Nĩ ârî drẽ! Mâ rĩꞌá Líndrí Tãndí Ôvârí kâ bê* 3.1 Úlı̣́ gólĩyî Yõwánĩ drí îgĩlí nõngá rî rĩꞌá ‘líndrí Ôvârí kâ njı̣̂-drı̣̃-lâ-rı̣̃” ĩꞌdî. Õjílã ãmbá ı̣̂sũ tã kĩ, ꞌdĩî rĩꞌá úlı̣́ mãnĩgõ Líndrí Tãndí Ôvârí kâ rî tãsĩ. gõꞌdá kpá cú ı̣̃ꞌbı̣̂ꞌbı̣̂wạ́ bê má drı̣́gạ́ zãlô njı̣̂-drı̣̃-lâ-rı̣̃ rî ĩꞌdî. Má nı̣̃ tã õnjí gólĩyî ãnî drí rĩꞌá ꞌẽlâ rî trá. Gõꞌdá ĩtí rî, ókĩ ãnî âꞌdô rĩꞌá ótó lédrẽ-lédrẽ ꞌî, gõꞌdá tã pạ̃tı̣́ı̣̃ ró rî ãnî rĩꞌá ótó ãvõ ꞌî. 2 ꞌDõvó ãnî õjílã ámákâ rî ꞌbá yî, nĩ njı̣̃ lı̣̃fı̣́ ậꞌdú ꞌásĩ! Nĩ sû lédrẽ-lédrẽ ạ̃mbúkũ fínyáwá gólâ lâkí ꞌbá ꞌdĩ rú dódó, tãlâ õzó îcá drãlé zãâ ndrĩ kô. Tã ꞌẽꞌẽ ãníkâ ꞌdé kô ãlôwálâ Ôvârí rî lı̣̃fı̣́ drı̣̃ bê. 3 Má âtâ tã ãnî drí tã gólĩyî îmbálé trá ãnî drí gõꞌdá kpá tã gólĩyî lẽlé trá rî ãâgâ ãnî drı̣̃ı̣̂, nĩ rî rĩlí tã lẽlẽ sĩ tã rî ꞌdĩ ꞌbá yî ꞌá pı̣̃pı̣̂sı̣́lı̣́ ãlô sĩ. ꞌDõvó nĩ âyê kpá tã gólĩyî õnjí ró ãnî drí rĩꞌá trá ꞌẽlâ rî ꞌbá yî. Nĩ njı̣̃ lı̣̃fı̣́ ậꞌdú ꞌásĩ, tãlâ má õzó âcá ãnî ngálâ nyĩî ró õzõ ũgú kâtí gõꞌdá ãnî tı̣̂ drí ậꞌdı̣́zó drílâ sĩ.

4 Kpálé ĩtí rî, ãnî ũrûkậ ꞌbá yî Sãrãdísĩ ꞌá rî ꞌbá yî rî ĩyî trá rĩlí lạ́tı̣̂ mbı̣̂ tãndí ró gólâ ámákâ rî ꞌásĩ. Nĩ âꞌdô gõꞌdá lậmúꞌá nĩ má bê võ ꞌbũû ꞌá ûrú ꞌálâ rî ꞌá. Áâꞌdô kpá ítá mvẽêmvê rî ꞌbá yî sõꞌá ãnî rú. ꞌDĩî rî tã tãndí ãníkâ rî ꞌbá yî âꞌdálé ĩꞌdî. 5 Nĩ ârî drẽ! Gólĩyî rĩ ꞌbá fĩî ậtũlı̣́ tã âyézó kô ꞌdẽzó má vósĩ rî, gólĩyî âꞌdô ĩyî kpá ítá mvẽêmvê sõꞌá gõꞌdá gólĩyî rú âꞌdô rĩꞌá îgĩ-îgĩ lâ ró búkũ lédrẽ-lédrẽ kâ rî ꞌá, ꞌdĩî rĩꞌá õjílã gólĩyî ꞌẽ ꞌbá rĩlí zãâ gbạ́dú ró rî ꞌbá yî rú lâ ĩyî lãfálé ꞌá. Nĩngá sĩ, má âꞌdô tã pẽꞌá ámâ átá yî drí mãlãyíkã âꞌdó ꞌbá ĩyî gólâkâ ró rî ꞌbá yí bê kĩ, gólĩyî ꞌdĩ ꞌbá yî rĩꞌá ĩyî õjílã ámákâ ĩꞌdî.

