14
Jesús tsu nga kuekun ngani Naꞌenchana
1 Jesús kitsu:
—Bi on ngatjamare kakún. Ngatjamakjainnu ngatꞌare Naꞌenchana ꞌba ꞌba nde ngatjamakjainnu ngatꞌana̱. 2 Ndaba Naꞌenna̱ ne nkjin ngaꞌnde ña ma betsuba tjin. Tsa bira tjin, biru kixin_nuu̱ nga kjuikꞌenda_nuu̱ ngaꞌnde. 3 ꞌBa tsa kjuikꞌenda_nuu̱ ngaꞌnde, ꞌba=tsaꞌen kjuaꞌekjaꞌa ngani_nuu̱, tuxi ꞌba nde kio kuetsubañu ña kuatejñaa̱. 4 ꞌBa ꞌyañu ndiya xi fi ña kjuia̱.
5 ꞌBa Tomás kitsure:
—Naꞌen, bi ꞌyee̱ ñá= teꞌmi. ¿Jótsaꞌen xiani̱ ndiyo?
6 ꞌBa Jesús kitsure:
—An= ña̱ ndiyo ꞌba an= ña̱ kjuakixiu ko kjuabenichun. Niꞌyá ma fechu ña tijña Naꞌenchana tsa bi ngatꞌana̱. 7 Tsa ꞌyaxkunnuu̱, ꞌba=nde xiaxkun Naꞌenna̱. ꞌBa ꞌnda ngandaꞌe je ꞌyaxkun, ꞌba je kichutsejenꞌo.
8 ꞌBa Felipe kitsure:
—Naꞌen, takunii̱ Naꞌenchana ꞌba tu ku̱annini̱ kibiu.
9 ꞌBa Jesús kitsure:
—Je ndaꞌe tejñajin_nuu̱ ꞌba tojo kje ꞌyaxkunjínnaa̱, Felipe. Xi tjibena̱, ꞌba=nde tjibe Naꞌenchana. ¿Ánñu ꞌba teꞌmininaa̱: “Takunii̱ Naꞌenchana”? 10 ¿A bi makjainri nga an tejñajin_ra̱ Naꞌenchana ꞌba Naꞌenchana tijñajinna̱? En xi texin_nuu̱ bi kuenda tsaꞌan tenchjaa̱. Tusa Naꞌen xi tijñajinntsjaina̱, kui= xi titsaꞌen xa xi tseꞌe. 11 Ngatjamakjainnu nga an tejñajin_ra̱ Naꞌenchana ꞌba nga kui tijñajinna̱. ꞌBa tsa tsajain, nisi tu ngatꞌare xa xi tetsaꞌaa̱n ngatjamakjainnu.
12 ’Kjuakixi= xi texin_nuu̱. Xi ku̱akjainre ngatꞌana̱, ndekui xa saꞌenni joni xi tetsaꞌaa̱n. ꞌBa ngisa= yaꞌe ngisa xa xi saꞌen xutabiu, ngatꞌa an tefi=ña̱ ña tijña Naꞌenchana. 13 ꞌBa ngayéje xi xjoꞌo ngatꞌare jaꞌenna̱ sja_nuu̱, tuxi sꞌe̱jñatsejenni kjuajere Naꞌenchana ngatꞌare Kiꞌndiu. 14 Tsa tjin xi xjoꞌo ngatꞌare jaꞌenna̱, sja_nuu̱.
Jesús tsu nga sikasen Isennixtjintsjere Naꞌenchana
15 ’Tsa nimejénnuu̱ an, tikꞌetjusun kjuatexumana̱. 16 ꞌBa an skuiꞌa_ra̱ Naꞌenchana, ꞌba kui sjanu ngijngu xi ꞌba nde kuasekonu ꞌba xi kꞌuejñajinntsjainu ngatsiꞌu. 17 Kui= xi Isennixtjintsjere Naꞌenchana xi kuakutsejen mé= xi kjuakixi. Xuta ngasunꞌndebi bi ku̱an sakure, ngatꞌa bi be ꞌba bi bexkun ꞌyá= ni kui. Tunga jun, je ꞌyaxkun ꞌyá= ni kui, ngatꞌa kui= xi tijñajinnu ngatsiꞌu ꞌba jaskan kꞌuejñajinnu nga jngu jngu.
