1 Motong la di tooltool maimai tina timadit a tikaua Yesu a tilo pang ye Pailot. 2 Tilo, motong la tipatokode dama ke Pailot, inbe timadit a tisopo koodi panga nen, “Am nga amkaua tool i, yesoo igarung di tooltool kiam lodi ye betanga ki yo iwete nga, le be titoo. Ngan ya in iwetekalam be kin amtar pat pang Sisa be, inbe iwete be ya in Kirisi, tool kuto mai yo be matan kalam am Yuda nga le imot i.”

3 Motong la Pailot itoru nen, “Oo kuwete, ong i la tool kuto mai yo matam kala di Yuda le imot i, too?”

Ngan Yesu iraua betanga ki nen, “E, dawa ben tina la kuwete koot nga.”

4 Motong la Pailot iwete pang di tooltool maimai ke paroranga so pang Maro nga, ngan tiye di tooltool malala mai tina ngan nen, “Au i apuske busunu sa yo tool i ikapsap ye, nga tiap.”

5 Bong ngan di tooltool tina ngan di le imot tiwete le koodi mede. Tiyei ne, “Tiap, ya in ipa le iwakaia tana mai Yudia i le imot, inbe igarung di tooltool lodi ye patomonaingi ki. Ngan ya in imadit ye urata nen ye tana mai Galili, ngan la le ipa so le se pombe ni nga.”

6 Pailot ilongo tina yo tiwete nen nga, le nga itor di nen, “Ai, ngan tool i ke Galili, too?” 7 Ye kene tani in Erot, yo iyei tool kuto mai pang Galili i, in iyepe Yerusalem lapau. Le nga yeisa be Pailot ilongo yo Yesu in tool ke Galili nga, motong la iwete a tikauu a ila pang ye Erot.

8 Ngan kene tani in tikaua Yesu a tila la Erot ikamata, ngan le lon ponana mai san, yesoo bong ilongo bingi ki mukot, le itar matana ye be ikamata pa, a be nen ngan ikamata mos yo be Yesu iyei nga. 9 Le nga Erot tani in itor kaiye Yesu ye torungu alunu san, bong ngan Yesu irau touo torungu ki tina, ngan siap. 10 Ngan di tooltool maimai ke paroranga so pang Maro, tiye di pannoongoo ke ger ke Maro nga, ngan tilo tikodo lapau, le nga tipamede betanga kidi a tikapye be tiwetewete Yesu a tipaposi ye busunu ki. 11 Motong la Erot iye di tooltool ki ke patokongo nga, ngan tipalele sere ye Yesu, inbe tikan paseme. Motong la tisousouu ye sousoungu sallinene dook mata ben ya tool kuto mai nga, inbe tikauu mulu a tila pang ye Pailot. 12 Ngan muku ngan Pailot iye Erot yaru ngan ben koi, bong ye kene tani in le yaru tigaua lodi dook mata san.

13 Tipamulu Yesu a ila, motong la Pailot tani in ikiui di tooltool maimai ke paroranga so pang Maro tiye di kuto maimai yo matadi kala di Yuda nga, inbe di tooltool malala mai tina ngan di le imot timan tigaua, 14 inbe iwete pang di nen, “Ang nga kakaua tool i a imulu a iman pang yau, inbe kawete be ya in igarung di tooltool lodi ye patomonaingi ki le be titoo. Bong muku ngan ang le imot kayepe, inbe atoru, ngan le apuske touo busunu sa yo ikapsap ye ben ang kawete nga tiap. 15 Inbe Erot lapau ipuske touo busunu ki siap, ngan la le ipamule a iman pang yidi nga. Le kakamata, tool i iyei touo so sa yo dook tiap ke be nen ngan imata ye, ngan tiap. 16-17 Le nga ole awete a tisaliti leu, inbe titaru a ila.”* Di tooltool kapala yo lodi galanga ye Rau ke Maro nga, ngan lodi tar be betanga damono kasin mulu la iken ye arono 16 le 17 nga. Ngan betanga tani in nen: Di Yuda tina nga, momo yo be titoo in nen, ye rai kanakana nga, ye lal ke Paskimoolooningi ke Maro nga, ngan ole Pailot tani be ipadu di tooltool tina yo tiyepe ye rumu dook tiap kidi talnga dikidiki lono nga, ngan atu a idu tana.

18 Bong ngan di tooltool tina ngan le imot oorootang a koodi nen, “Kuraumata tool in a imata! Inbe kupadu Barabas a isi pang yam.” 19 (Ngan Barabas tani in titaru lo iyepe rumu dook tiap kidi talnga dikidiki lono, yesoo ye kene in ipamaditi patokongo ye di tooltool kuto maimai ke malala mai tani in nga, ngan le iraumata tool atu a imata.)

