2
Jesús uztakanain uztain
1 Cristone uruza kiwainashimtu, tɨnta kulanapa. Uruza panashimtu, u wat kianapa. Dios Sɨnam Izpulne aumɨza akwanamtu, uskasa sulmin wanmakkana. Une mamaztuza pashinamtu, kiwainana. 2 Katmizna wan na kaizta aizpa kirain. U mamaz tuntuin nɨjkularane, nane watsal uznash. Une uruzpain pashirain. Sulmin minñat kit kal kiarawa. 3 “Aune mamazkin an wat kitmakpas” kizanachi. Kal kimtuasmin, umin minkain. Mamaztuzpa anza wat kiarɨt aizpa minñarawa. 4 U akwain wat kirɨt aizpa sayanachi. Mamazpa wat kiarɨt aizpa sairain.
5 Uruzpain kawarain mintain, Jesucristo mintakanain, usmin anza katsa namtachi akwa. 6 Jesúsne sunkana uzta:
Jesúsne Dios azi.
Jesúsne Dioskanain ɨninna sairachi.
7 Diostas us mɨj aizpa paimpa chɨhkat kit
ampukanain kawira,
kiwainmumikakanain namna, awaruza kiwainanapa.
8 Awakanain uzasmin, usmin an ainkin namta.
Dios ussa ɨninta aizpa kit kit
kurishta mɨtsalpazhain ira.
9 Katmizna Diosne ussa anza katsa nam kit
uskasa ɨninna unat kit
ussa mamaz munkin anza wat mun munta.
10 Suasmesa Jesústa mɨmtuchiruzkas
mɨmturuzkas chiyura uztuzkas
au sukin uztuzkas pil ayukman uztuzkas
ussa wakpuj wainñanazi.
11 Suasne wan awane “Jesúsne Anpat i” kizat kit kwinta kianazi.
Sun kizamtuasmin, “Taitta Diosta kwisha wari” kizanazi.
Cristora nɨjkulturuzne an sura wat uzanazi
12 Katmizna, na Cristora nɨjkulturuza pashinamtu akwa, na kaiztu aizpa mɨrain. Na uruzkasa uztuasmin, une na kaizta aizpa pailta payu mɨara. Maneme na attishta uzasmin, an ñakanain na ɨninta aizpa an nil mɨrain. Dios uruza sɨnam sanarɨt akwa, ussa wakpuj wain kit us kurunta aizpa kit kit Diospa kal chɨhkat aizpa kirain. 13 Diosne ukasain kal kimɨz kit kiwaintu, us pashit aizpakas wan kianapa.
14 Wan kirain, pilchapuzarachin, kutkuarachin, 15 mɨnminkas u kwail kiarɨt kizamanpa. Dios uruza paiña kwal namnarɨt akwa, uzat kit watmin mintain. Kwail kimtuzkin uzamtuasmin, chinkas kwail kiman. Suasne sun awane u mamaz tuntu uzamtu aizpa izanazi. 16 Une an watsal pit kaiznarawa, mamaztuzkas mɨat kit mamaz tuntu uzanapa. Sunkana Cristo akane, nane u akwa kwisha wat minnash, u ap pit mɨara akwa. 17 U Diosta nɨjkulara akwa, us pashit aizpa kiarɨt akwa, une us akwa naizara. Imtune, nakas u akwa naiztɨnash, na uruza Diospa kainanat akwa. U akwa naiztakas, nane ukasa watsal kulnash. 18 Sunkanain nakasa watsal kultain.
Timoteokas Epafroditokas
19 Anpat Jesústa nɨjkulmɨztu akwa, nane Timoteora u uztukin azain ɨninshimtus. Us kailkane, miza u uzamtu kainakane, nane watsal kulnash. 20 Usne u akwa nakanain mintu. Mɨnminkas uskana u wat akwa kiwainshimtuchi. 21 Wan awane uspain kal kiamtu aizpa sayamtu. Jesucristowa kal kin minñamtuchi. 22 Uruzne miza Timoteo nil uz kit wat kit aizpa pian. Usne nakasa Dios watsal pit kainana kiwainta. Usne painkul papihshta kiwaintukanain nawa kiwainta. 23 Na kimtu aizpa pailtawane, nane Timoteora uruzpara aza ɨninshimtus. 24 Ap Anpat nawa kiwaintuasmin, nane masakin uruza ɨnash.
25 Mane nane Epafroditora kailninna mintus. An añakanain nɨjkultamikane nawa kiwain kit nakasa awa iztakin kwisha wat kamtanara. Une ussa nawa ɨninñara, na we aizpa kiwainapa. 26 U us imtu mɨara akwa, usne tayal kit wan uruza kwisha izna ɨshira. 27 Watcha, inapain tuazi. Diosne ussa kiwainta. Irachi akwa, nawakas kiwainta, na kwisha tayalmanpa. 28 Katmizna nane ussa azain ɨninshimtus, u ussa mamasa izat kit watsal kulanapa, na we tayalnapa. 29 Us akane, au Anpatta nɨjkultu akwa, ussa yalta napnintain, watsal kulnapa. Wan awa uskanain wat minñarawa. Epafrodito awakanain wat paraarawa. 30 Nawa tɨnta kiwaintuasmin, usne imasara, Cristowa kal kimtu akwa. Us u akwa watmin minshimtuasmin, usne u wan kishiamtu aizpa wan tɨnta kimɨzta, nawa kiwainna.