1 Am nga lomam modoko yang mai san, motong la lomam kaua urata nen, o ke be amnam mulu tiap. Le nga amkarata betanga be ole am leu la amyepe Aten nga, 2 inbe amwanga Timoti la be imala pang yang i. Ngan Timoti tani, in ede atu yo itara lono medana pang Yesu, inbe amye amgaua ye urata ke Maro i. Inbe ya in ilonam be iwetewete pang di tooltool ye bingi dook mata ke Kirisi. Le ya la amwanga be mala ilonang, inbe ipamede lomim le imede i. 3 Ole nen ngan urata moonoo masngana yo nookoot kasola i, in ole iyei ang le lomim kap gogo dada matana matana ye. Bong ang ngan lomim galanga nen, idi nga Maro ipootidi be tasolo urata moonoo masngana tina yo nen nga. 4 Le moolmool, ye kene yo amyang tayepe ye in nga, ngan amwete pang nen, be ole urata dook tiap matana matana la be pompombe pang yidi nga. Le lomim galanga nen, lal tani yo amwetewete pang ye i, in pombe oo. 5 Ngan nen le anam tiap. Bong awanga Timoti a imala, a be nen ngan man lok galanga ye lomim medana yo kataru pang Yesu i, in ya la kakodo le kamede ye go i, too tiap. Yesoo au i atattadai yang mai san ye tool dook tiap ke touanga be man itouo ang nga, ngan ole kawala murimim pang Kirisi, le urata yo amyei pang nga, ngan ole ilene sokorai.

6 Bong nookoot nga Timoti tani in imulu a iman pang yam nga, ngan man ikaua bingi dook mata pam be kakodo le kamede ye lomim medana yo kataru pang Yesu inbe lomim pang di tooltool mai san nga. Inbe iwete pam be kanakana ngan lomim tutam, inbe lomim be le kakamatam, dawa ben am lapau, lomam be le akamatang pa nga. 7-8 Le ang di diemam nga, moolmool, di tooltool tigarungam ye yo amtoo Kirisi nga, inbe amsolo urata moonoo masngana alunu lapau. Bong amlongo bingi kiang yo kakodo le kamede ye lomim medana yo kataru pang Yesu koot i, ngan nen le ipamede lomam le nookoot nga yepongo kiam dook mata san. 9 Nen le am nga lomam ponana mai san pang Maro yang. Le ye kene yo amgaua ye Maro matana inbe ampatarau ye in nga, ngan amwete lo ponana kiam pang Maro yang le ikenen leu. Bong amsere betanga yo be amwete lo ponana kiam panga ye, ngan le lo ipa tarantatu ye lo ponana yo Maro ikauu pam i. 10 Le ye ke le bong tina yo kanakana nga, ngan ampatarau pang Maro le guramam, a be nen ngan imalum pam be mala amkamatang mulu, a be lomim medana yo kataru in mai tiap nga, ngan ole ampamede lomim le imede dook.

11 Le nookoot nga ampatarau pang Tamada Maro iye Yesu yo Tool Mai kiidi i, be yaru tikarata dada pam le ammala a be nen ngan mala amkamatang mulu. 12 Inbe ampatarau nen, be Tool Mai iyeie dada yo ke be lomim pang di diemim ye mai san i, in le ipon yang, a be nen ngan ang atu atu lomim mai san pang di tooltool ke Maro, inbe pang di tooltool kapala lapau, dawa ben tina am nga lomam pang mai san nga. 13 Ngan ampatarau nen a be nen ngan Tool Mai ipamede lomim, le ye lal yo be iye di tooltool yo ipootoo di panga, ngan timulu a tisi ye in nga, ngan ole Tamada Maro ikamatang ben ang ngan kayepe le dawa ben di tooltool ki yo ipootoo di panga ya taunu nga, inbe taukamim busunu ye matana.