1 Ngan ye yo amwete nen nga, ngan lomim taram belei, be ammadit a am tapmam koomam su am mulu ye urata ke Maro yo ikap pam be amyei nga, too? Tiap! Ngan am nga dawa ben di tooltool kapala yo tikaua rau yo be iwete nin di, inbe ikata suanga ye di ye urata kidi ngan tiap lapau. Am nga lomam be ampatnaia rau sa yo nen ngan pang tiap, inbe am ngan lomam be kawodo rau sa yo nen ngan pang di tooltool kapala yam tiap lapau. 2 Ngan nen, yesoo ang tapmim ngan ben rau kiam yo be ikata suanga yam i. Inbe betanga le imot ke rau tani ngan la tiwodo lo lomam nga, nen le di tooltool le imot ke be tikinkat a lodi galanga yam ben moolmool Maro la iwangam be la amyei urata ki i. 3 Le urata kiam yo amyeii kataunu yang i, in ipaposang ben ang ngan dawa ben rau yo ipa ye Kirisi i. Inbe betanga ke rau tani, ngan iwodo ye kasa tiap, inbe iwodo lo ye pat menmenngana yo ben Maro iwodo ger ki lo ye a ikap pang Mose i, in tiap lapau, bong iwodo ye Maro, yo iyepe nen le taukan motingi i, in Amunu Silene a ilo ye di tooltool lodi.

4 Am nga amtara lomam le atu be moolmool amyei urata ke Maro, yesoo Kirisi ipamedam, ngan nen le Maro lon ponana ye urata kiam yo amyei nga. 5 Bong am nga ke be amyitmakam ye tiap, yesoo am tapmam nga taukamam gurana yo be amyeie urata tani ye i. Bong Maro la ipamedam le ke be amyeie urata i le iye lono i. 6 Le ya la iyei am le amyei urata ki dook ben di kapraingi ki, a ampagalanga di tooltool lodi ye betanga medana paunu yo ipamede i. Ngan betanga paunu tani in iken ye ger yo tiwodo ngan tiap, bong ipa ye Maro Amunu Silene. Nen le ger yo tiwodo, ngan ke be iyei idi le tammata, bong Maro Amunu Silene in ole ikaua yepongo dook mata yo taukan motingi i, in paidi.

7 Le moolmool, betanga medana ke Maro yo gurunu i, in matenge pombe ye. Bong lomim tut, ye kene yo Maro iwodo betanga tina lo ye pat a ikap pang Mose nga, ngan le Maro nunngana pombe a ilangaraii, le di tooltool ke Isrel ke be matadi ikenen ye Mose matana tiap, yesoo gurana ke nunngana iken ye. Le kumata be betanga medana yo gurunu, in dook mata san le Maro nunngana pombe ye a iken kasin leu, lo ngan be ilene nga, 8 ngan ole yelei ye betanga medana paunu yo ipa ye Amunu Silene i? Ngan in dook mata ki taunu le gurana ke nunngana ilo ete le illoso yo san i. 9 Moolmool, betanga medana yo gurunu i, in Maro nunngana pombe ye, bong betanga tani in ipapos di tooltool ye dada dook tiap kidi yo tiyei nga, a be nen ngan Maro iyemenai di ye. Bong betanga medana yo paunu i, in iyei di tooltool le tiyepe ben di tooltool noonoodi ye Maro matana. Le nunngana pombe ye le lo mai san. 10 Nen le betanga medana gurunu yo Maro nunngana pombe ye i, in nookoot nga takamata ben dook mata le imot tiap, yesoo betanga medana paunu i, in la dook mata ki taunu i. 11 Ngan kumata le betanga medana gurunu yo be imot i, in ipa ye Maro nunngana nga, ngan yelei ye betanga medana paunu yo iken nen le taukan motingi i? In dook mata ki taunu, inbe Maro nunngana yo iken ye in mai san, le illoso betanga medana yo gurunu i.

12 Ngan nen le am nga amtara lomam le atu be betanga medana yo paunu i, in moolmool, le amtattadai tiap, bong amwete pobe pang di tooltool ye. 13 Le am nga amyei dawa ben yo Mose iyei nga tiap. Ya in ye kene yo Maro nunngana ikenen ye go nga, ngan le ikap wam mitiap pattu a iyakala matana ye, a be nen ngan di Isrel tikamata nunngana tani yo be ilene i, in be. 14 Bong ye kene tani, ngan di Isrel tina kutodi mede san, le lodi galanga ye so yo Maro lono be iyei pang di, ngan tiap. Inbe nookoot nga be tikinkata rau ke betanga medana yo gurunu in nga, ngan dawa ben wam tani nga iyakala di le lodi galanga dook tiap. Le wam tani in nga ikenen ye di go, yesoo Maro ole igoolooki a ikoo ye di tooltool yo titara lodi pang Kirisi, ngan leu. 15 Inbe nookoot nga lapau, ngan ye kene yo be tikinkat rau ke Mose ye in nga, ngan dawa ben wam tani la iyakala lodi a ikenen go i. 16 Bong ye kene yo sei tool be iportaka lono mulu pang Tool Mai ye in nga, ngan ole Maro igoolookoo wam tani a ikoo ye. 17 Kakamata, Tool Mai inbe Maro Amunu, ngan yaru nga gaongo leu. Nen le ye kene yo be Tool Mai tani in Amunu Silene iyepe yidi nga, ngan idi nga tayepe la betanga yo gurunu, in parmana mulu tiap, le so sa yo be iyakalidi ye Maro, ngan tiap. 18 Inbe idi tooltool ke Kirisi yo wam tani in iyakala matada tiap nga, ngan dawa ben tiroongoo, inbe tasukete nunngana yo pombe pang yidi i, in pang di tooltool kapala a be nen ngan tikamata ben ya in ene mai san ke be tipayiti. Ngan ya in iportakidi le tayei dawa ben ya. Inbe ye dada yo nen i, in le kanakana ngan nunngana tani ole idikdik mulu a ise le se pombe yidi a ilo le lo mai. Ngan Tool Mai ya taunu la iyei urata yo nen ngan paidi i. Ya in iye Maro Amunu Silene nga, ngan gaongo leu.