18 ’Bi sikꞌendu suba_nuu̱, kjuaꞌekun ngani_nuu̱. 19 ꞌBa tu ngingutjun= ngisa tu je bi nde skuenina̱ xuta ngasunꞌndebi, tunga jun xianuu̱. Ngatꞌa tejñakunña̱, kui kjuañu ꞌba nde kuetsubakunñu. 20 Kui nixtjinbiu xio nga an tejñajin_ra̱ Naꞌenna̱ ꞌba jun tetsubajinnuu̱ ꞌba an tejñajin_nuu̱. 21 Xi kjuaꞌatjo kjuatexumana̱ ꞌba sikꞌetjusun, kui= xi tsimejénna̱. ꞌBa xi tsimejénna̱, Naꞌenna̱ ꞌba=nde simején ꞌba ꞌba=nde simijía̱n an ꞌba kuakutsejen_ra̱ yojona̱.
22 ꞌBa ꞌbatsaꞌen Judas (xi bi Judas Iscariote) kitsure:
—Naꞌen, ¿jótsaꞌen nga tu ji̱n kuakutsejennii̱ yojori ꞌba bi xuta ngasunꞌndio?
23 ꞌBa Jesús kitsingojore:
—Tsa tjin xi tsimejénna̱, sikꞌetjusun= enna̱. ꞌBa Naꞌenna̱ si̱mején= xutabiu, ꞌba Naꞌenna̱ ko an kjuaꞌechun=ni̱ ꞌba kuetsubako=ni̱. 24 Tunga xi bi tsimejénna̱, bi sikꞌetjusun enna̱. ꞌBa en xi tenuꞌyo, bi tsaꞌan. Tseꞌe= Naꞌen xi kitsikasenna̱.
25 ’Texin_nuu̱ kibi yejerañu tejñajin ngisa_nuu̱. 26 Tunga xi kuasekonu, Isennixtjintsjere Naꞌenchana xi kui sikasen ngatꞌare jaꞌenna̱, kui xi kuakuya yejenu ꞌba sikjaꞌetsjen yejenu xi texin_nuu̱.
27 ’Teꞌbejña_nuu̱ kjuaxiu. Kjuaxiuna̱ tetsja_nuu̱. Bi ꞌbatsaꞌen tsjaa̱ an jotsaꞌen tsja xuta ngasunꞌndebi. Bi on ngatjamare kakún ꞌba bi kun. 28 Je kjinuꞌyo nga ꞌba kixin_nuu̱ nga kjuia̱ ꞌba nga kjuaꞌekun ngani_nuu̱. Tsa kjuakixi nga nimejénnuu̱ an, ꞌba=nde tsja sꞌe̱nu nga kjuia̱ ña tijña Naꞌenchana, ngatꞌa ngisa= ꞌñu je ngisa Naꞌenchana nga ko mare an. 29 ꞌBa ngandaꞌe je tjen ꞌba texin_nuu̱ yejerañu kje ꞌba majín, tuxi ku̱akjainninu kionga ꞌba ku̱an.
30 ’Bi nde tsé kjuakoni_nuu̱, ngatꞌa je ndiba xi batexumare ngasunꞌndebi. Kui bi tjinre kjuaꞌñu tuxi kuatexumanina̱, 31 tunga tjinne=re nga ꞌba ku̱an, tuxi skueni xuta ngasunꞌndebi nga tsimijía̱n Naꞌenchana ꞌba nga tetsikꞌetjusaa̱n jotsaꞌen kitsuna̱. Tisetjion ꞌba tjian.