1 Ang di diemam nga, ngan o ke be amwodo kamim betanga sa ilo ye rau a amwete pang ye soo ke, too lal, nangai yo be so tina ngan pombe ye i, in tiap. 2 Yesoo, ang ngan lomim galanga nen be lal yo be Tool Mai isi ye i, in ole pombe pang yidi dawa ben tool ke pinnau yo iyei urata ki bong, le ke be lomim galanga ye lal yo be pombe pang yang ye i, in tiap. 3 Ngan ye kene tani, in ole di tooltool tiyei ne, “Aa, nookoot nga tayepe ye lo silene, le ke be lod modoko ye so sa yo be igarungidi ngan tiap.” Bong ole palbe leu, inbe so tina yo be igarung di i, in ole pombe pang ye di dawa ben masngana mai yo pombe pang ye garup yo be ipasui i. Ngan di tooltool tina ngan ole taukadi ni yo be tikoo pang ye i.

4 Bong ang di diemam nga, ang ngan kayepe ye ni todo lono tiap le lomim galanga ye soo so yo be pombe i. Nen le lal tani ke be ipatakrai ang dawa ben tool ke pinnau yo iyei urata ki sollono i, in tiap 5 Ang ngan ben di tooltool ke bong yo tiyepe todo lono ngan tiap, bong idi nga tooltool ke kemai yo tayepe ye ni galangana nga. 6 Nen le kin tayei ben di tooltool kapala yo tiken mata ngan be, bong dook mata be matada nga irere go, inbe takap tutidi dook ye dada kiidi yo be tayei nga. 7 Kakamata, di tooltool yo tiken mata nga, ngan bong ngan ole tiken mata. Inbe di tooltool yo be tiyin ran medana a kutodi moo ye nga, ngan bong ngan ole tiyin ran medana tina. 8 Bong idi nga di tooltool ke kemai yo tayepe ye ni galangana nga. Le be nen ngan takap tutidi dook ye dada kiidi yo be tayei nga, inbe tatara lodo medana pang Maro le ikenen leu, inbe tatoo dada dook mata yo be lodo pang di diede ye mai san i. Kumata le be tayei nen nga, ngan ben tatara sousoungu medana ke patokongo a tayakala katede ye. Inbe tatar matada pang Maro a tanamu be ikau idi a ipamulidi ye so dook tiap yo be igarungidi i. Ngan kumata le be tayei nen nga, ngan dawa ben tatara loningi ke kutodo yo tataru be iwonokala kutodo ye patokongo i. 9 Yesoo, idi nga Maro ipootidi be tasolo kate malmal ki tiap, bong ipootidi be ikau idi a ipamulidi ye so dook tiap yo be igarungidi i. Ngan Tool Mai kiidi Yesu Kirisi in ya la dada yo be ipamulidi ye i. 10 Ya in imata be nen a ikau idi a taye tayepe gaongo. Nen le kumata be idi nga tayepe maurede go, too tammata koot nga, bong ole taye tayepe gaongo leu. 11 Ngan nen le ang atu atu kakap betanga dook pang di tooltool kapala ke Maro a be nen ngan kapamede lodi ye, ben tina yo nookoot ngan kayei nga.

12 Ang di diemam nga, nookoot nga amtorang be kayepe le karaua pang di tooltool yo tikaua urata mai be tilonang ye nga. Di ngan, Tool Mai la itar di be tiyei kuto maimai pang a be nen ngan tiwete betanga pang be tipadunang ye dada yo dook mata nga. 13 Le kakamata di ben edi maimai ye urata kidi yo tiyei nga, inbe lomim dook mata pang di mai san lapau. Inbe ang le imot be kayepe a kagaua lomim le atu.

14 Ang di diemam nga, am nga amwete le koomam mede ye betanga pang nen, be ole kakarata di tooltool yo ke tini booroomoo nga, inbe kapamede di tooltool yo ke tattadaingi ngan lodi. Inbe ole kalon di tooltool yo titara lodi le imede mata tiap nga, inbe kakap malmal pang di tarai be, bong kaporonai di tooltool nga le imot. 15 Kumata le be di tooltool tiyei dada dook tiap pang di diemim nga, ngan kalele di a be nen ngan tirau kidi a tiyei dada dook tiap pang di lapau be. Bong kanakana nga, ngan ole tikapye be tiyei dada dook mata pang di diedi atu atu, inbe pang di tooltool nga le imot lapau.

16 Inbe ye ke tina yo kanakana nga, ngan lomim ponana, 17 inbe kapatarau le ikenen leu. 18 Inbe kawete lo ponana kiang pang Maro ye so le imot yo pombe pang yang nga. Ngan Maro lono be ang di tooltool yo ke Yesu Kirisi nga, ngan be kayei dada yo nen nga.

19 Nen le kin karaumata ei yo ke Maro Amunu Silene in be.* Ngan ei, in inanpootoo urata ke Maro Amunu Silene yo iyei ye di tooltool ke Kirisi lodi nga. Kumata le takamata be iyei urata nen nga, ngan o ke be tagarungu ye betanga tiap. 20 Inbe di tooltool yo tikaua Maro koonoo a tiwete betanga ki pang nga, ngan kin lomim dook tiap pang di be. 21 Bong be nen nga, ngan katouo betanga le dada kidi tooltool nga le imot, a be nen ngan lomim galanga ye soo so yo dook mata nga. Le kaparama so yo dook mata nga, 22 inbe kayepe manga mooloo ye so matana matana le imot yo dook tiap nga.

23 Le ampatarau nen, be Maro yo ikaua lo silene pang di tooltool ki i, in ya taunu la be iyei ang le kayepe ben di tooltool yo ipootoo di panga nga ye ke tina yo kanakana nga le imot. Inbe ampatarau be ya la be matan kala lomim le tinimim mai i le imot i, a be nen ngan kayepe dook mata le taukamim busunu le ilo ye lal yo be Tool Mai kiidi Yesu Kirisi imulu a isi ye i. 24 Ngan Maro tani yo ikiu ang panga ya taunu i, in kanakana ngan itoo betanga ki le imot ben tina yo iwete nga. Le ole iyei so tina nga le imot a pombe pang yang.

25 Inbe ang di diemam nga, ole kapatarau pang Maro a be nen ngan ilonam. 26 Inbe lomim ponana ye di diemim atu atu le imot a kawarara di, inbe katoo momo kiidi a kasom pangadi ye dada dook mata yo ke Maro i.

27 Au i awete betanga medana pang ye Tool Mai ene nen, be kakinkata rau i pang di diemim nga le imot.

28 Ngan apatarau nen, be Tool Mai kiidi Yesu Kirisi, in lono pang a iyei dada dook mata pang.