23
Raghani aroba Balak da Balam suwara sibera, da meboda Balam Isrel damdi iyimagidi, bi nonowa na Balam gerubana iyimagidina. Touna wasina God kawagha iyisisiyeni da metagha miisena iyabera Isrel damdi biiyadi. Balam, God wonana raghani ruwamaruwa ivisisiyana. Mmkona yana sisiya wiibatana.
18 Wasina bi Balam mmko warana ivisisiyeni:
“Balak, Jipo natuna,
piika da yagu sisiya kunawaiyana wiimasi.
19 God touna gegha wawaya wotana, gemeyani iyiyabana.
Bi touna gemeyani yananoghota iyawamiwamirina, naboni wawaya saberaberana.
Bi nonowa yabera da awaki yawoneni na inabera.
Raghanina yisuwona da awaki berana inabera, na naboni yatubugha.
20 Tagu iwonegu da mmkodi wawaya animiiseyedi.
Touna ivimiiseyedi, na gerubana noko wiimiiseyanina anawamirina.
21 Yawe yadi God na gwabidiye,
Toudi rukwatuma sakabepepa da touna na yadi kiiwawo,
Bi piropiro bo nuwapoya ghamadi
gegha inapiikedi Jeikap nosinosina biiyadi,
toudi na Isrel damdi.
22 God, Ijipt kuburama ikabikanibuvedi,
bi yana maragata na ware garagara kau makina naboni geananamanina.
23 Wawaya gerubana dam Isrel sinimagidina
toudi kate gerubana imapuma siniberodina.
Kata na wawaya, Jeikap nosinosina sinisisiyedi, toudi na Isrel damdi:
‘Kokita awaki beradi ghamaghamadi God ibera yana wawaya kiiravidiye!’
24 Bi Isrel damdi na ware laiyon naboni maragasina
Yageghomiiri da kana aviya yunugha yakam
bi ganiganidi yaniuna.
Murine na yakena yowogha da yiyawiitaveyana!”