6 Ãnî õjílã ámákâ rî ꞌbá yî, õzõ ãnî ãꞌdô fí té bı̣́ bê rî, ꞌdõvó nĩ ârî tã gólâ mâ drí rĩꞌá âtálâ ãnî drí Líndrí Tãndí Ôvârí kâ rî sĩ rî. Ĩꞌdî ꞌdĩ.

Nĩ ârî drẽ! Mâ ĩꞌdî rĩꞌá âꞌdô-âꞌdô ámákâ drí ꞌbãlé ngĩî õjílã ndrĩ má drí ꞌbãlé rî ꞌbá yî drı̣̃ı̣̂ sĩ, gõꞌdá kpá õjílã gólâ âꞌdó ꞌbá tã mbı̣̂ ꞌbá ró Ôvârí ngá lésĩ rî ĩꞌdî pạ̃tı̣́ı̣̃. Mâ cú rĩꞌá mãfõtáã jạ̃rı̣́bạ̃ Ôvârí kâ rî kâ bê má drı̣́gạ́.* 3.7 Úlı̣́ gólĩyî Yõwánĩ drí îgĩlí nõngá rî rĩꞌá ‘mãfõtáã Dạ̃wúdı̣̃ kâ”. Tã ífí úlı̣́ ꞌdĩ kâ kĩ, mãfõtáã gólâ ạ́tı̣̃ fĩzó jạ̃rı̣́bạ̃ ândrê Ôvârí kâ gólâ ꞌbũû ꞌálâ gólâ âꞌdó ꞌbá õzõ Yẽrõsãlémã gólâ kúmú Dạ̃wúdı̣̃ drí bẽlé ãngó nõ ꞌá rî kâtí rî tı̣̂ lâ njı̣̃ kâ trậ rî ĩꞌdî. Õzõ má ũnjı̣̃ ạ́tı̣̃ ãzákôlâ ꞌdĩ trá tólâ rî, õjílã ãzãkã yû gólâ îcá ꞌbá ạ́tı̣̃ rî ꞌdĩ âꞌbãlé rî. Gõꞌdá kpá õzõ má ãâꞌbã ạ́tı̣̃ rî ꞌdĩ trá kpạ̃ạ́kũ rî, õjílã ãzãkã kpá yû gólâ îcá ꞌbá njı̣̃lâ trậ rî. 8 Ĩtí rî, má njı̣̃ ạ́tı̣̃ rî ꞌdĩ trá trậ ãnî drí fĩzó Ôvârí ngálâ. Má nı̣̃ tã gólĩyî ãnî drí rĩꞌá ꞌẽlâ rî ꞌbá yî trá ndrĩ. Má nı̣̃ kpá trá kĩ, ãnî mbârâkã âꞌdó kô rõô, gõꞌdá kpálé ĩtí rî, nĩ ı̣̂njı̣̃ tã gólĩyî má drí âtálé trá ãnî drí ꞌẽlé rî ꞌbá yî trá. Gõꞌdá kpá rî, ãnî âꞌdó kô ũrı̣̃ ró tã âtálé kĩ, ãnî rĩꞌá õjílã gólĩyî tã lẽ ꞌbá trá má ꞌá rî ꞌbá yî ĩꞌdî. 9 Gõꞌdá õjílã gólĩyî tã âtá ꞌbá kĩ ĩyî ãâꞌdô õrĩ Ôvârí kâ, Yúdạ̃ yí kâ ró rî ꞌbá yî ĩꞌdî rî tãsĩ rî, gólĩyî âdô ꞌdĩ õnjõ ꞌî, gólĩyî rĩꞌá õjílã Sãtánã kâ ĩꞌdî. Gõꞌdá ĩtí rî, má âꞌdô õnjõ ꞌbá ꞌdĩ ꞌbá yî ꞌbãꞌá ânĩlí ꞌãꞌî tı̣̃lı̣́ vũdrı̣́ ãnî pá âmvózó, gõꞌdá gólĩyî âꞌdô nı̣̃ꞌá lâ kĩ, ãnî lôvó bê má ꞌá rõô. 10 Nĩ ı̣̂njı̣̃ tã Ôvârí kâ gólâ rĩzó rĩlí tã lẽlẽ sĩ Ôvârí ꞌá, õzõ ámá kâtí rî trá õzõ kpálé kậyı̣̂ lâŋõ kâ rî sĩ rî. Má âꞌdô gõꞌdá âdréꞌá ãnî ngá lésĩ kpạ̃ạ́kũ cácã ró kậyı̣̂ lâŋõ ạ́ngı̣́ kâ gólâ ꞌẽ ꞌbá âꞌdélé õrĩ ndrĩ ãngó nõ kâ drı̣̃ı̣̂ ngbãângbânõ tã õnjí gólĩyíkâ tãsĩ rî ꞌá.

