4
Satan Itouo Yesu
(Maka 1:12-13; Luka 4:1-13)
1 Motong la Maro Amunu Silene ipasongosongo Yesu be ila pang ye ni sorrakene atu, a be nen ngan la tool kuto mai kidi so sadi itoua.* Ngan tool kuto mai kidi so sadi tani, in la Satan i. 2 Ngan la Yesu ya taleu iyepe ye ni tani nga, ngan isapariuu le ikan so tiap ye ke le bong sangaul pai le pitolo welewele. 3 Motong la tool dook tiap ke touanga i, in man pombe pang ye a iwete panga nen, “Ai, be ong i Maro natunu moolmool nga, ngan kuwete a pat nga tiportak le tiyei porong a kon.”
4 Bong ngan Yesu iraua betanga ki nen, “Rau ke Maro iwete nen, ‘Porong leu la be itoko di tooltool ye yepongo kidi, in tiap, bong betanga le imot yo ipa ye Maro koonoo nga, ngan la itoko di tooltool ye yepongo kidi nga.’✡ Ger 8:3 ”
5 Motong la tool kuto mai kidi so sadi tani in ikaua Yesu a yaru tilo ye malala mison ke Maro yo Yerusalem i, a lo ipatokode le ikodo bareme mai ke sungunu pono meneng ete ni, inbe iwete panga nen. Iyei ne, 6 “Be ong i Maro natunu moolmool nga, ngan kupas le kudu tana ni, yesoo Rau ke Maro iwete nen, ‘Ole iwanga di bangabangana ki pong a tisipong ye baedi, a be nen ngan pat isolo kem katene be.’✡ Rau ke Woungu 91:11-12”
7 Bong ngan Yesu iraua betanga ki nen, “Rau ke Maro iwete lapau nen, ‘Kin kutouo Maro yo Tool Mai kiong, in be.’✡ Ger 6:16 ”
8 Motong la tool kuto mai kidi so sadi tani in ikaua Yesu mulu a yaru tilo kawal kutono meneng ete ni, a lo ipatnai malala le so matana matana ke tana mai i le imot yo dook mata nga, ngan panga. 9 Motong la iwete panga nen, “Kumata be kugun turum le du damom toko tana, inbe kusung pau nga, ngan ole akap so nga le imot pong.”
10 Bong ngan Yesu iraua betanga ki nen, “Satan, kukoo yau! Yesoo, Rau ke Maro iwete nen, ‘Kusung pang Maro yo Tool Mai kiong i, inbe kuraua panga ya taleu.’✡ Ger 6:13 ”
11 Yesu iwete nen pang tool kuto mai kidi so sadi tani a ikoo ye, motong la di bangabangana ke Maro tisi a si tiloni.
Yesu Ipamaditi Urata Ki Tana Mai Galili
(Maka 1:14-15; Luka 4:14-15)
12 Ye kene yo Yesu ilongo bingi ke Yowan yo titaru lo rumu dook tiap kidi talnga dikidiki lono ye in nga, le nga imulu a ilo pang tana mai Galili. 13 Ilo, ngan le iyege malala Nasaret, inbe la iyepe ye malala mai yo ene Kapenam i. Ngan malala mai Kapenam tani in iken potai pang ye ran Galili gigini, ye tana ke di rara kidi Sebulen le Naptali. 14 Ngan ye dada tani yo Yesu iyeii nen i, in le iyeie betanga ke Maro koonoo Esai yo iweta in le kanono pombe. Ngan Esai tani in iyei ne,
15 “Ang di rara ke Sebulen le Naptali nga kalongo.
Ang ngan di tooltool yo kayepe pang ke tiek du nga,
inbe ang ngan di tooltool yo kayepe potai pang ye ran Yodan koonoo kapala nga,
inbe ang ngan di tooltool yo kayepe ye tana mai Galili ye ni yo di tooltool yo tipa ye di rara kidi Yuda tiap ngan tiyepe ye i.
