1 Ikii ko Ogatamee me kisee esee kiepa see yogaa yuwa kemaata Wa me iyee mee ikii miya doonaa siwoo taai, 2 bedaa epa see dimii mee miya doonaa siwoo taai. Mee ko Ogatamee paagoo kupi-manee siyaa agiyoo daamaa wunu peeyaa see see mokoo Kristus Waa miya inii mée epa kaa Waa ekaato mée yaekegataata. Kisee kemaata ikii miya mée epa see dimii mee kaa umiwoo, toowoo taai. Yoh 15:12-13, Gal 2:20, 1Yoh 2:6

3 Ikii ko Ogatamee me daamaa wa too kiwigintaata bagee kemaata tobaaka, otoopa api doonaa, paayogaa doonaa, kepe ou, agiyoo ou, kisee dimii kuwa uduma ikii peenaa ma se dogaai. Mée me ikii kisee dimii agoo see bagee yuwa see kidiino ko pedeo. 4 Bedaa yiino ego weda kiyaa menaa ma, dimi taa see bagee me wegaa-wegaa menaa ma, otoopa ebaa-ebaa see menaa ma kuwa uduma ikii peenaa ma wegaano ko pedeo. Kuwa menaa wegaakee se kiya Ogatamee kiiboo, paamee see menaa maamaa wegagee taai. 5 Ikii daamaa nekeenii: okoo tobaaka, otoopa aadoona-maadoona, kepe ou, agiyoo ou, kisee bagee kuwa okoo uduma Kristus ma, Ogatamee ma Ekea too ebo mée eetootagea naagoo okoo se tootagea, masiyaa agiyoo kuwa miya peenaa ma se masiitagea. Mee kepe ou, agiyoo ou see dimii mee ko makapaa ogatamee kaa dimi maayaa mokoo yoka daamaa nekeenii. 1Kor 6:9-10, Gal 5:19-21

6 Mée me otoopa imi taa see menaa kuwa me ikii kideebaa taapea yoka gaai. Okoo Ogatamee Wa me menaa si yayeetaa see bagee yuwa kemaata Wa me kagoo kuwa okoo kaa yamiyaatagi. 7 Kisee kaata kemaata okoo me ukuwanaa, peenaa siyaa yuwa kuwa ikii ma epo enaataa se. 8 Mikee, ikii miya idukaa digiyoo yiba toogee seta kiya eto ko ikii Tuhan ma dimi aagadi-maagadi naadi kaama awee yaato peanta toogee see bagee yuwa. Ikii kisee bagee kemaata awee yaato too daamaa umiwoo, toowoo taai. Yoh 12:35, Kol 1:12-14 9 Awee yaato umiwoo, toowoo naadi kaama ekadaa siyaa poo kuwa ko daamaa, topoo, mikee menaa doodoo ukuwayaa agiyoo-pagiyoo kuwa. 10 Ikii Tuhan me ede kiyaa agiyoo kuwa maagiyoo, maagiyoo, kisee daamaa gaagaa naadi ipi kaai. Rom 12:2 11 Okoo digiyoo yaato otoopa ukuwagee see bagee kuwa okoo daamaa poo se ekayaa yoka ikii miya okoo ma epo enaataa se ukuwaai. Kuwa agiyoo kuwa pedeo too ii see kuwa nekeensi naadi kuwa agiyoo awee da kaa kiyaai. 12 Okoo me koogo ukuwagee siyaa agiyoo kisee-kisee see menaa kuwa aasee taano pedeo. Asiyaa mée to me ego weda kaapa naadi se wegayaa. 13 Kiya agoo da wogaamaata kaama kuwa okoo me ukuwayaa, peeyaa agiyoo kuwa uduma awee da kaa kiyaa. Yoh 3:19-20 14 Kuwa me kemaata wegayaa menaa ena ko kisee:

