1-2 Ní âtâ tã mbı̣̂ õjílã gólĩyî ãrãkã ró rî yî drí mãnísĩ, õzõ ní drí tã mbı̣̂ âꞌdárẽ ánî átá drí rî tí, tãlâ gólĩyî õrî ró bê tãndí ró. Gõꞌdá ní âꞌdâ tã mbı̣̂ ĩꞌdî kpá õkó gólĩyî ãrãkã ró rî yî drí, õzõ ní drí tã mbı̣̂ âꞌdárẽ ánî ândré drí rî tí, kpá gólĩyî ãgô mvá ró rî drí, õzõ ánî ậdrúpı̣̃ drí rî kâtí, gõꞌdá kpá õkó mvá ró rî yî drí, õzõ ánî îzó yî drí rî kâtí. Õzõ ní ãâꞌdô bí tã âtáꞌá õkó drí rî, ní âꞌdâ lı̣̃fı̣́ drílĩyî kô.

3-4 Ãnî ndrĩ, nĩ ndrê ạ̃yı̣́zı̣́ gólĩyî âꞌdó ꞌbá áró ãkó rî ꞌbá yî vó lâ yî. Gõꞌdá õzõ ạ̃yı̣́zı̣́ rî ꞌdĩ ãꞌdô mvá bê ngãtá ózõwá bê rî, áró gólâkâ ꞌdĩ ꞌbá yî âꞌdô gólâ rî vó ndrẽꞌá nĩ. Gólĩyî âꞌdô âꞌdóꞌá ngá ĩzã lâ drí ĩyî ândré ngãtá dẽdé ꞌdĩ ꞌẽ ꞌbá rî ꞌẽlé sı̣́sı̣́ drílâ, tãlâ ngá gólâ gólĩyî ândrê ꞌdĩ drí ꞌẽlé drílĩyî drẽ ãkpã gólĩyî drí âꞌdózó drẽ fínyáwá rî võ lâ ꞌá. ꞌDĩî tã gólâ ãyĩkõ lâ drí Ôvârí rî cĩlí rî ĩꞌdî.

5 Õzõ ạ̃yı̣́zı̣́ ãꞌdô áró ãkó pạ̃tı̣́ı̣̃ rî, ꞌdĩî rî gólâ rî lı̣̃fı̣́ ꞌbãlé tótó Ôvârí drı̣̃ı̣̂. Gõꞌdá gólâ drí rĩzó rãtáã ꞌẽlé ı̣̃tú vósĩ cé Ôvârí drí íyî pãlé. 6 Gõꞌdá ãꞌdô ạ̃yı̣́zı̣́ gólâ rĩ ꞌbá cé ngá gólâ ãyĩkõ lâ drí gólâ rî cĩlí rî lẽlé ĩꞌdî rî, gólâ lẽé tã gólâ âꞌdó ꞌbá Ôvârí kâ ró rî kô. 7 Tĩmátĩyã, ní ꞌbã tã krístõ ꞌbá yî drí kĩ nĩ rî, gólĩyî õꞌê tã ꞌdî ĩtí dódó, tãlâ óõzó tã ányâ âtá gólĩyî rú. 8 Õzõ õjílã ãzâ õndrê ꞌbã ꞌálé íyî áró yí kâ vó lâ kô tãndí ró rî, ngîngî lâ íyî ândrê yî ngãtá íyî dẽdé yî vó kô rî, ꞌdĩî kpá rĩꞌá õzõ gólâ drí úlı̣́ Ôvârí kâ âyérẽ tí. Tã õnjí gólâkâ rî lậvũ trá kôrô õjílã gólâ tã lẽ ꞌbá Yésũ ꞌá kô rî kâ drı̣̃ı̣̂ sĩ.

9 Ạ̃yı̣́zı̣́ ãnî drí ꞌẽꞌá rú lâ yî îgĩlí pãlé ngá-ĩyínyâ sĩ rî ãâꞌdô gólĩyî ndrô lâ yî drí lậvũlı̣́ trá nyâꞌdî-nâ drı̣̃ı̣̂ sĩ rî ĩꞌdî, gõꞌdá kpá ậyı̣́ ꞌbá ãgô ãzâ bê ágó lâ drı̣̃ı̣̂ sĩ kô rî ĩꞌdî. 10 Gõꞌdá kpá gólâ rî rú drí rĩꞌá lı̣̂kúlı̣́ tã ꞌẽꞌẽ tãndí íyíkâ ꞌá rî ĩꞌdî. Gólâ drí rĩzó õjílã pãlé kpálé lâŋõ ãmbá gólĩyî ꞌẽ ꞌbá ꞌdĩ ꞌbá yî ꞌásĩ rî, drílâ ꞌdĩyímvá íyíkâ lı̣̃fı̣́ lâ îcízó dódó. Gõꞌdá gólâ kpá rĩꞌá sı̣́ bê ârí ró õjílã gólĩyî lâŋõ bê rî drí, rĩꞌá ngá nyãnyã fẽlé gólĩyî drí ꞌwãâꞌwâ. Gólâ drí âꞌdólé ı̣̃tú vósĩ cé njãâ tã tãndí ꞌẽlé ĩꞌdî õjílã Ôvârí kâ drí.

