1 Ang ngan Kirisi iyepe yang le ipamede lomim le imede, too? Inbe Kirisi lono pang a iyei ang le kayepe ye lo silene, too? Inbe Maro Amunu Silene iyepe lomim, too? Inbe Kirisi lon mulumulu yang, too? 2 Kumata le be nen nga, ngan kagaua lomim le atu, inbe katoo dada ataleu yo be lomim mai san pang di diemim kapala ye i, inbe kagauagaua dook mata ye urata tina yo lomim kap be kayei nga. Ngan kumata le be katoo dada yo nen nga, ngan ole lok ponana le lok ponana mai san. 3 Nen le kin ang tapmim kakapye be kayitmak emim le ilo ete ye di tooltool kapala be. Inbe kin koomim payitang ye dada kiang yo kayei, nga be. Bong ang tapmim karautoo ang le kadu lopo, inbe lomim tar di diemim be di ngan la dada kidi yo tiyei ngan dook mata le illosang nga. 4 Inbe kin matamim kala so kiang ang tapmim yo be ilonang ngan leu be, bong be nen ngan matamim kala so kidi diemim kapala yo be ilon di ye yepongo kidi, ngan lapau.

5 Ngan dada kiang yo be katoka le kaparama i, in ole dawa ben ke Yesu Kirisi yo itoka i. 6 Ya in dawa ben Maro, bong lono be iparama nene yo be iyepe le dawa ben Maro, in tiap. 7 Le iyege nene, inbe si iyei tool moolmool a iyepe tana dawa ben tool ke kapraingi leu. 8 Ngan iyepe ben idi tooltool, bong ya taunu irautoo le idu lopo, inbe itoo Maro lono le imot le lo imata. Moolmool, ya in itoo Maro lono le ilo ye kene yo tipatota lo kai palasingi kaini a imata ye i. 9 Ngan la le Maro iyitmaki le ilo ete le illos di tooltool kapala nga le imot, inbe iyeie ene le illos di tooltool kapala nga le imot edi lapau. 10 Inbe Maro iyitmaka Yesu ene le ilo ete nga, ngan be nen a so le imot yo ikarata di a tiyepe malala ki, inbe tiyepe tana pono le tana parmana nga, ngan di le imot tigun turudi du dama ke Yesu inbe tiyitmaki. 11 Ngan iyitmaki nen, a be nen ngan so tina le imot tikamata, inbe tiwete nen be Yesu Kirisi in la Tool Mai i. Le ye dada tani in nga, ngan ole tiyitmaka Tamada Maro in ene lapau.

12 Ang di tooltool kiau yo lok pang mai san nga, muku ngan ye kene yo ayang tayepe ye in nga, ngan katoo betanga kiau dook mata. Le nookoot nga ye kene yo ayepe manga mooloo yang nga, ngan kin guramim a be nen ngan katoo betanga kiau ngan dook mata le imot. Maro ikau ang a ipamulang ye so dook tiap yo be igarungang in oo, le katattadaia Maro a katangarur, inbe kayei urata yo lono be kayei nga. 13 Ngan ang ngan ke be kayei urata nen, yesoo kanakana ngan Maro ya taunu ipamadit lomim a be nen ngan kayei urata ki tina yo lono be kayei nga. Inbe ya in ipamedang a be nen ngan katoo dada dook mata yo ki nga.