20 Ngan Pailot lono be le ipadu Yesu a ila, le nga koonoo a isadaua di mulu. 21 Bong ngan di tooltool tina ngan le imot koodi tootoo nen, “Kupatota lo kai palasingi kaini a imata! Kupatota lo kai palasingi kaini a imata!”

22 Motong la Pailot iwete pang di mulu le patol ki nen, “Nga yelei? Soo dada dook tiap tool i ikapsap ye i? Au i apuske touo busunu ki sa yo ikapsap ye, a be nen ngan imata ye, ngan tiap. Le nga ole awete a tisaliti ye koro leu, inbe tiwulaii a ila.”

23 Bong ngan koodi tootoo a timangmang ye Yesu be tipatota lo kai palasingi kaini. Le nga di tooltool tina ngan di le imot oorootang le mai a tirautoo betanga ke Pailot. 24 Motong la Pailot tani ilongo betanga kidi tina yo tiwete nen nga, le nga imalum pang di be ole itoo betanga kidi. 25 Motong la Pailot ipadu tool talnga dikidiki tani yo tisoror di Rom ngan tipatoko a iraumata tool atu le imata a titaru lo rumu dook tiap kidi talnga dikidiki lono i, in a idu pang ye di. Inbe Pailot isukete Yesu la di tooltool ke patokongo baedi, a nen ngan la tiyeie soo so yo di tooltool tina ngan lodi be tiyeii panga i.

26 Di tooltool ke patokongo tina ngan tikaua Yesu a tila dada nga, ngan le la tikamata Simon ke malala mai Sairini yo ipa ke ni san a iman a be ilo pang malala mai tani in lono i. Motong la tiparama a tipaloko kai palasingi ke Yesu tani in lo poopoonoo, inbe tiwete panga be ikooroo a itoo Yesu. 27 Inbe di tooltool malala mai tiye di garup pattu yo tipododo katedi inbe titangtang a tititit ye nga, ngan titoo lapau.

28 Motong la Yesu ilalele pang ye di, inbe iwete pang di nen, “Di garup ke malala mai Yerusalem nga, kin katang yau be. Bong be nen nga, ngan ang tapmim katang yang inbe katang ye di natumim ngan lapau. 29 Ngan awete pang nen, yesoo bong lal dook tiap atu yo be pombe i, in ole masngana mai la be pombe pang yang a igarungang i. Ye kene yo so tani in pombe nga, ngan ole di tooltool tiwete nen, ‘Ang garup yo kapasui touo pitiap nga, inbe ang garup yo taukamim natumim be kapayin di nga, ngan lomim ponana, yesoo Maro iyei urata dook mata pang.’ 30 Inbe ye kene tani in nga, ngan ole di tooltool tiwete pang di kawal nen, ‘Atoo, kaduku a kamol si poomam!’ Inbe ole tiwete pang di arono yo bussukana nga, ngan nen, ‘Atoo, kamol a si kakaltoo am!’ 31 Ngan au i dawa ben kai yo lalana i, inbe la di tooltool be tiyeie dada dook tiap nen pau nga. E ang ngan dawa ben kai yo bodene i, bong be pang dama ni nga, ngan ole tiyeie soo so pang na?”

32 Ye kene tani yo tikaua Yesu be la tiraumate ye in nga, ngan le tikap di tooltool talnga dikidiki ru yo tiyei dada dook tiap nga, ngan lapau, la du tiraumata di le tipa ye Yesu nga. 33 Ngan tipa a tilo pombe ye ni yo tiwete ene ye Tool Kutono Ruruana i, motong la di tooltool ke patokongo tina nga tipatoto Yesu ilo kai palasingi kaini le ipa ye di tooltool talnga dikidiki ru tina. Le atu ituku ke Yesu madini oonoo, inbe san ke madini ngas. 34 Motong la tiyepe, inbe Yesu iyei ne, “Tamak, lom pang di a kugiri noonoo kidi, yesoo bong di nga lodi galanga dook tiap ngan la le tiyei dada nen nga.”

Motong la di tooltool ke patokongo tina ngan di tapdi tiparsu ye sousoungu le so ki, le nga tikatte madamada a be tipuske sema tooltool yo be ole tikap so ki tina nga.

35 Di tooltool malala mai tina ngan tikododo a matadi kenen ye Yesu, inbe di kuto maimai yo matadi kala di Yuda nga, ngan tiyei sere ye. Tiyei ne, “Kakamata, kanakana ngan ilon di tooltool kapala, e nga yelei be ya taunu iloni tiap nga? Kumata be ya ni Kirisi moolmool yo Maro ipootoo panga ya taunu be si ikap di tooltool ki a ipamulu di in nga, ngan matin nga le ya taunu iloni oo.”