11-12 Nĩ îgĩ ạ̃yı̣́zı̣́ gólĩyî õkó mvá ró ꞌdĩ ꞌbá yî rú lâ yî gólĩyî ní drí ꞌẽꞌá pãlâ rî lãfálé kô. Tãlâ gólĩyî ĩtí ꞌdĩ ꞌbá yî drẽ ĩyî zãâ ágó lôvó bê ꞌẽzó ágó ãzâ trõlé. Ĩtí rî, gólĩyî ꞌbã lãtrítrí trá yĩ trõó ágó ãzâ kô, gõꞌdá õzõ gólĩyî gõꞌdá õtrõ ágó ãzâ trá óꞌdí rî, gólĩyî njâ ĩyî lãtrítrí gólĩyî drí ꞌbãlé ꞌdĩ tã lâ trá, ꞌdĩî trá gõꞌdá tã õnjí ꞌî, ꞌé ĩyî tã ꞌbãꞌbã ĩyíkâ Yésũ drí rî tã lâ kô. 13 Gõꞌdá ãꞌdô trá ĩtí rî, íîgĩ gólĩyî rú kô, gólĩyî õzó rĩî ĩyíkâ gbõ ĩtí tãkó nĩꞌá ꞌbã-tı̣̂ kpã bê nĩꞌá tı̣̂ sõlé úlı̣́ õjílã kâ ꞌásĩ. Gólĩyî rî kpá nĩꞌá lậmú bê úlı̣́ ũnúnûwạ́ tã ngõngõ bê ꞌbã-tı̣̂ ꞌásĩ õjílã rú, ꞌdĩî rî âꞌdó tã drílĩyî ꞌẽlé rî ĩꞌdî kô. 14 ꞌDĩî rî tí rî, má ı̣̂sũ tã trá nõtí. Ạ̃yı̣́zı̣́ gólĩyî ꞌbã ꞌbá õkó mvá ró rî yî õtrõ ĩyî ágó óꞌdí ũtı̣̂ ró ĩyî mvá ãzâ õndrê ró ĩyî ꞌbã ꞌálé ĩyíkâ vó lâ bê tãndí ró. Gólĩyî õꞌê cé tã âꞌdó ꞌbá tãndí rî ĩꞌdî õzó ãnî rú îzãâ. 15 Má âtâ tã ꞌdî ĩtí ꞌdĩ, tãlâ ạ̃yı̣́zı̣́ ãzâ ꞌbá yî rĩꞌá, gólĩyî njâ Ôvârí rî tã trá gõꞌdá gólĩyî cé õzõ Sãtánã rî ãzí-ãzí kâtí.

16 Õzõ õjílã ãzâ tã lẽ ꞌbá Ôvârí ꞌá rî, ãꞌdô ạ̃yı̣́zı̣́ bê íyî áró ró rî, gólâ õndrê vó lâ dódó, õzó lâŋõ ꞌdî âyé õjílã kạ̃nı̣́sạ̃ kâ drí rĩzó ạ̃yı̣́zı̣́ ꞌdĩ vó lâ ndrẽlé cé nĩ kô. Gõꞌdá õjílã kạ̃nı̣́sạ̃ kâ õrî ró cé ạ̃yı̣́zı̣́ gólĩyî ꞌbã ꞌbá ĩzã ró áró ãkó îcá ꞌbá ĩyî vó ndrẽlé kô rî ꞌbá yî vó lâ ndrẽlé cé ĩꞌdî.

17 Krístõ ꞌbá yî ãâꞌdô drı̣̃-ꞌbá ĩyíkâ rî ı̣̂njı̣̃-ı̣̂njı̣̃ lâ bê tãndí ró. Ãmbá lâ, gólĩyî ı̣̃ı̣̂njı̣̃ drı̣̃-ꞌbá ĩyíkâ tã Ôvârí kâ pẽ ꞌbá õjílã drí rî, gõꞌdá kpá gólĩyî rĩ ꞌbá îcílâ rî ꞌbá yí bê. 18 Nĩ ı̣̂njı̣̃ gólĩyî ngá fẽfẽ sĩ drílĩyî, tãlâ tã îgĩ Ôvârí kâ âtâ trá kĩ nĩ rî, “Nĩ âyê kõrõnyã ãníkâ ꞌbã kâ rî ꞌbá yî ngá nyãlé dódó, tãlâ gólĩyî rî nĩ ãnî pãlé.” Gõꞌdá áâtâ kpá nõngá kĩ nĩ rî, õjílã gólâ lôsĩ ꞌẽ ꞌbá rî tã lâ ꞌdé vũdrı̣́ kô drı̣́-ꞌâ fẽzó drílâ.