14 Nen le so tina le imot yo be kayei nga, ngan ole kayepe dook, inbe kayei. Bong kin kawete gogo betanga, too kaparsu ye betanga be. 15 Katoo dada dook mata nen, a be nen ngan lomim iken galangana dook mata, inbe kayepe le taukamim noonoo ye Maro matana. Inbe ole kayepe ben ang ngan Maro di natunu yo taukadi busunu nga. Le nookoot nga ye kene yo kayepe kataunu kidi tooltool ke yeingi dada dook tiap ke noonoo ye in nga, ngan nunngamim ole ilangaraia ni dawa ben kanpitiki ikan lang katene nga. 16 Le kin kawetewete pang di tooltool ye bingi dook mata ke yepongo dook mata tani yo taukan motingi i. Ngan kumata le be kayei nen nga, ngan ye lal yo Kirisi be imulu a isi ye in nga, ngan ole lok ponana le lok ponana yang mai san. Yesoo, lok galanga nen, urata mai yo ayei yang nga sa yo be taukan kanono, ngan tiap. 17 Le kakamata, lomim medana yo kataru pang Yesu le ipa ye urata ki yo kayei nga, ngan dawa ben so ke paroranga pang Maro. Le kumata be tiraumatau a amata, ngan dook mata, yesoo rara kiau yo be imati i, in ole dawa ben ooroo wain surunu yo tool ke paroranga so be itioo lo ye paroranga kiang i. Nen le au i lok dook mata, inbe lok ponana yang mai san. 18 Ngan nen le dook mata be ang ngan lomim dook mata, inbe lomim ponana yau lapau.

19 Au atara lok le atu nen, be Tool Mai Yesu ole imalum pau a mooloo tiap, inbe awanga Timoti a imala pang yang. Ngan yo a le awanga a imala nga, ngan be nen a ang leu la be ipamedang ye kene yo iwete pang ye bingi kiau, nga tiap, bong be nen a au lapau ole ipamedau ye kene yo be imulu a iman ikaua bingi kiang pau ye i. 20 Ngan ni tool sa dawa ben Timoti i tiap. Ya in lon kaua urata moolmool ye dada yo be ilonang a be nen ngan yepongo kiang dook mata ye i. 21 Le ya in dawa ben di tooltool kapala nga tiap. Di ngan tinidi bese be tiyei urata kidi a be tilon di tapdi ye leu, bong tinidi bese be tiyei urata ke Yesu Kirisi, ngan tiap. 22 Bong Timoti in ya taunu ipatnaii pang a lomim galanga ye ben ya in iyei urata ke Tool Mai le dook mata. Nen le ang ngan lomim galanga ye nen, be ya in ilonau ye urata ke raingi bingi dook mata ke Yesu pang di tooltool dawa ben tool kase ilono tamana ye urata ki nga. 23 Le atara lok le atu nen, be ole akamata so sa be pombe pang yau muku ngan, lo ngan be awanga Timoti a imala pang yang palbe leu. 24 Inbe atara lok medana nen lapau, be Tool Mai ole ilonau le mooloo tiap, inbe au tauk ole mala akamatang lapau.

25 Bong lok kaua urata be dook mata ngan nen, be ole awanga Epaproditus a imulu pang yang a imala. Ngan ya in ek atu yo itara lono medana pang Yesu i, le amru amyei urata gaongo, inbe amru amyei urata dawa ben di tooltool ke patokongo nga le amye di koi ke bingi dook mata ampatoko. Inbe ya in tool tani yo muku ngan kawanga a iman pang yau be man ilonau ye so yo amaka ye nga. 26 Le ole awanga a imulu pang yang nga, yesoo ya in lono be le mala ikamatang pa. Inbe lon galanga be kalongo betanga ki yo matamatenge mai ikauu nga, le tina lon moo ye san. 27 Moolmool, ya in matamatenge ikauu le kasin leu be imata. Bong Maro lono panga inbe lono pau lapau, le iloni a tinini dook mata mulu. Ngan ye yo lono pau nga, ngan be nen a au Paulu asolo urata moonoo dook tiap sa le illos yo asolo nookoot nga be. 28 Ngan la lok be awanga a imala pang yang, a be mala kakamata mulu, ngan lomim ponana. Inbe au lapau o ke be lok moo mata tiap. 29-30 Le kumata be imala nga, ngan lomim ponana ye a kakauu ben ya in emim atu yo itara lono medana pang Tool Mai i. Yesoo, ya in iyei urata ke Kirisi, le kasin leu be imata. Inbe ya in lon rru ye yepongo ki ke tana i tiap, bong iraia tinini le imot be iyei urata yo kayawari be man iyei a ilonau ye nga. Le kalongo betanga ki a karaua panga, inbe pang di tooltool yo dook mata dawa ben ya ngan lapau.