15 Kisee kemaata ikii me umiino, toono kuwa ipiipi dii. Dimi ewo see bagee yuwa see see mokoo se kiya dimi ipi see bagee mokoo daamaa umiwoo, toowoo taai. 16 Eto mee begaa kaa pedeo dimii, pedeo menaa maamaa eebaa kedaaka yoka ikii daamaa agiyoo ukuwaano etaa da agoo kiyaa kaboo daamaa agiyoo ukuwaai. 17 Ikii dimi taa see bagee yuwa see see se kiya Tuhan Wa me kisee daamaa, kisee ede see gaayaa agiyoo kuwa daamaa ipi kaai, daamaa nekeenii. 18 Ikii anggur poo uwoo noomaata kaama boomaga-baamaga see se. Kuwa uwoo kuwa me pedeo ou dimii mee ebo kedaa siyaa yoka kuwa se kiya Roh mee ikii yiba pudii siyaai.† Mena nekeeniino yaato ko mena kegaa ena ma agoo, mee ko Roh me ikii pudii siyaai. Mee ko Roh me Ogatamee Wa me iyee, Wa me pesee, Wa yiba agoo kiyaa yuwa kuwa ikii yiba miya pudii kisiyaasi naadi menaa mee. 19 Ikii kisee daamaa pesee kikiyaabuu siwoo naadi kaama mazmur menaa ma, yaapaagee see menaa ma, Roh me inii yaayaasi naadi mée manta menaa kuwa ma aawegaa siwoo taai. Esee dimi menaa da kaa maamaa ede ma, ede ma Tuhan paagoo yaayaa segee siwoo taai. 20 Agiyoo-pagiyoo kuwa uduma kaa inii epoo Mée Tuhan Yesus Kristus Wa ekaa yiba Nagamee Ogatamee paagoo kiiboo, paamee see menaa se daata kisee too asegee siwoo taai. 21 Bedaa ikii Kristus Wa too ebo, Wa too weda see dimii mee kaa ikii ekaato dimi peedi aaekee siwoo taai.

22 Ikii api yuwa gaayu ko ikii Tuhan paagoo ekaato dimi peedi ekee segee siyaa see see paimee paagoo miya ekaato dimi peedi ekee taai. 1Pet 3:1-6 23 Mee ko Kristus mee Waa mikee gaayaa bagee yuwa uduma me mumoo to see see paimee miya wa me apii to me mumoo to. Kristus Waa mikee gaayaa bagee kuwa ko Wa me maa to mokoo, bedaa Waa ko okoo daba daagimaa peeyaano Mée. 24 Kisee kemaata Kristus mikee gaayaa bagee yuwa okoo Wa paagoo ekaato dimi peedi ekee segee see see mokoo ikii api yuwa miya agiyoo-pagiyoo kuwa uduma yiba a me pai to paagoo ekaato dimi peedi ekee segee taai.

25 Ikii pai yuwa gaayu ko ikii me apii epa kaai. Kristus me Waa mikee gaata bagee yuwa epa kaa Waa ekaato okoo kaa yaekegataata mokoo see see ikii me apii miya daamaa epa kaai. Kol 3:19, 1Pet 3:7 26 Mee ko Kristus Wa me menaa kuwa me inii daamaa uwo mée yawetogekomeeta kaama inii daamaa wa too mée wigintaata. 27 Inii Waa mikee gaata bagee yuwa kisee daamaa mée wigintaata kaama inii esee daamaa too, pedeo taa, mena taa, kisee ena ma taa kaa Wa paagoo mée miyaano see naadi Waa ekaato mée yaekegataata. Why 19:7‡ Yesus mikee gaata bagee uduma ko Wa me apii to mokoo. Mée me api goeyaa-goeyaa see see mokoo Yesus me inii pedeo taa kaa Wa paagoo mée miyaano see naadi Waa ekaato inii kaa mée yaekegataata kaama mée yaboota. Paimee miya kisee wa me apii to esee epa kaa waa ekaato wa me apii to kaa yaekegataasi naadi ebea-ebea menaa mee. 28 Mee mokoo pai yuwa miya kisee. Paimee me waa ekaato maa to epa kiwoo, deewoo siyaa see see wa me apii to mee miya epa kaano gaano pedeo. Wa me apii to epa kiyaa see mée to mee ko waa ekaato miya epa kiyaa mokoo. 29 Mikee, waa ekaato maa to be see bagee ena ma taa. Waa ekaato maa to mee daamaa munitaa, daamaa deetaa segee siyaa, Kristus me Waa mikee gaayaa bagee yuwa kaa daamaa yaukuwagee siyaa see see. 30 Mee ko inii Wa me maa to kaa takumeta agiyoo mokoo bagee kemaata Wa me inii kisee daamaa mée yaukuwagee siwoo see. 31 Idukaa ebeamaata menaa ena mee ko kisee: "Kuwa me kemaata paayogaa gakata waataagi ma, wabaayo ma kuwa ekeata kaama wa me goeyaa apii to ma ekea bogaa má ena too too mokoo kiyaa, kisee too umiwoo, toowoo siyaa" see menaa ebeamaata. Kej 2:24 32 Mee menaa mee ko ebo menaa, idukaa kaama manii to awee da kaa kiyaano taa menaa. Mena manii to mee ko inii Kristus mikee gaayaa bagee yuwa kaa menaa, Waa ma aagadi-maagadi naadi toowoo siyaa menaa mee. Anii kuwa kaa menaa kisetaaka. 33 Bedaa mee menaa mee ikii ekea bogaa kaa miya kisetaaka. Mee ko ikii mée gakata aa ekaato epa kiwoo siyaa see see mokoo a me apii to mee miya kisee epa kiwoo taai. Bedaa apii to mee miya wa me pai to ebo ekee siwoo taai naadi kisega.