19 Õzõ õjílã ãzâ ãâtâ úlı̣́ ãzâ ꞌbá yî trá drı̣̃-ꞌbá õjílã Ôvârí kâ rî kâ rî ꞌbá yî rú rî, nĩ lẽ tã-drı̣̃ kô ꞌwãâꞌwâ tã gólĩyíkâ ꞌdĩ bê, té õzõ lı̣̃fı̣́ drı̣̃ ꞌbá ãꞌdô bê rı̣̃ ngãtá nâ tã õnjí gólâkâ ꞌdĩ ndrẽ ꞌbá kĩꞌá nĩ rî, gólâ ꞌê trá pạ̃tı̣́ı̣̃ ró rî. 20 Õzõ drı̣̃-ꞌbá ãzâ õꞌê tã õnjí trá pạ̃tı̣́ı̣̃ rî, nĩ âꞌdâ tã õnjí gólâkâ ꞌdĩ gólâ drí õjílã gólĩyî kạ̃nı̣́sạ̃ kâ ndrĩ ꞌdî ꞌbá yî ândrá, tãlâ ạ̃mbúkũ lâ ꞌdĩ ꞌbá yî õrô ró ĩyî tã bê tã õnjí ꞌẽzó ĩyî ífífí rú. 21 Nĩ âꞌdô tã ꞌẽꞌẽ bê ĩtí ndrĩ drı̣̃-ꞌbá kạ̃nı̣́sạ̃ kâ drí. Õzõ nĩ õꞌê tã ꞌdî ꞌbá yî trá ĩtí rî, nĩ âmbê lı̣̃fı̣́ kô tã õnjí ãnî ãzí-ãzí drı̣̃-ꞌbá ró rî kâ drı̣̃ı̣̂. Má lẽ ãnî drí lãtrítrí ꞌbãlé Ôvârí ândrá gõꞌdá kpá Yésũ Krístõ bê gõꞌdá kpá mãlãyíkã Ôvârí kâ yí bê kĩ nĩ rî, nĩ ꞌê tã má drí âtálé ꞌdĩ ꞌbá yî ĩtí drı̣̃-ꞌbá tãsĩ.

22 Õzõ nĩ õtírĩ ꞌẽê õjílã ãzâ ꞌbãlé drı̣̃-ꞌbá kạ̃nı̣́sạ̃ kâ ró rî, nĩ ậrı̣̃ gólâ rî ũgúlı̣́ zãlô dîrî tã ꞌẽꞌẽ gólâkâ nı̣̃zó, âꞌdó kô gólâ rî ꞌbãzó cú ĩtí õmvórẽ lâ nı̣̃ ãkó. Tãlâ õzõ nĩ õꞌbã õjílã tã õnjí ꞌẽ ꞌbá rî ĩꞌdî drı̣̃-ꞌbá ró ãnî drí rî, nĩ pâ ı̣́tı̣̃tı̣́ ngá lậnjı̣̃-lậnjı̣̃ ĩtí ꞌdĩ ꞌbá yî njı̣̃zó.

23-25 Má âtâ ĩꞌdî ãnî drí nõ, nĩ ꞌbã õjílã kô drı̣̃-ꞌbá ãníkâ ró cú ĩtí õmvórẽ lâ nı̣̃ ãkó tã õnjí gólâkâ tãsĩ. Nĩ ndrê drẽ, õjílã ãzâ ꞌbá yî rî ĩyíkâ rĩꞌá tã õnjí ꞌẽlé ĩꞌdî, gõꞌdá ãzí-ãzí drí tã õnjí gólĩyíkâ ꞌdĩ nı̣̃zó tõ. Gõꞌdá õjílã ãzâ ꞌbá yí bê rî, tã õnjí gólĩyíkâ rĩꞌá ꞌẽlâ ı̣̃nı̣́nı̣̂ ró rî, rî rû âꞌdáꞌá ı̣̃zạ́tú ạ̃tı̣́ ꞌá tólâ, kpá rĩꞌá ĩtí õjílã ãzâ ꞌbá yî tã tãndí gólĩyíkâ rĩꞌá ꞌẽlâ rî únı̣̃ tõ. Gõꞌdá ãzâ ꞌbá yî tã tãndí gólĩyíkâ íîcá kpá nı̣̃lâ kô, âꞌdô rû âꞌdáꞌá kpá ạ̃tı̣́ ꞌá tólâ.

Tĩmátĩyã, nî rĩꞌá ꞌâ lãzé bê kárá. Ní rî cé lı̣̃mvû mvũlı̣́ ĩꞌdî ngá lãzé áníkâ ꞌdĩ bê kô, ní ônjâ õdrá dã lũmvû bê ní drí mvũlı̣́, tãlâ ãlókõ bê ꞌá lâ ánî ꞌâ drí ậꞌdı̣́zó.