1 Ginibbuh nan Moses ni binehwat hu Tabernacle, et ipahding tu hu elaw ni pengi-eng-engan dan Apu Dios ni nunman, yadda kameussal diman, ya altar niyadda usal diman. 2 Yadda etan aap-apun helag Israel ni kamanlistaddan tutu-u 3 ey in-ali da hu iddawat dan Apu Dios. Humman ida ey enem ni kaliton et ya hampulut dewwan bulug ni baka. Hakey ni kaliton hu indawat ni dewwan ap-apu, niya hakey ni bulug ni baka hu indawat ni hakey ni ap-apu. Impeang-ang dadda emin huyyad hinanggan Tabernacle.

4 Entanni ey kan Apu Dios nan Moses ey 5 “Abulut mudda huyyan indawat da et mausal di hipan ngunu eyad Tabernacle. Idwat muddan helag Levi et usalen dad ngunu da.”

6 Et idwat Moses idan helag Levi hu ida humman ni kaliton niyadda bulug ni baka. 7 Indawat tu dewwan kaliton et ya epat ni bulug ni baka idan helag Gerson et usalen dad ngunu da, 8 niya indawat tuddan helag Merari hu epat ni kaliton et ya walun bulug ni bakan ussalen da damad ngunu da. Ya ap-apu dan mengituttuddun ngunu da ey hi Ithamar e u-ungngan Aaron. 9 Endi an indawat nan Moses ni kaliton idan helag Kohat tep eleg da mahapul di ngunu da, tep hi-gada kamemehhan ni neieng-eng ni ngunut di Tabernacle.

10 Yan etan ni neieng-engan ni altar hu nengi-lian idan aap-apun nunman idan indawat da et ipeang-ang dan inha-ad dad hinanggan altar. 11 Kan dedan lan Apu Dios nan Moses ey “Ehel muddan helag Israel e kewa-wa-wan hampulut dewwan aggew ey i-alin hakey ni ap-apu hu iddawat tun meussal ni pengi-eng-engan ni altar.”

12-83 Ey ya nengi-lin iddawat tun nemangulun aggew ey hi Nahson e u-ungngan Amminadab e helag Judah. Yan meikkadwan aggew ey hi Nethanel e u-ungngan Suar. Yan meikkatlun aggew ey hi Eliab e u-ungngan Helon e helag Sebulun. Yan meikka-pat ni aggew ey hi Elisur e u-ungngan Sedeur e helag Reuben. Yan meikkelliman aggew ey hi Selumiel e u-ungngan Surishaddai e helag Simeon. Yan meikka-nem ni aggew ey hi Eliasap e u-ungngan Deuel e helag Gad. Yan meikkeppitun aggew ey hi Elisham e u-ungngan Ammihud e helag Epraim. Yan meikkewwalun aggew ey hi Gamaliel e u-ungngan Pedahsur e helag Manasseh. Yan meikkahyam ni aggew ey hi Abidan e u-ungngan Gideoni e helag Benjamin. Yan meikkeppulun aggew ey hi Ahieser ey u-ungngan Ammishaddai e helag Dan. Yan meikkeppulu et hakey ni aggew ey hi Pagiel e u-ungngan Okran e helag Asher. Yan meikkeppulut dewwan aggew ey hi Ahira e u-ungngan Enan e helag Naptali.

Emin ida ey nan-iingngeh indawat da e hanhakkey ni duyun silber ni umlaw di hangkiloh et kagedwah bel-at tu, ya hanhakkey ni mahukung ni silber ni umlaw di hangkiloh bel-at tu meippuun di kameunnud ni lekud da. Napnudda humman ni kayyaggud ni alinah ni nekamdugan ni mansikan olibah, e huyya kamei-appit ni pagey. Indawat da mewan hu hanhakkey ni ek-ekut ni mahukung ni duyun balituk ni umlaw ni 1/8 ni kilo hu bel-at tu e neha-adan ni bangbanglun insensoh, ya hanhakkey ni kilaw ni lakkitun baka, ya hanhakkey ni lakkitun kalneroh, ya hanhakkey ni hantoon tun impah ni kalneroh ni kamei-appit ni kagihheba, ya hanhakkey ni gelding ni kamei-appit tep ya liwat.

Yadda indawat dan kamei-appit di pekiddagyuman ey: handedwan bulug ni baka, hanlilman lakkitun kalneroh, hanlilman gelding et ya hanlilman hantoon tun impah ni kalneroh.

84-88 Et ya bilang emin ni indawat idan hampulut dewwan aap-apun helag Israel ni meussal di kei-eng-engan ni altar ey: Hampulut dewwan silber ni duyu et ya hampulut dewwan silber ni mahukung ni duyun umlaw di telumpulun kilo, hampulut dewwan balituk ni ekka-kut ni mahukung ni duyun umlaw ni hangkiloh et kagedwah bel-at tun nangkapnun insensoh, hampulut dewwan lakkitun baka, hampulut dewwan lakkitun kalneroh, hampulut dewwan hantoon tun impah ni kalneroh, ya alinah ni i-appit dan mei-unnud ida nunman ni kagihheba et ya hampulut dewwan gelding ni kamei-appit tep ya liwat. Ya in-ali da pay ni kamei-appit ni pekiddagyuman dan Apu Dios ey dewampulut epat ni lakkitun baka, na-nem ni lakkitun kalneroh, na-nem ni gelding et ya na-nem ni hantoon tun impah ni kalneroh.

89 Yan hinggepan nan Moses di Tabernacle et makihummangan nan Apu Dios ey dingngel tu kaman-e-hel di nambattanan ni dewwan nepaot ni nepayakan ni anghel di ta-pew ni hu-keb ni Kaban Apu Dios.