16 Di tooltool kiang yo tiyepe todo lono nga, ngan tikamata sul maiyoko.
Inbe di tooltool kiang yo todo mai ke matenge iduk di nga, ngan sul tani in ilangarai di lapau.”✡ Esai 9:1-2
17 Ye kene tani in Yesu ipamaditi urata ki ke be iwetewete bingi dook mata ke Maro pang di tooltool. Ngan le iwete pang di nen, “Kaportak lomim, yesoo mooloo tiap, inbe dada yo Maro be matan kala di tooltool ki ye i, in ole si pombe mallangana.”
Yesu Ikiu Di Tooltool Pai Ke Yoosoongoo
(Maka 1:16-20; Luka 5:1-11)
18 Motong la Yesu ipelele ran koonoo Galili a ila, ngan ikamata di tooltool ru, yaru ngan taidi le toodi. Ngan atu, in ene la Simon i, inbe tiwete ene san ye Pita, in iye taini yo Antares i. Yaru ngan tikatte pu kidi du ran lono a be tikap i ye, yesoo di ngan tiyei urata ye kaungu i be tiyawar a tikap pat ye. 19 Bong ngan Yesu ipuske di nga, le nga iwete pang di nen, “Suru nga, kaman katoo au. Ang ngan di tooltool ke kaungu i, bong ole apatomonai ang ye urata ke kaungu di tooltool.” 20 Yeisa be iwete pang di nen, ngan le pattu leu, inbe yaru tiyege pu kidi sila ikino, inbe titoo a tiye tila.
21 Yesu iye di suru tina ngan tipa kasin a tila, inbe ikamata di tooltool ru mulu, ngan taidi le toodi lapau. Di tooltool ru tina, ngan atu ene la Yemis yo Sebedi natunu i, in iye taini Yowan. Di ngan tiye tamadi Sebedi tiyepe ookoo pono kidi a tikarata pu kidi, inbe Yesu ikamata di le nga koonoo pang di be titoo lapau. 22 Yeisa be yaru tilongo tina yo koonoo pang di nga, ngan le pattu leu, inbe tiyege tamadi sila iyepe ye ookoo kidi tani, inbe yaru timadit a titoo Yesu a tila.
Yesu Ikarata Di Tooltool Alunu Yo Matamatenge Ikap Di Nga
(Luka 6:17-19)
23 Yesu ila ipa ye malala kapala ke tana mai Galili in le imot a ipatomonai di tooltool ye rumu kidi Yuda ke gaongo in lono, inbe iwetewete bingi dook mata pang di tooltool ye dada yo Maro be matan kala di tooltool ki ye i. Inbe ikarata di tooltool yo matamatenge matana matana ikap di nga, ngan le tinidi dook mata mulu. 24 Ngan ye urata tina yo Yesu iyei nen nga, ngan bingi ki idada a iwakaia tana mai Siria in le imot a tilonga, le nga tikap di tooltool yo matamatenge matana matana ikap di ngan pang ye Yesu a be man iyei di le tinidi dook mata mulu. Le nga di tooltool yo tinidi massingi mai mata nga, inbe di tooltool yo so sadi idiwidiwi di nga, inbe di tooltool yo matadi taltalai ngan timol du tana a titangarur nga, inbe di tooltool yo tikap rama nga, ngan timan pang ye Yesu, inbe iyei di le tinidi dook mata mulu. 25 Ngan tina tilongo bingi ke Yesu yo iyei urata nen nga, le nga di tooltool alunu le alunu san tipa ke Galili, inbe ke Dekapolis,† Ni tani yo ene Dekapolis i, in lono ki ben Malala Maimai Sangaul. inbe ke Yerusalem le tana mai Yudia, inbe di tooltool kapala tipa ke malala le imot yo iken ke ran Yodan koonoo kapala nga, ngan di le imot la tipa a titoo Yesu nga.