8
Jishɔ pɔ pi Taathɔ pa Thishɨ Ghaŋ Fɛʼiŋgiɛŋ
kɨ̀na ŋa a pwa ŋgaʼa nɛ
kɨ̀na ŋa a pwa ŋgaʼa nɛ
1 Ndwɛ, ŋguoŋ nnu ŋa pigi chhu nu nɛ pɔ pi yei: pia fāʼo yɛ ŋkwaŋ Taathɔ pa Thishɨ Ghaŋ Fɛʼiŋgiɛŋ ŋa a chhɔ pi ŋgei mbhɔ jɨ Minnwi Chaapifuoŋ po, 2 muuŋ fàʼa moŋ pa lɨʼɨ taoŋtaoŋ, moŋ ya ŋkiɛŋ ntǎa ŋa a lɔ ŋkrao ŋoŋmishua, a krao Taathɔ nɛ.
3 Nthɛ ŋa pi ghà nchuʼɔ sheshe taathɔ pa thishɨ ghaŋ fɛʼiŋgiɛŋ ŋa a fɛ pa yaoŋ fɛ́ pugu pɔ yaoŋ fɛʼiŋgiɛŋ, nnɛ a pie ŋa yei Taathɔ pa Thishɨ Ghaŋ Fɛʼiŋgiɛŋ fāʼo yaoŋ nɔ fɛ̄ʼi nu ŋgiɛŋ nɔ ghɔ. 4 Ndwɛ, a kaŋ nì mbɔ pi ŋkuoŋ shhɛ, a shi kaŋ njiʼi mbɔ ŋgaŋ fɛʼiŋgiɛŋ Minnwi kaŋ shɨgɛi nthɛ ŋa pa ghaŋ fɛʼiŋgiɛŋ Minnwi pɔ fɔ ŋa pugu ghà mfɛ pa yaoŋ fɛ́ ŋkwaŋ nɔ haʼaŋ gɨ́ chhu nɛ. 5 Fàʼa ŋa ghaŋ fɛʼiŋgiɛŋ pighɔ ghà mfāʼa nɛ pɔ pi fhi pugu pa miliʼi pa nnu ŋa a pɔ po nɛ, nthɛ ŋa ndɨɨ ŋa Mushi ni ntāʼa nu ŋkrao ntǎa ghɔ nɛ, Minnwi fɛ ntɨ́gɨ ghɔ, nchhu nu ŋa, “Paʼo nɔ yəɨ nu ŋa ɔ chwīe ŋguoŋ yaoŋ moŋ ŋkwaŋ haʼaŋ pi ni nōoŋ vɛ ŋkuoŋ mbra nɛ.” 6 Ndɔ ti nɔ haʼaŋ a pɔ nɛ, Krishto fāʼo fàʼa ŋa a ya mbwa nchaa yugu, wuʼɔ nɔ haʼaŋ kɨ̀na ŋa a ju mbɔ ŋgaŋ chīni ŋggì fɔ pwa ŋgaʼa, nthɛ ŋa a yɨʼə pi ŋkuoŋ pa ŋkiɛŋ kàʼa.
7 Nthɛ ŋa fǔoŋ k̈ɨ̀na kaŋ ni mbɔ pi ki ntəɨ, a shi kaŋ ndɔ mbɔ ŋa pi chhɔ ntāʼa mbra yi. 8 Nthɛ ŋa a ni njəɨ ntəɨ mbɨŋ pugu ndɨɨ ŋa a ni nchhu ŋa,
“A chhu ju Taathɔ ŋa, līi njəɨ, pa llɛ́ chhɔ nthɔ nu,
ŋa ǹshi ŋgwrā kɨ̀na fhi
pigi pa ŋgwa Ishrae pugu pa ŋgwa Juda.
9 Mbaʼa yei kɨ̀na yiʼi mbɔ pi nɔ yɛ ŋa ŋki wrā
pigi pa tǎa pugu llɛ́ yɛ ŋa
ŋki wɛ̄iŋ mbhɔ yugu
ntaoŋ ni pugu moŋ laʼataoŋ Ijipti nɛ.
Nthɛ ŋa pugu shini ndɔ ŋgə̄ɨ shhɨ nthɔ nūʼɔŋ kɨ̀na a,
nthɛ yie ghɔ, paʼa ǹdɔ mfāʼo ndɨɨ yugu, a chhu ju Taathɔ.
10 Nthɛ ŋa yei kɨ̀na ŋa ǹshi ŋgwrā pigi pa mbaanda Ishrae nɛ,
pa llɛ́ pighɔ shi ŋga ntɔgɔ, a chhu Taathɔ,
Ǹshi niʼiŋ gɨ́ paŋ thɔ pugu,
ndɔ mbɨnɨ nāʼaŋ njùʼɔ pugu,
Ndɔ ǹshi mbɔ Minnwi yugu,
pugu pɔ pa ŋgwa paŋ.
11 Mbaʼa shesheŋoŋ yiʼi njɛʼi taakuo vi ki shesheŋoŋ yɛʼi ndǐŋ vi,
nchhu nu ghɔ ŋa, ‘Ji Taathɔ.’
Nthɛ ŋa ŋguoŋ yugu ghao shi nji a,
llɔ ŋkuoŋ pa miŋkwasha ti ŋgə̄ɨ nchəɨŋ ŋkuoŋ pa ŋgwa liɛŋliɛŋ.
12 Nthɛ ŋa ǹshi mfāʼo kwoshɨnɨ ni pa fāaŋ pugu,
paʼa ndɔ nuʼuŋ ŋkwiŋ pa phɨ pugu kaŋ shɨgɛi yi.”
13 Minnwi gha nchrā nu nthɛ kɨ̀na fhi, a chwīe fǔoŋ yi lūnu, ndɔ sheshe yaoŋ ŋa a lūnu ndɔ mbɨrɨ nu nɛ tɔthɔ mbhɛ.