1 Au Yut i ayei urata ben kapraingi ke Yesu Kirisi, inbe au i Yemis taini. Au i awodo rau naii pang ang di sema tooltool yo Tamada Maro lono pang mai san a ikiu ang nga, inbe pang ang di sema tooltool yo Yesu Kirisi matan kalang dook mata nga.

2 Nen le apatarau pang Maro be lono mulumulu yang a ilonang, inbe ikaua lo silene ki pang, inbe lono pang mai san le imede nen a ila.

3 Ang di tooltool kiau nga, muku ngan lok kaua urata be awodo rau sa pang ye urata yo Maro iyeii a ipamulidi ye so dook tiap yo be igarungidi i. Bong nookoot nga, au lok be awode pang a awete pang a be nen ngan kakodo inbe kawete le koomim mede ye betanga moolmool yo tatara lodo medana ye i. Ngan Maro ikap betanga tina pang di tooltool ki yo ipootoo di panga ya taunu nga, a be nen ngan betanga tina ngan iken dook nen a ila. 4 Au i awodo betanga pang ye so yo nga, yesoo di tooltool kapala yo tiraua pang Maro tiap nga, ngan la tise a se tiko a tiyepe kataunu yang nga. Di ngan tiwala muridi pang Yesu Kirisi. Ngan ya taleu in la Tool Mai kiidi i, inbe iyei tool kuto mai pang so nga le imot. Bong di tooltool tina ngan tillung be Maro in lono pang di tooltool a iyei dada dook mata leu pang di, le ke be igarung di ye dada dook tiap yo tiyei, ngan tiap. Nen le titattadaii tiap, bong tiparama dada dook tiap ke bauk. Bong mukot ngan di Maro koonoo tiwodo rau ye di a tipapos di ye urata dook tiap kidi tina yo tiyei nga, a be nen ngan Maro ole iyemenai di ye.

5 Ang ngan o lomim galanga ye so nga oo, bong lok be apamadit lomim ye mulu. Tool Mai ikap di tooltool ke Isrel a ipamulu di ke Isip a timan, bong timan motong la igarung di tooltool tina yo titara lodi medana panga tiap nga. 6 Inbe lomim tut ye di bangabangana kapala ke Maro yo lodi be tiyepe dook ye urata kidi tina yo Maro ikap pang di ngan tiap, bong tiyege nedi tina. Ngan nen le Tool Mai ipau di ye ooroo medana yo ke be tikupraii tiap i, inbe itar di tidu ye ni yo todo lono i, a be nen ngan tinam ye Lal Maiyoko ke Tool Mai yo be si iyemenai di ye i. 7 Dada yo nen nga, ngan gaongo leu ye di tooltool ke Sodom le Gomora inbe malala maimai kapala yo iken potai pang ye di nga, ngan lapau. Di ngan tiyei dada dook tiap ke bauk, inbe dada yo ke be tool tamoto ila ye ene san tamoto la yaru tiyei bauk nga. Nen le di ngan tiyei ben tarkilanga pang di tooltool yo be tikanamaia masngana mai ye ei yo ikan nen le taukan motingi i.

8 Ye dada tina yo nen nga, ngan gaongo leu ye di tooltool yo ke kaplungunu ngan lapau. Di ngan titoo patomonaingi yo tiwete be tikamata ye mianga kidi nga, le di tapdi tigarung tinidi ye dada ke yeingi noonoo. Inbe di ngan lodi be Maro iyei tool kuto mai pang di tiap, inbe tisopo koodi a tiwete betanga dook tiap ye di bangabangana yo ke Maro nga. 9 Bong tool kuto mai kidi bangabangana ke Maro yo ene Maikel i, in iyei nen tiap. Le nga ye kene yo iye tool kuto mai kidi so sadi in tiwetewete a tiparsu be ole sei be ikaua Mose bobono ye in nga, ngan le isopo koonoo a iwete betanga dook tiap panga, ngan tiap. Bong iwete nen leu, “Tool Mai la be ipasak pong i.” 10 Bong di tooltool tina ngan tiwete sokorai betanga dook tiap ye soo so yo lodi galanga ye tiap nga. Inbe soo so yo tinidi iyolo di be tiyei nga, ngan tiyei le dawa ben di asara gok. Nen le di tapdi tigarung di ye dada tina yo nen nga.

11 Atoo, ole tisolo masngana mai! Di ngan titoo dada yo Kaen iyei nga. Inbe di ngan tiyepe be lodi kaua urata ye kaungu balingi leu, le tikapsap dawa ben Balam iyei nga. Inbe di ngan tikapye be tigarung urata ke di kuto maimai ke Maro dawa ben yo Kora iyei nga, le Maro ole igarung di.