11 Má âꞌdô âcáꞌá âgõlé ãngó nõ ꞌá ngbãângbânõ. Ĩtí rî, nĩ rî tã ámákâ rî ꞌbá yî lẽlẽ lâ yî sĩ, tãlâ óõzó kô drı̣́-ꞌâ ãníkâ gólâ Ôvârí drí ꞌẽꞌá fẽlâ ãnî drí rî trõô. 12 Má âtâ õjílã gólĩyî rĩ ꞌbá fĩî ậtũlı̣́ gõꞌdá tã âyézó kô ꞌdẽzó má vósĩ rî, má âꞌdô gólĩyî ꞌbãꞌá âꞌdólé ãnyî Ôvârí bê kárá õzõ ậjû kâtí jó ạ́ngı̣́ ámâ átá Ôvârí kâ ꞌbũû ꞌálâ gólâ ꞌẽ ꞌbá rĩlí zãâ gbạ́dú nã ạ̃tı̣́lı̣́. Ĩtí rî, õjílã ãzãkã yû gólĩyî âdrólé vólé jó rî ꞌdĩ ꞌásĩ. Gõꞌdá kpá rî, má âꞌdô Ôvârí ámákâ rî rú lâ îgĩꞌá gólĩyî ándrá-gạ́-sı̣́lı̣́ ꞌá jạ̃rı̣́bạ̃ Ôvârí kâ rî rú lâ bê. Jạ̃rı̣́bạ̃ rî ꞌdĩ rú lâ Yẽrõsãlémã óꞌdí gólâ Ôvârí drí ꞌẽꞌá ꞌbãlâ ânĩlí ꞌbũû lésĩ nõngá rî ĩꞌdî. Gõꞌdá má âꞌdô kpá rú óꞌdí ámákâ îgĩꞌá gólĩyî drı̣̃ı̣̂, ãꞌdô ró bê gólĩyî drí âꞌdózó õjílã ámákâ ró.

13 Ãnî õjílã ámákâ rî ꞌbá yî, õzõ ãnî ãꞌdô fí té bı̣́ bê rî, ꞌdõvó nĩ ârî tã gólâ má drí rĩꞌá âtálâ ãnî drí Líndrí Tãndí Ôvârí kâ rî sĩ rî. Ĩꞌdî ꞌdĩ.

Nĩ ârî drẽ! Mâ rĩꞌá õjílã gólâ rĩ ꞌbá ngá yí drí tã lâ ꞌbãlé ꞌẽlé rî ꞌẽ ꞌbá té ĩꞌdî rî ĩꞌdî. Mâ kpá rĩꞌá lı̣̃fı̣́ ꞌbãzó drı̣̃ lâ rî ĩꞌdî, gõꞌdá kpá rĩꞌá tã mbı̣̂ ꞌbá ꞌî. Mâ kpá rĩꞌá õjílã gólâ zãâ kárá rĩ ꞌbá trá tã Ôvârí kâ ꞌẽlé ĩꞌdî pạ̃tı̣́ı̣̃ ró bũúũ ámâ fũzó rî ĩꞌdî. Mâ ĩꞌdî rĩꞌá Kúmú ró ngá ndrĩ gólĩyî Ôvârí drí lôꞌbãlé rî ꞌbá yî drı̣̃lı̣́.

