To baenah háhae yay néᵽur ni o, ban nakur. 43 Ñer Yésu nabbañenol akay n’eĉafol táñi nímoro 44 aah : « Ukánum ! Jamb’ulob yo me ánoan, bare ujow iki ateŋena ahu ajugi, ban nukan bíteŋen babu bo gúboñ gagu gaa Móis gulob me, min ugiten ésuh yay búoh nuhohoy. » 45 Bare áine ahu no náᵽullo to me, nanamo eamben fatiya elob yay aban babu ᵽe, bireg Yésu abbañut áju anogen n’ésuh m’babbuyut. Ñer náh’átij babu tíyaŋ tiñ talikoe, bare mánoman, bugan bugagu nihi gúᵽurul ulam waw ᵽoowo íkiil gutogol.