12 Di tooltool tina yo nen nga, ngan taukadi moomoodi le ole tigarung mailang kiang yo be kaye di diemim kakanen a kagauagaua lomim ye nga. Di ngan dawa ben di tooltool yo matadi kala di sipsip nga. Bong lodi pang di sipsip kidi tiap, lodi pang di tapdi leu. Inbe di ngan dawa ben eng tene yo taukan ki a muru itiri i, inbe dawa ben kai yo ipu tiap le taukan kanono a di tooltool tigamaraii le imot a ise ete i. 13 Di tooltool yo nen nga, ngan dawa ben kokor ke tiek. Le ye dada dook tiap kidi yo tiyei nen nga, ngan ke be moomoodi ye tiap, le tiyepe mallangana ye dawa ben dugu ngoongoonoo yo ikoko tiek pono i. Inbe di ngan dawa ben di kanpitiki yo titoosap dada kidi nga. Nen le Maro ikaua ni yo imukku le todo ki mai san i, in pang di be tiyepe ye, ye ke tina yo kanakana nga le imot.

14 Inok i, be takinkat ye Atam le isi ye nga, ngan ya in limi be ru kidi. Inbe Inok tani in ikaua Maro koonoo inbe iwetewete ye so yo be pombe pang ye di tooltool tina nga. Iwete nen, “Kakamata, Tool Mai iye di bangabangana ki yo ipootoo di panga ya taunu nga, ngan alunu le alunu san la tisi nga. 15 Iye di tisi nga be si ikarata betanga kidi tooltool le imot ye dada le urata kidi yo tiyei nga. Inbe ole ipapos di tooltool yo lodi be titoo betanga ki tiap nga le ipa ye dada dook tiap kidi yo tiyei nga. Inbe di tooltool dook tiap ke yeingi noonoo yo tiwete betanga dook tiap kidi be tirautoo dada moolmool ke Maro nga, ngan ole ipapos di lapau a be nen ngan iyemenai di.” 16 Di tooltool tina yo nen nga, ngan di tooltool ke betanga mur inbe ke kan pasemenge lapau. Inbe di ngan titoo dada dook tiap yo lodi ikau urata ye nga. Inbe di tapdi tiyitmak di, inbe koodi paweserai di tooltool a be nen ngan tilon di ye so.

17 Bong di tooltool kiau nga, lomim tut ye soo so yo muku ngan di aposol ke Tool Mai kiidi Yesu Kirisi tiwete pang ye nga. 18 Di ngan tiwete pang nen, “Ye lal yo be Yesu imulu a isi ye in nga, ngan di tooltool ole tiyei sere ye betanga moolmool ke Maro, inbe ole titoo dada dook mata yo Maro lono be titoo, ngan tiap, bong ole titoo di tapdi lodi.” 19 Di ngan Maro Amunu iyepe ye di tiap, le soo so yo tinidi iyolo di be tiyei nga, ngan tiyei leu. Nen le di tooltool tina ole tigarungang le kaparpoto ye yepongo kiang.

20 Bong ang di tooltool kiau nga, lok be kakodo le kamede ye betanga moolmool ke Maro yo katara lomim medana ye in le ikenen leu, inbe kapatarau ye gurana ke Maro Amunu Silene. 21 Yesu Kirisi lono pang inbe ole ilonang. Nen le ye kene yo kanamu be ikaua yepongo dook mata yo taukan motingi i, in pang nga, ngan ole kayepe dook mata ben di tooltool yo Maro lono pang di mai san nga.

22 Ang ngan kin lomim pang di diemim yo lodi rru ye betanga moolmool nga, a kalon di. 23 Inbe di tooltool kiidi kapala yo dawa ben tiyepe ei lono nga, ngan palbe be kakap tarai di a kapamulu di ye so dook tiap yo be igarung di i. Inbe di tooltool kapala yo tikapsap ye dada dook tiap a tinidi giri leu ye Maro matana nga, ngan lomim mulumulu ye di, bong kin kakamatang dook leu, yesoo noonoo kidi ngan giri leu dawa ben wam timunu yo tapaua botoboto ye i.

24 Maro ole matan kalang dook mata le o ke be kamol tiap. Inbe ole ikau ang lo kakodo dama ki a nen ngan kakamata yo ene mai san ke be di tooltool le imot tipayiti ye nga. Inbe ya in ke be ilonang a be nen ngan taukamim busunu ye matana. Ngan nen le ole lomim ponana kaiye. 25 Inbe Maro ya taleu in la ikau idi a ipamulidi ye so dook tiap yo be igarungidi i, in ye urata yo Tool Mai kiidi Yesu Kirisi iyeii i. Nen le Maro in ene mai san ke be di tooltool le imot tipayiti. Ya in tool kuto mai le gurana mai iken ye, inbe di tooltool ke be tirautoo betanga ki tiap. Mukot yege ye kene yo so kapala pompombe tiao nga, ngan ya in iyepe nen. Inbe nookoot nga ya in iyepe, le pang dama ni ngan ole iyepe nen lapau. Moolmool.