116
God gumazir mamɨn akurazɨ, an a mɨnabi
1 Ikiavɨra Itir God nan dɨmdiaba ko azangsɨziba barasi.
Kamaghɨn kɨ bar a gifonge.
2 Onger Akaba 17:6; 40:1Dughiaba bar a nan azangsɨziba baraghavɨra iti,
kamaghɨn dughiar kɨ angamɨra itir kam,
kɨ a ko mɨkɨmvɨra ikiam.
3 Onger Akaba 18:4-6Kɨ faragha aremeghasava amima,
ovevem benimɨn mɨn na ikezɨ kɨ iti.
Kɨ Gumazamizir Oveaghuezibar Nguibam gɨnɨghnɨgha atiatia
egha navim bar osemeghavɨra iti.
4 Kɨ Ikiavɨra Itir Godɨn ziam dɨbora a mɨgɨa ghaze,
“O Ikiavɨra Itir God, kɨ nɨ gaghori,
nɨ nan akuragh ua na inigh, puvatɨghtɨ kɨ ovegham!”
5 Guizbangɨra, Ikiavɨra Itir God zuraram en kuarkuva en akurvasi,
egha a bar dera.
En God, an apangkuvim itir God.
6 Gumazamizir uarira uarir akurvaghamin gavgaviba puvatɨziba,
Ikiavɨra Itir God men akurvasi.
Kamaghɨra kɨ faragha gavgaviba bar puvatɨzɨ,
osɨmtɨziba na gasɨghasɨghasava amima, a nan akura.
7 Kɨ fo, Ikiavɨra Itir God bar deragha na gami.
Kamaghɨn, kɨ datɨrɨghɨn navir amɨrizimɨn ikɨva avughsɨ ikiam.
8 O Ikiavɨra Itir God, nɨ nan akurazɨ, kɨ aremezir puvatɨ.
Nɨ nan temeriba adɨsi.
Egha na geghuvima kɨ irɨzir puvatɨ.
9 Kɨ angamɨra itir dughiamɨn,
kɨ zurara Ikiavɨra Itir God ko daruam.
10 2 Korin 4:13Kɨ faragha ghaze,
“Osɨmtɨzir ekiam na avaragha na dɨkabɨraghasava ami.”
Ezɨ dughiar kamɨn kɨ nɨghnɨzir gavgavim Ikiavɨra Itir Godɨn ikiavɨra ikia kamaghɨn mɨgei.
11 Kɨ dughiar kamɨn puv atiatia bar osemegha ghaze,
“Kɨ nɨghnɨzir gavgavim gumazitamɨn ikian kogham.
Kɨ nɨghnɨzir gavgavim Ikiavɨra Itir Godra ikiam.”
12 Ikiavɨra Itir God bar deravɨra na gami.
Eghtɨ kɨ ua bizir tizimrama a danɨngam?
13 Kɨ ti wainɨn kavɨn tam a danigham,
eghtɨ ofan kam kamaghɨn akagh suam,
Ikiavɨra Itir God ua na ini.
A ua na inizir bizir kam bagh
kɨ an ziamɨn dɨmɨva a mɨnamam.
14 An gumazamiziba izɨ uari akuvamin dughiam,
kɨ a koma amizir Akar Dɨkɨrɨzir Gavgavir kam, kɨ a damuam.
15 Onger Akaba 72:14Ikiavɨra Itir God ua bagha inabagha bar ifongezir gumazitam aremegham,
eghtɨ an damazimɨn gumazir kamɨn ovevem, bar bizir ekiamɨn mɨn ikiam.
16 O Ikiavɨra Itir God, kɨ nɨn ingangarir gumazim.
Nan amebam faragha nɨn ingangarir amizimɨn ike,
ezɨ datɨrɨghɨn kɨ nɨn ingangarir gumazimɨn ikia
egha nɨn ingangarim gami.
Ezɨ nɨ benir na ikeziba fɨrizɨ
kɨ datɨrɨghɨn fɨriaghɨrɨ.
17 Kɨ nɨ mɨnabɨsɨ nɨ bagh ofa damuam,
egh nɨn ziamɨn dɨmɨva a fam.
18 Kɨ faragha nɨ koma akar dɨkɨrɨzim gami.
Kɨ datɨrɨghɨn Akar Dɨkɨrɨzir Gavgavir kamɨn gɨn mangɨ
nɨn gumazamizibar damazibar anekagham.
19 O Ikiavɨra Itir God, kɨ Jerusalemɨn nguibamɨn mangɨ,
nɨn Dɨpenimɨn aven ofa damuam.
Aleluia!
E Ikiavɨra Itir Godɨn ziam fam!