1 Ngan di tooltool ke sodaningi pat, inbe di tooltool kapala yo ke yeingi noonoo mata nga, ngan timan tigaua le tigaliui Yesu, inbe titar talngadi ye betanga ki. 2 Le nga di Paresi tiye di pannoongoo ke ger ke Maro tikamata le tikap malmal panga a tiwete mur ye nen, “Ai, tool ni nga yelei a iye di tooltool ke yeingi noonoo tigauagaua, inbe iye di tikan so nga?”

3 Motong la Yesu ikatte betanga atu pang di nen, 4 “Kumata le ang tina ngan atu asara ki yo edi sipsip ngan 100, bong be atu ilene nga, ngan ole iyege di sipsip ki yo 99 ngan sila tiyepe sokorai ye ni kidi yo be tikanen ye i, inbe ila la ipa a isere tani yo ilene i le lo ipuske. 5 Ye kene yo be la isere sipsip ki tani ilene in le ipuske nga, ngan ole lon ponana kaiye le ole ikauu a itaru lo poopoonoo, inbe itaure a imulu a ila pang malala ki. 6 Ngan ye kene yo ila pombe rumu ki nga, ngan ole ikiu di tooltool ki, inbe di tooltool yo tiyepe potai ye rumu ki nga, ngan man tigaua, inbe iwete pang di nen, ‘Kaman a man ayang lod ponana, yesoo sipsip kiau atu yo ilene i, in apuske a akauu mulu oo.’ ”

7 Motong la Yesu iyei ne, “Awete pang nen, lo ponana yo nen ngan gaongo leu ben yo iken ye malala ke Maro ngo. Kumata le tool atu ke yeingi noonoo be iportaka lono pang Maro ye dada dook tiap ki yo iyei nga, ngan Maro iye di bangabangana ki ole lodi ponana ye mai san. Ngan moolmool, di tooltool yo 99 nga, ngan ole lodi ponana ye di lapau, bong o lodi ponana ye di mata tiap, yesoo di ngan tooltool noonoodi le taukadi urata yo be tiportak lodi nga.”

8 Motong la Yesu ikatte betanga san mulu pang di nen, “Kumata be garup atu in pat ki silba sangaul atu, bong be atu ilene rumu ki nga, ngan ole iyei belei? Ole ilanga sul ki a be ikamata ni ye, inbe ikaua narong a isoraia rumu lono ki, inbe matan sarai dook le lo ipuske pat ki tani mulu. 9 Ye kene yo be isere pat ki tani ilene in le ipuske nga, ngan ole ikiu di tooltool ki, inbe di tooltool yo tiyepe potai ye rumu ki nga, ngan man tigaua, inbe iwete pang di nen, ‘Kaman a man ayang lod ponana, yesoo pat kiau atu yo ilene i, in apuske a akauu mulu oo.’ ”

10 Motong la Yesu iyei ne, “Awete pang nen, lo ponana yo nen ngan gaongo leu ben yo iken ye malala ke Maro ngo. Kumata le tool atu ke yeingi noonoo be iportaka lono pang Maro ye dada dook tiap ki yo iyei nga, ngan Maro iye di bangabangana ki ole lodi ponana ye mai san.”

11 Motong la Yesu ikatte betanga san mulu nen, “Tool atu in natunu tamoto ru. 12 Ngan natunu tamoto yo kase in iwete pang tamana nen, ‘Tamak, au i lok be kupoto so kiong nga le paru a nen kop yo kiau ngan pau.’ Motong la tamadi ipoto so ki tina ngan le paru, inbe ikap pang di natunu.

13 “Le nga tiyepe le mooloo tiap, inbe natunu kase tani in iyawar so ki tina ngan pang di tooltool a tiyimi be ikap pat ye. Motong la ikap pat ki, inbe ila be la iyepe ye tana mai atu yo iken ni mooloo san i. Inbe igiri pat ki tina ngan ye dada dook tiap ki yo iyei nga. 14 Ngan igiri pat ki tina ngan a imot, inbe pitolo maiyoko pombe ye tana mai tani yo iyepe ye in le imot, le isere so yo be ikani i. 15 Le nga tool tani in ila la itoro malala taunu atu be iyei urata panga. Ngan le tool ke malala tani in iwete panga be la matan kala di ga ki, a nen ngan ipakan di. 16 Ila, ngan ikamata ooroo puana kulini yo di ga tikan nga, ngan lono be ikap a ikan lapau, yesoo bong tool sa ikap kaningi panga be ikan tiap.

