1 Ye kene tani in tikarata betanga yam be ole amkaua ookoo sa, inbe amkooi ye a amdu pang tana mai Itali. Ngan le tisukete Paulu tani in iye di diene kapala yo tiyepe ye rumu dook tiap kidi talnga dikidiki lono nga, ngan la Yulies baene. Ngan Yulies tani in tool turana bulbulini ke patokongo, inbe ya in iyei kuto mai pang budanga atu yo tiwete edi ye Di Tooltool Ke Patokongo Ke Sisa nga. 2 Ngan ookoo tani yo amyiri lo pono i, in ookoo ke malala mai Adaramitium. Inbe ookoo tani in be ikooi a idewe launu ke malala yo iken ye tiek ke tana mai Esia nga. Motong la tiruwu ooroo a be amkooi a amdu nga, ngan le Aristakus ke malala mai Tesalonaika yo iken ye tana mai Masedonia i, in iyiri lapau a amye amdu.

3 Le nga amkooi ye ke tani le lo bongbongini ki nga, ngan le la amsolo ye malala mai Saidon. Ngan Yulies tani in iyei dada dook mata pang Paulu, le nga imalum panga be idi tana di ikamata di tooltool ki, a be nen ngan tiloni ye so yo imaka ye nga. 4 Amyepe kasin nango, motong la amyege Saidon a be amkooi mulu a amdu nga, ngan le amtoo kooingi dadana tiap, yesoo amsosala eng lapau. Le nga amkooi kataunu ye motmot Saipras, inbe tana pu a amla. 5 Amkooi a amla, motong la be amkooi a amdu nga, ngan le amsiutu tiek yo potai pang ye tana ke Silisia le Pampilia i, inbe amkooi le du pombe ye malala mai Maira yo iken ye tana mai Lisia i. 6 Ngan du amsolo nango, motong la tool turana bulbulini tani in ikamata ookoo atu ke malala mai Aleksandia in idaudau. Ngan ookoo tani in be ikooi a idu pang Itali, le tool mai tani in ikau am la amyiri ye a amdu. 7 Ngan le amkooi mosmos ye ke alunu, yesoo eng mai la ipa ke dama a amsosala i. Le nga amkooi a amdu potai ye malala mai Nidas, bong ngan eng mai san le ke be amsosala, inbe amkooi popobe pang dama tiap. Ngan nen le nga amportaka ookoo, inbe amkooi a amla pang ye motmot Kirit potai pang ye matana ke Salmone. Ngan le amkooi so le la amkoo ye motmot tani in kapala ki. 8 Amla ke motmot tani in kapala ki, motong la amkooi mosmos a amdada tana le le la pombe ye ni atu yo tiwete ene ye Launu Dook Mata i, in iken potai pang ye malala mai Lasia.

9 Ngan tina amkooi mosmos nen le ke alunu iman a ila, inbe lal maiyoko kidi Yuda ke sapanga ye kaningi in imot oo. Ngan nen le amlo ye lal yo be eng tani in imadit le dook tiap yege i, le nga Paulu ikap betanga pang di tooltool tina ngan nen. 10 Iyei ne, “Di tamoto nga, kapalongo! Au i akamata nen, kumata le be takooi nookoot nga, ngan ole tapuske lal dook tiap, le ookoo kiidi ole perbe, inbe burum le so alunu la be ilene nga. Inbe idi nga ole tallede lapau.” 11 Paulu iwete nen, bong ngan tool turana bulbulini tani in ilongo betanga ki tiap. Bong itoo betanga ke koddenge ke ookoo, inbe ke ookoo tamana. 12 Ngan launu tani yo amdau ye i, in launu dook mata ke be ookoo idau, inbe iko dook ye yoro, ngan tiap. Ngan nen le nga di tooltool yo tiyepe ookoo pono nga, ngan alunu la lodi be amkooi mulu, inbe amyege ni tani in a amla nga. Ngan lodi tar nen, be amkooi le dook nga, ngan ole amkooi a ampa so le la pombe ye launu san ke Kirit yo Pinik i, a nen ngan la amko ye yoro, inbe amnaia eng tani in nango le katen si ngan. Ngan launu tani in la isanga yoro le eng yo ipa ke sawa ngan tiap i.

