5
Kiꞌndi borrego ko xujun xi kjiya ntsja xi tijñasun yaxile
1 ꞌBa tsaꞌbia̱ jngu xujun ngaya ntsja kixi xi tijñasun yaxilebiu. ꞌBa kui xujunbiu kuaꞌindu ngastun ko ngankjain, ꞌba yatu kaꞌa tjiꞌñuni nga inyanere sello. 2 ꞌBa tsaꞌbia̱ jngu ankje xi ꞌñu tjinre kjuaꞌñu, xi ꞌñu tinchja nga titsu: “¿ꞌYá= xi bakinre nga sijoya sellore ꞌba skanite xujunbiu?”
3 Tunga niꞌyá xi tjin ngankꞌaa ninga xi tjin ngasunꞌndio ꞌba ninga xi tjin ngi tꞌanangiu kuánre kiskanite xujunbiu, nga tuxi kꞌuexkiyani. 4 ꞌBa an ꞌñu kiskiꞌndaa̱, nga tuꞌyá kuasjai xi bakinre nga kiskanite xujunbiu ninga tu skutsejensare.
5 ꞌBa meni kitsuna̱ jngu xuta chinga xi kañujun: “Bi nde chiꞌndani. Chutsejen. Xi ꞌetjujinnire xuta xi jaꞌenire ntjere Judá, xi ꞌba nguyare joni tjiuxa, ꞌba xi jamare David, kui xi je kitsaꞌen ꞌba bakin=re̱ nga skanite xujunbiu ꞌba sijoya sello xi yatu.”
6 ꞌBa tiñare yaxilio ko nga ñujun xi tjindukun ꞌba ngamasenre nchja chinga xi kañujun tsaꞌbia̱ jngu Kiꞌndi borrego xi sejña ngaꞌndebiu, xi ꞌbatsaꞌen matsejen joni tsa je kjinikꞌen. Tjinre yatu turu ko yatu tuxkun xi isennixtjinre Naꞌenchana xi yatu mani xi nikasen jo kjiꞌi ngasunꞌndio. 7 ꞌBa Kiꞌndi borrego kitsitiñatꞌare xi tijñasun yaxile ꞌba kiskjebe xujun xi kjiya ntsja kixi.
8 ꞌBa nga kiskjebe xujunbiu Kiꞌndi borregobiu, nga ñujun xi tjindukun ko nchja chinga xi kañujun mani tsikinyakunchꞌintꞌare. Nga jngu jngu yaꞌa najni arpa ꞌba ko nisu xi oro ni xi kitse tsajmi xi nda jen kanijnda, xi tsunire xi nchja xuta xi tseꞌe Naꞌenchana nga fako. 9 ꞌBa kise son xatsebi:
Ji xi bakinri nga xjube xujun ꞌba sijoye sellore,
ngatꞌa ji xi kjinikꞌenri ꞌba xi kikꞌesten jinri,
ꞌba ꞌba=tsaꞌen kikꞌechjintjaini tuxi ku̱atse̱ꞌe̱ni Naꞌenchana yakꞌa ngajinre ngatsiꞌi ntjere xuta xi tjin ngasunꞌnde,
ko xi nchja kjaꞌe kjuanga en,
ko naxinanda xi tjin,
ꞌba ko xutare nangi xi tjin.
10 Kui xi kjiñeꞌen jngu naxinanda xi batexuma,
ꞌba kui xi kjiñeꞌen naꞌmi xi saꞌexatꞌare Naꞌenchana.
ꞌBa kuatexumare ngasunꞌndio.
11 ꞌBa saꞌe kiskutsejen ngañaa̱ ꞌba kjintꞌe jnda_ra̱ ꞌñu nkjin ankje xi tsikinyatꞌa ngandaire yaxilio ko nga ñujun xi tjindukun ꞌba ko nchja chinga xi kañujun. Tunga ꞌñu nkjinnkjin= mani. 12 ꞌBa ko jngu jnda xi ꞌñu inyatsu:
Kiꞌndi borrego xi kjinikꞌen,
Kui= xi bakinre nga kjuinichjire ngatꞌare kjuaꞌñure, kjuanyinare,
kjuankjin kakunre, ꞌba ko ngaꞌñure.
Ngatjaꞌyakun kui, ngatjanichjire, ꞌba ngatasakure kjuaje.
13 ꞌBa nde kjintꞌe jnda_ra̱ ngayéje xi kitsaꞌen Naꞌenchana ngankꞌaa, ngasunꞌndio, ngiꞌndere tꞌanangiu ꞌba ko ngajin ndachikun, nga ꞌbi inyatsu:
Kiꞌndi borrego ko xi tijñasun yaxilio,
kui xi ngatjanichjire ꞌba ngatjaꞌyakun,
ꞌba kui xi ngatasakure kjuaje ko kjuaꞌñu kaꞌnda ngantsjai nixtjin.
14 ꞌBa nga ñujun xi tjindukun kitsu: “¡ꞌBa ngatjama!” ꞌBa nchja chinga xi kañujun tsinyakunchꞌin ꞌba kitsichjire Kiꞌndi borrego ko xi tijñasun yaxilio.