15 Má nı̣̃ tã gólĩyî ãnî drí rĩꞌá ꞌẽlâ rî trá ndrĩ, gõꞌdá kpá tã ı̣̂sũ ãníkâ bê. Nĩ ârí tã ámákâ rî kô ꞌẽlé pı̣̃pı̣̂sı̣́lı̣́ ãlô sĩ. Nĩ kĩ, ãnî ãâꞌdô ámâ lẽ ꞌbá ró, gõꞌdá âꞌdó kô pạ̃tı̣́ı̣̃ ró. 16 Ãnî rĩꞌá má drí rî õzõ ãtó gólâ pẽtẽkẽ ꞌạ̃ꞌı̣́-nyá ãkó rî kâtí, gõꞌdá tãlâ ãnî trá rĩꞌá ĩtí rî drí sĩ rî, má lẽ trá ãnî ậwúlı̣́ vólé ámâ sı̣́-ꞌbálé ꞌásĩ. 17 Nĩ âtâ tã kĩ, ãnî ãâꞌdô trá cú ngá-tı̣̂ bê dũû, nĩ kĩ nĩ rî, gõꞌdá ngá ĩzã ndẽé ãnî kô. ꞌDĩî nĩ nı̣̃ı̣́ tã kô kĩ, ãnî rĩꞌá ngá ãkó lé ꞌbá ꞌî, ãpãrãpã ũdúdû ꞌî gõꞌdá kpá rĩꞌá ĩyî ũndú ró ámâ lı̣̃fı̣́ drı̣̃ ꞌá. 18 ꞌDõvó má lôgõ ãnî fĩî, tãlâ nĩ ânĩ ró bê dáãbõ lậgû-lậgû ró rî ûsúlı̣́ má drı̣́gạ́ sĩ, gõꞌdá kpá ânĩlí ítá gólĩyî ngbángbá mvẽêmvê ró rî ꞌbá yî ûsúlı̣́ má drı̣́gạ́ sĩ, ãꞌdô ró bê ãnî drí sõlé ãnî rúꞌbạ́ ũndú ꞌdĩ drı̣̃ı̣̂, gõꞌdá kpá rî, nĩ ânĩ ró ãlókõ ûsúlı̣́ má drı̣́gạ́ sĩ lôtĩlí ãnî lı̣̃fı̣́ ꞌásĩ, tãlâ nĩ îcâ ró bê võ ndrẽlé pạ̃tı̣́ı̣̃ ró.

19 Má kĩ, ãnî má drí lôvó lâ yî ꞌbãlé rî ꞌbá yî tãsĩ rî, má âꞌdâ tã õnjí ãníkâ trá ãnî drí, gõꞌdá má fẽ lâŋõ kpá trá ãnî drí, ãꞌdô ró bê ãnî drí drı̣̃ âdĩzó tã õnjí ꞌẽꞌẽ ꞌásĩ. ꞌDõvó bê trá ĩtí rî, nĩ ꞌdê nĩ âyê tã õnjí ãníkâ rî ꞌbá yî ꞌwãâ, gõꞌdá nĩ îtõ ró bê ꞌdẽlé má vósĩ pı̣̃pı̣̂sı̣́lı̣́ ãlô sĩ.

20 Nĩ ndrê drẽ fí, mâ rĩꞌá âdréꞌá ạ́tı̣̃ tı̣́ rĩꞌá ãnî rú zı̣̃ꞌá. ꞌDõvó ĩtí rî, nĩ ârî ámâ gbórókõ gõꞌdá nĩ njı̣̃ ró bê ạ́tı̣̃. Gõꞌdá nĩngá sĩ rî, má âꞌdô fĩꞌá ãnî drí jó ꞌásĩ. Gõꞌdá mã âꞌdô nyãsá nyãꞌá ãní bê kpãkã ãlô.

21 Nĩ ârî drẽ, gólĩyî rĩ ꞌbá fĩî ậtũlı̣́ gõꞌdá tã âyézó kô ꞌdẽzó má vósĩ rî, má âꞌdô gólĩyî ậzı̣́ꞌá rĩlí má bê kúmú ró. ꞌDĩî rĩꞌá tã ãlôlâ, õzõ má drí âtálé trá kĩ má rî trá tã lẽlẽ sĩ, gõꞌdá nĩngá sĩ ámâ átá drí ámâ zĩzó rĩlí kúmú ró yí bê rî kâtí.

22 Ãnî õjílã ámákâ rî ꞌbá yî, õzõ ãnî ãꞌdô fí té bı̣́ bê rî, ꞌdõvó nĩ ârî tã gólâ má drí rĩꞌá âtálâ ãnî drí Líndrí Tãndí Ôvârí kâ rî sĩ rî. Ĩꞌdî ꞌdĩ.