1 Motong la Yesu isudungu kattenge betanga pang di tooltool maimai tina a iwete pang di mulu nen, 2 “Dada yo Maro be matan kala di tooltool ki ye i, in dawa ben tool yo iyei kuto mai pang tana mai atu i. Ngan tool tani in iyeie mailang mai atu ye kerenge ke natunu tamoto. 3 Ngan nen le iwanga di kapraingi ki be la tiwete pang di tooltool yo muku ngan itara betanga pang di be timan ye kerenge nga. Bong di kapraingi ki tina tila tiwete pang di, ngan tinidi booroomoo le lodi pang maningi tiap.

4 “Motong la iwanga di kapraingi ki kapala mulu a be tila, ngan iwete pang di nen, ‘Kala nga, ngan la kawete pang di tooltool yo atara betanga pang di ngan nen, be akarata so a dook oo. Inbe au i araumata bulumakau tamoto atu, inbe bulumakau kapala yo lodi welewele nga, ngan la araumata di inbe akum di a ime oo. Le kawete pang di a timan man taye di takana mailang ke kerenge i.’

5 “Di kapraingi ki tina tila tiwete pang di tooltool tina, bong lodi pang bangana ki tiap, le tikoo a tipa kidi kidi. Atu in idi pang kumu ki, inbe san in ila pang ye urata ki ke kaungu pat. 6 Inbe di kapala ngan timadit tina le tiparama di kapraingi ke tool mai tani, a tigarung di, inbe tiraumatamata di a timmata. 7 Tina tiyei nen nga, le tool tani yo iyei kuto mai pang tana mai i, in katen malmal a iwanga di tooltool ki ke patokongo a tila tiraumatamata di tooltool le imot yo tiraumatamata di kapraingi ki nga, inbe tidaunu malala mai kidi in a ei ikani.

8 “Motong la tool kuto mai tani in iwete pang di kapraingi ki nen, ‘Mailang ke kerenge i akarata a imot oo, bong di tooltool yo awanga pang di be timan ye nga, ngan ayeisa di ngan tooltool dook mata a man aye di amkani, bong tiap. 9 Le nookoot nga kala la kapa ye ni ke yawaringi so, le be kakamata di tooltool sa nga, ngan kawete pang di le imot a timan ye mailang ke kerenge i.’ 10 Motong la tila tipa ye ni ke yawaringi so a tipuske di tooltool yo dook mata nga inbe di tooltool yo dook tiap nga, ngan tiwete pang di le imot be tila ye mailang tani. Ngan nen le tilo tilo le rumu ke kaningi so in ipon ye di.

11 “Di tooltool tina timan a tilo ye ni tani, motong la tool mai tani iman a be lo ikamata di, ngan ikamata tool atu in isousou ye sousoungu ke kerenge tiap. 12 Le nga itoru nen, ‘Ai, tool kiau, nga yelei be kusousou ye sousoungu ke kerenge tiap, inbe kuse ni nga?’ Itoru nen, le nga tool tani isere betanga a sila ipalongo leu.

13 “Motong la tool kuto mai tani, in iwete pang di kapraingi ki nen, ‘Oo, kakap ooroo a kapau tool i kene le baene a kakatte du pang ni todo lono ke diki ni. Kakatte du ye ni yo be timassingi a titangtang inbe tikanen dongadi a iparrasa ye i.’ ”

14 Motong la Yesu iwete pang di tooltool tina nen, “Kalongo koot? Maro ikiu di tooltool alunu la be timan pang ye nga, bong ole alunu tiap yo ipootoo di panga nga, ngan di leu la be tilo ye nga.”

15 Di Paresi tiyege Yesu a tidu ke diki, motong la tigaua inbe tiraua betanga be titoua ye betanga sa. 16 Motong la tiwanga di galiudi tiye di tooltool pattu yo tikata suanga ye Erot nga, a tila pang ye. Tila, motong la tiwete panga nen, “Pannoongoo, am nga lomam galanga yong nen, be ong i kuwete betanga kiong nga, ngan moolmool le imot. Inbe kupatomonai di tooltool ye dada moolmool ke Maro le imot. Inbe ong i kutattadaia kam tooltool siap. Le kumata be kuwete pang di nga, ngan lom rru ye di be di tooltool belei, ngan tiap, bong ole kuwete betanga gaongo leu pang di. 17 Ngan nanga, ole kuwete pam ngan. Ong i lom belei? Nga dook mata be idi nga tatar pat pang tool kuto mai kidi Rom yo Sisa i, too tiap?”

18 Titoru nen, bong Yesu lon galanga ye dada dook tiap yo iken lodi a le titoru ye in oo. Le nga iyei ne, “Ang nga di tooltool ke kaplungunu sa! Nga yelei a kakapye be katou au nga? 19 Kakaua pat yo kanakana ngan tatar pang Sisa ngan atu a kapatnaii a akamata.” Motong la tikaua pat tina ngan atu pang ye. 20 Motong la itor di nen, “Sei kanningana inbe ene iken ye pat i nga?”

21 Ngan tiyei ne, “In Sisa.”

Motong la Yesu iwete pang di nen, “Aoo, ngan dook mata! Be so ke Sisa, ngan kakap pang Sisa. E so ke Maro, ngan kakap pang Maro.”