36 Ngan di tooltool ke patokongo lapau tikan paseme Yesu a tiyei sere ye, inbe timan man tikap ooroo wain surunu yo malingene ngan panga. 37 Inbe tiyei ne, “Kumata le be ong in tool kuto mai kidi Yuda moolmool nga, ngan ong taum kulonong e too.”

38 Motong la tiwodo betanga pattu a tirauu lo ye kai palasingi ke Yesu kutono ke ete. Ngan betanga tina ngan tiwodo nen: I TOOL KUTO MAI YO MATAN KALA DI YUDA LE IMOT I.

39 Inbe di tooltool talnga dikidiki ru yo tituku di le tipa ye Yesu nga, ngan atu in ikan paseme Yesu, le nga iwete panga nen, “Ai, be kuwete ong in Kirisi nga, ngan ong taum kulonong, inbe kulonam amru lapau!”

40 Bong ngan tool talnga dikidiki tina san in ipasak pang ene tani a ilele, inbe iwete panga nen, “Ong in lapau kouo masngana gaongo leu ben ya i, e nga yelei, kutattadaia Maro tiap, too? 41 Aru nga moolmool, tiyemenai idi ye urata dook tiap kidi tina yo tayei, ngan kootoonoo. Bong tool i iyei touo dada sa dook tiap, ngan tiap.”

42 Motong la tool tani in iwete pang Yesu nen, “Yesu, kene yo be kulo malala kiong lo kuyei kuto mai a matam kala di tooltool kiong ye in nga, ngan kin lom tutau.”

43 Ngan Yesu iwete panga nen, “Awete pong moolmool nen, katai nga ole ayong tayepe ye malala ke Maro yo yepongo ki dook mata i.”

44 Ye kene tani in kemai ye ke matana sangaul be ru, ngan todo iduku tana mai i le imot, a iken nen le du rrai ye so ben ke matana tol. 45 Le nga ke matan igumugumu, inbe wam matolene yo tituka bareme mai ke sungunu lono i, in imassarak le iyei paru. 46 Inbe Yesu koonoo le somai nen, “Tamak, atarau lo baem.” Yesu iwete nen a imot, inbe imooroon pattu leu le tina imata yege.

47 Ye kene tani in tool turana bulbulini yo iye di tooltool ke patokongo tipatoto Yesu lo kai palasingi kaini, in ikamata so tina yo pombe nga, ngan ye matana, le iyitmaka Maro ene, inbe iwete nen, “Ona, moolmool sa, tool i tool noonoonoo.” 48 Ngan yeisa di tooltool tina yo lo tigaua be koodi tada nga, ngan tikamata so tina yo pombe nga, motong la titoo momo kidi a tipodo katedi be tipatnaia lo modoko kidi, inbe timulu a tila pang malala kidi. 49 Bong di tooltool le imot yo lodi galanga ye Yesu, ngan tipa ye di garup yo titoo ke Galili a tilo nga, ngan sila tikodo manga mooloo kasin, inbe tikamata so tina yo pompombe nga.

50 Ngan tool atu yo ene Yosep i, in iyepe lapau. Ya in iyei dada dook mata tarantatu pang di tooltool, inbe ya in tool kuto mai atu kidi Yuda ke karatanga betanga lapau. 51 Bong Yosep tani in itara lono le igaua la ye di diene kuto maimai kapala yo tigaua lodi be ole tiyei urata dook tiap pang Yesu nga, ngan tiap. Ngan ya in malala mai ki la Arimatia i, bong nga itar matana be ole ikamata lal yo Maro itaru be matan kala di tooltool ki ye i. 52 Le nga Yosep tani in ilo pang ye Pailot be lo itoru a be ikaua Yesu bobono, ngan le Pailot tani imalum panga. 53 Motong la ila iyunu Yesu bobono tani a iyiti du tana, motong iduku ye wam kookoonoo, inbe ikauu la itaru ye agoro ke tarungu di matenge yo tikeli sakar madini i, in lono. Ngan agoro tani in titar touo tool matene sa bobono ye muku tiap. 54 Ye kene tani in di Yuda tina ngan be tipare kaningi pang di, yesoo kumata le be ke idu nga, ngan ole lal kidi Yuda ke sungunu tani in pombe.

55 Ngan di garup tina yo tiye Yesu tipa ke Galili a tise nga, ngan titoo Yosep be la tikamata agoro tani, inbe tikamata Yesu bobono be Yosep itaru belei nga. 56 Tikamata a imot, motong la timulu a tila pang rumu kidi la tipare kai surunu yo kini ki dook mata nga. Bong ngan lal kidi Yuda ke sungunu in pombe, le nga titoo ger ke Maro a timaryoo ye urata ye lal tani in.