13 Amyepe nango, le nga karaka ipa surunu mosmos dook mata. Ngan nen le lodi tar be ole amkooi dook mata le amla ye launu tani yo tiweta i. Le nga tiyaua pat yo tikatte du iparama ookoo i, in se ete, inbe amkooi a amdada tana ke Kirit a amla. 14 Ngan amkooi a amla le mooloo tiap, inbe yoro mai imadit le gurana san. Ngan yoro tani in ipa ke motmot Kirit kapala ki ke kono ni a ilong le dook tiap yege. 15 Ngan tina ampuske eng nen nga, le nga amkapye be amrookoo kokor ye ookoo tani, inbe amsosala eng a amla, ngan tiap. Ngan nen le nga ampas le amdau leu, inbe eng isuru ookoo tani in a amdu. 16 Amdu ngan le amkooi ke motmot mitiap yo tiwete ene ye Kauda in murini ke kono. Ye kene tani in du amko kasin ye muru ye motmot tani in murini, motong la amyei urata mai a amkapye be amyiti ookoo kase yo amyole in se ookoo mai pono. 17 Le nga di loningi ke koddenge ke ookoo tani in tiyiti ookoo kase tani se ete se tipauu ye ooroo le imede, motong la tikatte rre le ipa ke ookoo mai tani in parmana, inbe tipauu ye le imede a be nen ngan iparama. Ngan titattadai be amkooi a amdu ngan le du amsauloko ye ululu yo iken tiek lono potai pang ye Aprika i, le nga tirau le ke ookoo tani, inbe ampas le amdau be eng isuram leu a amdu. 18 Ngan eng tani in isuram a amdu nga, ngan dugu le kokor ki maimai leu le tina iwulam dook. Le nga ke tani in imot, inbe amlo ye ke san, motong la di loningi ke koddenge tani ngan timadit a tikatte burum kapala du tiek lono. 19 Amkooi nen le ye ke tol ki, motong la di loningi ke koddenge tani ngan timadit a tikatte le ke ookoo ngan le ipa ye rre le so ki, ngan du tiek lono. 20 Ngan eng tani in isootoo pa nen a irau am nga, le nga ke alunu yo amkooi ye nga, ngan ke le bong tina yo kanakana nga, ngan le mala be amkamata touo ke le kanpitiki pitiap yege. Ngan nen le nga lomam tar nen, nga ole dook yam tiap, bong ole am le imot amllemam.

21 Amkooi kaiye sokorai ye ke alunu, le nga di tooltool tikan touo so pitiap. Motong la Paulu tani in imadit lo ikodo kataunu kidi tooltool tina, inbe iwete pang di nen. Iyei ne, “Di tooltool kiau nga, kakamata koot? Ngan yo be kulkulunu nga, ngan kalongo kook le tayege motmot Kirit tiap nga, ngan matin nga le tapuske lal dook tiap i tiap, inbe so sa be ilene tiap lapau. 22 Bong nookoot nga ole awete pang nen, kin lomim mede leu, yesoo idi nga sa o ke be ilene tiap, bong ookoo leu la be ole ilene i. 23 Au i tool ke Maro, inbe asung panga lapau. Le bong katai a le muntu nga, ngan bangabangana ki atu isi le si ikodo ke gigik, 24 inbe iyei ne, ‘Paulu, kin kutattadai be! Ong in ole du kukodo dama ke Sisa ye ni ke karatanga betanga. Inbe kulongo, Maro ilongo pataraungu kiong oo, le ole iyei dada dook mata pang di tooltool le imot yo kuye di kakooi ye ookoo i nga, le o ke be sa ilene, ngan tiap.’ 25 Le di tooltool kiau nga, ngan kin lomim mede leu, yesoo au i atara lok medana pang Maro be ole iyei so tina a pombe le imot ben yo iwete pau ye nga. 26 Bong be nen ngan ole eng isuru ookoo i a tadu le du isauloko ye motmot sa.”