22 Ye kene yo tilongo betanga ke Yesu ye in nga, ngan le titakrai ye betanga ki. Le nga tiyege sila iyepe, inbe tikoo a tila.

23 Motong la ye ke tani ataleu in di Sedusi timan pang ye Yesu be man titoru. Ngan di Sedusi tina ngan di Yuda pattu yo tiwete be di tooltool timmata nga, ngan o ke be timadit mulu tiap. Le nga man titoro Yesu nen, 24 “Pannoongoo, muku ngan Mose iwete pam nen. Kumata le tool atu be ikere le rimana ipasuiu kan kase siap, inbe tamoto tani in imata nga, ngan taini ole ikoli a iyooloo tap ke toonoo, a be nen ngan garup tani in ipasui kase sa panga nga, ngan ole iseke rara ke toonoo tani in pang dama a ila. 25 Mose iwete paidi nen, bong amtorong, ole kuwete belei? Oo, tool atu in natunu tamoto limi be ru, ngan tiyepe yam. Ngan toodi yo mumuanga in ikere, ngan le rimana ipasui touo kan kase siao, inbe imata. Le iyege sila iyepe a taini yo itoo i, in iyooloo tap ke toonoo tani. 26 Bong taini tani iyooloo, ngan gaongo leu, taukan natunu go, inbe imata. Motong la taidi san yo tol kidi, in ikauu a iyooloo, ngan gaongo leu nen lapau. Ngan tiyei nen nen le du imot ye taidi kase yo limi be ru kidi i. 27 Motong la garup tani in ya lapau imata a itoo di nga. 28 Ngan nanga, kuwete pam ngan, ye lal yo be di tooltool matedi be timadit mulu ye in nga, ngan garup tani ole iyei sei rimana? Yesoo, di tamoto tina yo limi be ru nga, ngan di le imot tiyooloo garup tani oo.”

29 Motong la Yesu iraua betanga kidi nen, “Ang nga kawete gogomim, yesoo lomim galanga ye betanga yo iken ye Rau ke Maro, ngan tiap. Inbe lomim galanga ye gurana ke Maro, ngan tiap lapau. 30 Ye lal yo di tooltool matedi be timadit mulu ye in nga, ngan o ke be tikere mulu tiap. Di ngan ole tiyepe dawa ben di bangabangana ke Maro yo tiyepe ye malala ki ngo. 31 Bong ye di tooltool yo timmata lo ngan be timadit mulu nga, ngan ang nga o kakinkata betanga ke Maro yo iweta pang a iken ye rau, in tiap, too? Ngan betanga tani in iwete nen ye di sasa kiidi yo timmata koot nga, ngan nen, 32 ‘Au i Maro ke Apram ye Esaka inbe Yakop.’✡ Pamulenge 3:6 Le i Maro kidi tooltool yo timmata koot nga, ngan tiap, bong i Maro kidi tooltool yo tiyepe mauredi nga.”

33 Ye kene tani in di tooltool budanga mai la tilongo betanga ke Yesu nga, le nga titakrai ye patomonaingi ki.

34 Di Paresi tilongo be Yesu ikatkalakala dada ye di Sedusi ye betanga le tisere betanga nga, le nga di Paresi tina tigaua, inbe timan pang ye. 35 Motong la tool kidi Paresi tina ngan atu yo kuto mai ke ger ke Maro i, in imadit tina le be itouo Yesu ye betanga, le nga itoru. Iyei ne, 36 “Pannoongoo, soo ger ke Maro imuku le illos di ger kapala i?”

37 Motong la Yesu iraua torungu ki nen, “ ‘Lomim pang Maro yo Tool Mai kiang i, in mai san, inbe kagaua lomim le tinimim ipa ye lo galanga kiang le imot panga.’✡ Ger 6:5 38 Le i ger ataleu yo imuku inbe illos di ger kapala le imot i, in naii. 39 Inbe ger san yo itoo i, in nen. ‘Lom pang di diem mai san dawa ben yo ong taum lom pong mai san nga.’✡ Urata ke Paroranga So 19:18 40 Le awete pang nen, ger ke Maro le imot yo ikap pang Mose, inbe betanga yo di Maro koonoo tiwodo nga, ngan di le imot pudi nga igaua le iken ye ger ru leu tina nga.”

41 Di Paresi tina ngan tigauagaua a tiyepe go, inbe Yesu itor di nen, 42 “Ai, ang nga lomim tar belei ye Kirisi? Be in sei natunu?”

Ngan tiyei ne, “Ya in Dawiti natunu.”

43 Motong la Yesu iwete pang di. Iyei ne, “Nga yelei a Maro Amunu ipamaditi Dawiti lono a le ikiui Kirisi tani in ye Tool Mai nga? Kakamata, Dawiti in iwete nen,

46 Tina Yesu itor di nen nga, le sila tipalongo leu. Le tool sa mala be iwete a iraua betanga ki, ngan tiap. Ngan nen le ye kene tani in a ilo nga, ngan tool sa mala be itoro Yesu ye betanga sa mulu, ngan tiap lapau.