1 Ngan lo medana kiidi tani yo tataru pang Maro i, in dada tani yo be iwetidi ye tooltool noonoonoo ye matana i. Ngan nen le nookoot nga idi ngan tayepe ben koi ki mulu tiap, bong taye tagauagaua a tayepe ye lo silene dook mata. Ngan tayepe dook mata nen, yesoo Tool Mai kiidi Yesu Kirisi, iyei urata be ilonidi ye. 2 Ngan ye urata tani yo Kirisi iyeii i, in idi nga ke be tatara lodo medana pang Maro nen, be ole iyei dada dook mata paidi. Le moolmool, idi nga takodo le tamede ye lo medana kiidi yo tataru panga i. Inbe lod ponana, yesoo tatar matada a tanam be Maro ikau idi be lo taye tayepe ye nunngana. 3 Ngan nen leu tiap, bong lod ponana ye kene yo tasolo urata moonoo ke masngana ye in lapau. Yesoo, lod galanga nen, ye kene yo tasolo urata moonoo ke masngana ye in nga, ngan be nen a ipamedidi ye dada yo be takodo le tamede a tasolo urata moonoo ye i. 4 Inbe lod galanga nen, kumata be takodo le tamede be tasolo urata moonoo le lo imot nga, ngan ole ilonidi le idi nga tayei ben di tooltool moolmool yo Maro itouo di koot nga. Ngan kumata be tayepe le idi nga tayei ben di tooltool moolmool yo Maro itouo di koot nga, ngan ole iyei idi le tatar matada a tanam ye so dook mata yo be ikap paidi nga. 5 Inbe idi sema tooltool yo tatar matada a tanam ye so tina nga, ngan tanam sokorai tiap, yesoo Maro ikaua Amunu Silene paidi a iyepe lodo. Inbe ipagalanga lodo le lod galanga nen, Maro lono paidi mai san.

6 Le kakamata, muku ngan idi nga taukada gurana yo be talonidi ye nga. Bong ye lal yo Maro itaru i, motong la Kirisi isi imata a be nen ngan ilonidi tooltool yo ke yeingi noonoo nga. 7 Ngan ang nga lomim belei, be idi nga tool sa ole ke be imata a be nen ngan ilono tool yo noonoonoo i, too? Tiap! Moolmool, kumata be tool in tool dook mata nga, ngan tool sa o ke be iwete be ya in itattadai tiap le ole imata a be iloni. 8 Bong Maro ipatnaia lono yo paidi mai san, in mallangana nen. Ye kene yo idi nga tayei dada dook tiap ke noonoo ye in nga, ngan iwanga Kirisi a si imata be ilonidi.

9 Ngan nanga, Maro iwetidi ye tooltool noonoonoo nga ye rara ke Kirisi yo imati ke kai palasingi kaini i. Le idi nga lod galanga nen, Kirisi ole ikau idi a ipamulidi ye kate malmal ke Maro yo be pombe pang di tooltool ke yeingi noonoo i, in lapau. 10 Le kakamata, muku ngan idi nga tayei ben koi ke Maro, bong ye matenge ke Natunu, ngan dada ke koi yo iken kataunu kiidi taye Maro in imot, inbe tagauagaua dook mata. Ngan tina yo nen nga, ngan la nookoot nga Natunu tani yo imadit mulu a iyepe matana rerene le taukan motingi i, in ya la be ole ipamulidi ye so dook tiap yo be igarungidi i, in lapau. 11 Ngan ye dada yo nen ngan leu la be lod ponana ye, ngan tiap, bong lod ponana pang Maro ye so le imot yo iyei paidi ye Tool Mai kiidi Yesu Kirisi nga. Yesoo, ya in imata a ilonidi le dada ke koi yo iken kataunu kiidi taye Maro in imot oo, inbe taye tagauagaua dook mata.

