3
Wawaya yadi anibekuna
Raghanina God Kubura ibera, na sawara tupadi miisedi, da wawaya miisedi. Mmko waragututuna na metagha berona irughu kubure. Waragututuna na mota gwabinama idaguni.
1 Wasina bi mota touna wiiyaba iyakowa kirakii gegha ware ribiribi dipa mekodi Yawe God iberadina naboni. Bi raghani tana mota ipiika da wasikena iwoneni bo, “Wiisuwona God iwona da, ‘Mmko kwabuna kamone kii tupadi uwadi gegha konakamna?’ ”
2 Na wasikena mota iwonenabodeni bo, “Gegha, toumii kii tupadi mmko kwabuna kamone uwadi kanakam, 3 bi God iwonemii bo, ‘Kii kwabu basukiine yamiimiirina uwana gegha konakanina, da konakabitowoyina, bi konaberana konarabobo.’ ”
4 Na mota iwona bo, “Noko wiiyaba, kate gegha konarabobona! 5 God noko iwonenina, basuna iyakovi da raghanina uwana konakanina inaberami da matami sinaruyeghana, da tami naboni God na awaki miisena da berona na konakovi.”
6 Na wasikena ikita da kii uwana kanakam ivinuwakayowana bi kiina ivimatakonakona, da kate kiina nuwagiura iyavereni, na uwana mududi iyouna bi ikam; da kate mududi moghanena nama yawata na ivereni, da touna bada ikam. 7 Wasina bi yadi batabata matadi siruyeghana, da sakowa bi sinoghota da ighanidigha; na bidogo rugurugudi siwaturatawatawana naboni kwama da sivikasibabara.
8 Bi ravidi duduvine na tomoyina wavinena teya Yawe God kwabu kamone iyapepepewa na kwarituna siwaiyaneni, na toudi kii dughudughudi kamodiye Yawe God sikowoyeni da gegha iyakitadina. 9 Bi gegha, Yawe God tomoyina ikwatuwiidagu bo, “Tam meme barasina?”
10 Tomoyina iwonabodeyana bo, “Kwabu kamone kuyapeepewa na awaiyanem bi anaghara kiiravine na akowogha, basuna tagu ighanigugha.”
11 Na Yawe God iwona bo, “Iiyabo iwonem da tam ighanimgha? Bo noko kiina uwana meko avigesiyem da gegha kuyakani na kukani?”
12 Tomoyina iwona bo, “Wasike gwabiguve kutore na touna kiina uwana iveregu na akani.”
13 Wasina bi Yawe God wasikena iwoneni bo, “Mmko awaki berana tam kubera?”
Na wasikena iwona bo, “Mota iviyabegu na uwana akani.”
Yawe God metagha aro iveredi
14 Na Yawe God mota iwoneni bo,
“Tam mmko berana kubera kiiravine na aro kunakabi;
ribiribi tupadi ananamanidi da gegha ananamanidi kamodiye,
na tam kawagha aro kunakabi:
kata da nabo inagho na tam dobodobo debanagha kamokamomma kunasasa,
bi popoku kunakamkam yam yawa kamone.
15 Bi anaberam da wasike teya nonowa koninuwapughu kabivivirana;
kate anabera da touna nosinosina da tam nosinosim nonowa siniaviya.
Touna nosina gayamim initugudaguda bi tam touna nosina kayegiduna kunarutarayi.”
16 Bi kate wasikena iwoneni bo,
“Tagu yam ropeya nuwapoyina aniragasi da
sinivisi teya bi simira gisigisi kuni tubuyi.
Bi yam wiina da moghanem kuni badeni,
bi gegha,
da touna tam inibadem.”
17 Bi kate bada tomoyina iwoneni bo, “Wavinem gamona kukabisisireni da kii uwana kukani, meko avitarababaranem awona bo,
‘Gegha uwana kunakani,
na noko biidi tam yam bera kiiravine na mmko tanavina iimimagi.
Bi yam yawa tupane na sinivisiye kunabagibagi bi kunawawa kunakam.
18 Bi tanavina dinamona iyiyodi da modimodidi inigogodi yam kwabu kamone kiiravimve,
bi karayaba dipa kunakam.
19 Bi bada kunabagibagi kirakii kukuma inaturim da kamkam kunabanani,
patana da kunaveramagha dobodobove,
basuna tounama kutubugha.
Na tam dobodoboma kutubugha kiiravine,
na bada kunidobodobo magha.’ ”
20 Wasina bi Adam wavinena iviwaghawaghayeni Eve, basuna touna wawaya tupadi kiiravidiye na katare inisinada.* Hibru yadi gamoma waghawagha Eve waiyanina naboni sisiya yawa. 21 Bi Yawe God ribiribi ghunighunidima kwama ibera Adam wavinena teya kiiravidiye, bi ivikotedi.
Yawe God, Eden kwabunama Adam ivikanibuveni
22 Wasina bi Yawe God tounamani iwonena mayeni bo, “Aa, katana tomogha touda naboni, na iyakowa da awaki miisena bi berona. Na touna gegha wiiwaghasina inakabi da imana inakoghasi bi kii meko yawa yaverevereyana na uwana inakiyapuri da inakanina, kate bi inamake waghata.” 23 Na Yawe God noko kiiravine tomoyina wavinena teya Eden kwabunama ivikanibuvedi da dobodobone inawawa mekonama touna itubughana. 24 Wasina bi Yawe God iviporadi bi murine, na Eden kwabune raghani matane serubim† Serubim na gegha akakovidina bi toudi na kanukanuma ere-mabemabedi iiyawogha gawara kabikabikuwayidi sakoyakoyagha. ivikoyayidi bi kate seri wiibububuna wiikuwamiwamirina, nabo da mabo itore da yawa verevereyana kiina kana keda sinakoyayi bi sinitarababareni, da wawaya kiine gesiyapiikana.