27 Amdaudau le bong sangaul be tol iman a ila, le ye bong sangaul be pai ki in nga, ngan amdaudau ye tiek mai yo Mediterenian i. Le nga bong kataunu ngan di loningi ke koddenge ke ookoo tani ngan tiyetai ben ookoo o idau a idi potai ye tana oo. 28 Le nga be titouo tiek, motong la tikaua ooroo ke touanga tiek in a tipadua a idu be tikamata ole tiek idu lopo go, too tiap. Ngan le tipuske touanga tani in rowo ki ben sangaul ru. Motong la ookoo ikooi kasin mulu pang tana le mooloo tiap, inbe tipadu ooroo tani mulu du. Ngan le tipuske touanga tani in rowo ki ben sangaul be limi leu la idu pang lopo nga. 29 Ngan nen le nga titattadai be kumata le ookoo ikooi a idi le di isauloko ye ni yo pat ki in nga, ngan ole perbe. Motong la tikatte pat yo be iparama ookoo nga, ngan pai idu ke ookoo kirini ke mur a be du iparama ookoo, inbe tipatarau be palpalbe be ke se ipiti matana tarai. 30 Ngan tikamata ookoo yo be di isauloko nga, le nga di tooltool yo tiyei urata ye ookoo nga, ngan lodi kaua urata be ole titarkooledi a tikoo ye ookoo tani. Motong la tiyitmaka ookoo kase yo iken ookoo mai pono i, in du idau, inbe tillung be du tikatte pat ke ookoo damono a be iparama ookoo. 31 Motong la Paulu imadit a iwete pang tool turana bulbulini tani in iye di tooltool ke patokongo tina ngan nen, “Ai, kumata le be di tooltool ke ookoo ngo tiyepe ye ookoo i tiap nga, ngan ole ang nga kallemim.” 32 Le nga di tooltool ke patokongo tina ngan tisaputu rre yo tiwata ookoo kase tani in ye a iparama i, inbe idau a ila.

33 Motong la sila tiyepe le nga potai be ke se ipiti matana, motong Paulu iwete le koon mede ye betanga pang di tooltool tina ngan le imot a be tikan so pa. Le nga iwete pang di nen, “Atoo, ye ke sangaul be pai yo ila koot nga, ngan lomim modoko le kakan touo kaningi sa ye manga mooloo i tiap, inbe kayepe sokorai. 34 Le nookoot nga awete le kook mede pang be kakan so pa, a nen ngan itokang. Ngan awete pang nen, ang le imot nga, ngan o ke be so sa igarungang tiap. Ole kayepe dook mata.” 35 Paulu tani in iwete pang di nen a imot, motong la ikap porong pattu, inbe imadit lo ikodo dama kidi, a iwete lo ponana ki pang Maro ye, motong la itepala porong tina a ikan. 36 Di tooltool tina ngan tikamata Paulu yo iyei nen nga, le nga ipamede di, motong la di le imot lodi dook mata a tikan so lapau nga. 37 Ngan am tooltool tina le imot yo amyepe ye ookoo tani in pono nga, ngan kinkatingi kiam ben 276. 38 Di tooltool tina ngan tikan so dook le kapodi sung, motong la tikatte dingding patunu ke kaningi, ngan idu tiek lono, a be nen ngan ookoo imarra, inbe sukbe pang ete.

39 Ye kene tani in sila amyepe le nga ke ise be se ipiti matana, ngan di tooltool ke ookoo tani ngan tikamata tana, bong tikilala ni tani in tiap. Bong tikamata launu atu yo ululu ki dook mata i. Le nga lodi tar be kumata le guradi nga, ngan ole tiyeie ookoo a ikooi le di isauloko ye ni tani in. 40 Motong la tisaput rre ye pat tina yo tikatte du iparama ookoo ngan le imot sila ikino tiek lono. Inbe tipolo rre yo tipau pie maimai ru yo ke kaungu pie ye ookoo nga, ngan lapau. Motong la tiyiti le yo iken ke ookoo damono i, in ilo ete, a nen ngan be muru itingi nga, ngan ookoo tani in ikooi a idi pang tana. 41 Bong ngan ookoo ikooi a amdi nga, ngan le di isaurai le isauloko ye ululu yo iken tiek lono nga. Le nga ookoo tani in damono isaurai le imede le ke be ipulles tiap. Ngan nen le dugu maimai iraua kirini ke mur i, in le le perperbe le dook tiap.

42 Le nga di tooltool ke patokongo lodi kaua urata be ole tiraumatamata di tooltool yo ke rumu dook tiap kidi talnga dikidiki lono nga, ngan le imot a timmata. Ole nen ngan be tiwe a tidi tana nga, ngan tikoo. 43 Bong ngan tool turana bulbulini ke patokongo in lono be ilono Paulu. Ngan nen le nga iwetekala di tooltool ke patokongo tina be kin tiraumatamata di tooltool tina ngan be. Motong la iwete pang di tooltool yo lodi galanga ye wenge nga, ngan be tipas muku a tidu tiek lono, a nen ngan tiwe a tidi tana. 44 Inbe di tooltool yo kapala nga, ngan ole tikap siri le ookoo soonoo kapala yo perperbe nga, a nen ngan tisur ye le tidi tana. Motong la tiyei nen, ngan le am le imot di amsolo tana dook mata.