12 Ngan nanga, muku ngan tool ataleu la iyei noonoo i, ngan le iso dada pang noonoo be ingaua ni mai i le imot. Inbe matenge pombe ye noonoo ki, ngan nen le di tooltool ke ni mai i le imot tiyepe la gurana ke matenge parmana, yesoo di le imot tiyei noonoo. 13 Ngan ye kene yo Maro ikap ger ki pang Mose tiao nga, ngan di tooltool le imot tiyei noonoo. Bong noonoo kidi tina ngan Maro iwodo tiap, yesoo ye kene tani in ngan ger yo be ipapos di ye noonoo kidi, ngan siap. 14 Bong lod galanga nen, ye lal ke Atam le ise ye lal ke Mose nga, ngan matenge igarung di tooltool nga le imot. Ngan di tooltool tina ngan tikapsap ye betanga ke Maro dawa ben Atam, in tiap, bong le matenge yo pombe ye noonoo ke Atam i, in igarung di lapau. Ngan Atam tani in inanpootoo tool yo be pang dama ni ngan pombe i. 15 Bong so yo Maro ikauu sokorai paidi ye lo ponana ki i, in dawa ben so yo Atam ikapsap a pombe ye, in tiap. Yesoo, Atam in tool ataleu, bong ikapsap ye betanga ke Maro, ngan nen le dada yo di tooltool alunu timmata ye i, in pombe ye. Bong tool ataleu Yesu Kirisi yo lono paidi mai san i, in dada tani yo Maro ikap sokoraia so dook mata paidi ye lo ponana ki i. Le so dook mata ke Maro yo pombe ye Yesu Kirisi i, in mai san le illoso so yo pombe ye Atam i. 16 Ngan ole awete pang mulu nen, so yo Maro ikauu sokorai paidi ye lo ponana ki i, in dawa ben so yo pombe ye noonoo ke tool ataleu, in tiap. Yesoo, ye noonoo ataleu yo ke Atam i, in Maro ikarata betanga kidi tooltool a be iyemenai di le imot. Bong ye kene yo di tooltool tiyei noonoo alunu nga, ngan Maro lono paidi a iyei dada dook mata paidi. Ngan nen le ye so dook mata yo ikauu sokorai paidi ye lo ponana ki i, in iyei idi le tayei ben di tooltool noonoonoo ye matana. 17 Ngan tina tool ataleu ikapsap ye noonoo nga, ngan le matenge pombe a iyei mai pang di tooltool nga le imot a igarung di. Bong Maro lono paidi a iyei dada dook mata san pang idi tooltool alunu ye tool ataleu yo Yesu Kirisi i. Inbe ye so dook mata yo ikauu sokorai paidi ye lo ponana ki i, in iyei idi le tayei ben di tooltool noonoonoo ye matana. Le moolmool, idi nga taye Kirisi ole tayepe ye malala ki yo ete ni, a tayei tooltool kuto maimai ye lal nga le imot.

18 Ngan nanga, ye tool ataleu yo ikapsap i, in la le Maro iwete be iyemenai di tooltool nga le imot ye i. Inbe gaongo leu, ye tool ataleu yo itoo dada dook mata noonoonoo ke Maro i, in la le Maro iyei idi le tayei tooltool noonoonoo ye matana, a ikaua yepongo dook mata yo taukan motingi, in paidi le imot ye i. 19 Le moolmool, ye dada dook tiap ke tool ataleu yo isak noonoongoo in nga, ngan le di tooltool alunu tiyei ben di ngan tooltool ke yeingi noonoo. Inbe gaongo leu, ye dada dook mata ke tool ataleu yo ilongo betanga a itoo in nga, ngan le di tooltool alunu la Maro iwete di be di ngan tooltool noonoonoo nga.

20 Ngan ger ke Maro yo ikap pang Mose nga, ngan be nen a ipapos noonoo kidi tooltool le lo iken mallangana. Bong ye kene yo di tooltool tiyei noonoo alunu le alunu san a iken mallangana nga, ngan Maro lono pang di a iyei dada dook mata pang di mai le mai san lapau. 21 Muku ngan dada dook tiap yo ke noonoo i, in iyei mai pang di tooltool le imot a be irau di le timmata. Bong nookoot nga dada dook mata yo be Maro lono paidi a iyei urata dook mata paidi ye i, in iyei mai paidi. Ngan nen le ya in ole ikaua yepongo dook mata yo taukan motingi i, in paidi, ye Tool Mai kiidi Yesu Kirisi, yo iyei idi le tayepe ben di tooltool noonoonoo ye Maro matana i.