17 “Motong la se lon tut, le nga ya taunu lon wetewete nen, ‘Tiap, di kapraingi ke tamak le imot ngo kaningi kidi alunu san be tikan, bong au naii aman ayepe sokorai ni, ngan la le be amata ye pitolo nga! 18 Le nga, ole amulu a ala pang ye tamak, la awete panga nen, “Tamak, au i ayei dada dook tiap ke noonoo ye Maro matana, inbe ye ong taum matam lapau. 19 Le nookoot nga, au i tool dook tiap le ke be kukiu au ye natum mulu tiap, bong be nen ngan kutarau le ayei urata ben kapraingi kiong nga.” ’ 20 Motong la imadit a ipa mulu pang ye tamana a ila.

“Bong ngan kene yo ipa manga mooloo go nga, ngan tamana ikamata a ikilla, le lono panga mai san. Le imadit tina le idada a ila le la iwarra a lon ponana ye, inbe isomo pangana.

21 “Motong la natunu tani in iwete panga nen, ‘Tamak, au i ayei dada dook tiap ke noonoo ye Maro matana inbe ye ong taum matam lapau. Le nookoot nga, au i tool dook tiap le ke be kukiu au ye natum mulu tiap.’

22 “Bong ngan tamana ikiu di kapraingi ki a timan man iwete pang di nen, ‘Oo, palbe be kalo kakaua sousoungu kiau mooloo ni si kasousouo natuk i ye, inbe katara padodo lo ye baene buruburene, inbe kakap loningi ke kede panga a iparir. 23 Lo ngan be kala la kakaua asara yo ene bulumakau in natunu yo itup welewele ni, man karaumate, inbe kayeie mailang a takani, inbe lod ponana, 24 yesoo natuk i ben imata oo, motong la imaur mulu nga. Ya in ila a la ilene oo, motong la man tapuske a takauu mulu nga.’ Motong la tiyeie mailang tani a tikanen ye, inbe lodi ponana.

25 “Ye kene tani in natunu yo mai i, in iyepe kumu. Le nga imulu a iman potai pang ye rumu, ngan ilongo tina yo tipodo pari a tiwou, inbe tisiki nga. 26 Motong la koonoo pang kapraingi ke tamana tina ngan atu a isi le si itoru nen, ‘Ai, di tooltool ngo tiyeie soo so?’

27 “Ngan kapraingi tani iwete panga nen, ‘Taim tani in imulu a iman oo, ngan la le tamam iraumata bulumakau natunu atu yo itup welewele i, in ye, yesoo tamam lon ponana ye yo ikamata taim a ipa dook mata le man pombe mulu nga.’

28 “Ngan natunu yo mai in ilongo betanga nen, le nga katen malmal le lono be ilo rumu lono tiap. Motong la tamana ipas a idu tana be du iwete silli, inbe ikarata betanga panga. 29 Bong ngan iraua betanga ke tamana nen, ‘Kumata, au i aru tayepe ye rai alunu san, le ayei urata ben poranga kiong. Inbe kuwete pau ye urata le so nga, ngan arau koom, too asak noonoongoo kiong tiap lapau. Bong lom be kouo asara mitiap atu ben meme natunu in pau a araumate, a nen ngan aye di tooltool kiau amkani, inbe lomam ponana ye, ngan tiap sa. 30 Bong yeisa be natum yo iyau so kiong la igiri ye di garup lekelekedi le imot i, in imulu a iman, ngan le lom ponana, inbe kuraumata bulumakau natunu yo itup welewele in ye sa.’

31 “Motong la tamana iwete panga nen, ‘Alei, natuk! Ong in kanakana ngan aru tayepe le so kiau le imot nga, nga so kiong. 32 Bong nookoot katai nga, ngan idi le imot be lodo dook mata inbe lodo ponana, yesoo taim i ben imata oo, motong la imaur mulu nga. Ya in ila a la ilene oo, motong la man tapuske a takauu mulu nga.’ ”