Isaiah
Ya meippanggep ni nunyan libluh nan Isaiah
Hi Isaiah e nengitudek ni nunyan libluh ey prophet Apu Dios. Sinuttudduan tudda tutu-ud Jerusalem niyad Judah ni meippanggep nan Apu Dios niya elaw tun na-nem ni toon. Yan eman ni nelabah hu dakel ni toon et han maiungnga hi Isaiah, ey negedwadda helag Israel et mambalin ni dewwa hu bebley da. (1 Kings 12) Yad appit ni north, ey nengadanan ni Israel. Ey yad appit ni south, ey nengadanan ni Judah.
Pinutuk Apu Dios hi Isaiah ni prophet idan tutu-ud Jerusalem niyad Judah ni nunman ni toon ni neteyyan nan patul e hi Ussiah. (740 B.C. Ang-ang yu hu 6:1) Entannit nelabah hu hampulut walun toon, ey inapput idan iAssyria hu Israel et sakupen tu. (722 B.C.) Ey yan eman ni 701 B.C. ey ginubat idan iAssyria ida bebley damad Judah ni nangkeluhud et apputen dadda, anin ni ya Jerusalem et ginubat da. (36:1) Entanni ey impatnan patul di Assyria e hi Sennakerib niyadda sindalu tun sekkupen hu Jerusalem, nem eleg dadda apputen hu tutu-udman. (chapters 36–37)
Nem eleg ida mansalamat nan Apu Dios hu tutu-ud Jerusalem ni nengihwangan tuddan sindalun iAssyria. Ida kumedek kamampahhiya niya manghay ida. Eleg da pinhed ni u-unnuden hi Apu Dios, tep daka daydayawadda beken ni makulug ni dios niyadda u-ukkul ni dios dan kinapyan tuu. Gapuh nunman ni daka pehpehding ey inhelan Isaiah e prophet ida hu iJerusalem et peamta tun hi-gada e kastiguen Apu Dios idan pengippeellian tun patul ni Babilon niyadda mangkabunget ni sindalu tun memahbah ni bebley da hedin eleg ida mantuttuyyu etan di daka pampahhiyyai, niya hedin eleg ida mengu-unnud nan Apu Dios. Nem kahing ida e eleg da pinhed ni dedngelen hu inhel Isaiah. Entanni tu-wangu ey hinggep idan sindalun Babilon hu Jerusalem et bahbahen da. Neipahding huyya eman ni nelabah hu dakel ni toon ni neteyyan Isaiah. (586 B.C.) Yan nunman hu neilawwan idan tutu-ud Jerusalem di Babilon et mambalin idan balud diman.
Nem wada la inhel Apu Dios nan Isaiah ni nunman, et humman indinel idan tutu-ud Jerusalem eman ni eleg ni ilaw idan iBabilon di bebley da. (chapters 44–66) Impakulug Apu Dios idan tutu-u tu e ibbangngad tuddallid bebley da hedin megibbuh ni manhelheltap idad Babilon tep ya liwat da. Impakulug tu pay e wadalli ittu-dak tun menellaknib ni katuutuun edum ni aggew. (chapters 52:13–53:12)
Ya neitudek eyad libluh:
1. Ya kastigun Apu Dios idan iJudah, yadda iIsrael niyadda tutu-ud edum ni bebley. (chapters 1–39)
2. Ya et-eteng ni kabaelan Apu Dios niya impakulug tun i-abulut tudda tutu-ud Judah ni mambangngad di bebley da. Et ya impakulug tun peelli tulli hu menellaknib idan tutu-u. (chapters 40–66)
1
1 Huyyan libluh hu neitudekan idan impeamtan Apu Dios nan Isaiah, e u-ungngan Amos meippanggep ni Judah niya Jerusalem eman ni nan-ap-apuan idan nanhuluhulul ni patul diman, e hi Ussiah, hi Jotham, hi Ahas et hi Hesekiah.
Ya nengipeang-angan Apu Dios e lawah ida iJudah
2 Kan Apu Dios ey “Puyek niya kabunyan, dengel yu eya e-helen ku! Yadda u-ungngan impenaptek ku et ettengen kudda ey nginhay da-ak. 3 I-imman ida animal, henin baka niya donkey, tep inamta da hu kan animal ni hi-gada niya kamengippaptek ni hi-gada. Nem yadda tuuk ni helag Israel ey eleg da-ak amta niya eleg da han-awat e hi-gak hu kamengippaptek ni hi-gada.”
4 Hi-gayun helag Israel ey nanna-ud ni mekastigu kayu, tep nakalliwtan kayu niya ebuh lawah ni yuka pehpehding! Inwalleng yu hi Apu Dios niya nginhay yu hu Kayyaggud ni peteg ni Dios yu. * 1:4 Isaiah 5:24
5 Kele nanengtun manghay kayu? Kaw pinpinhed yun mekastigu? Ang-ang yu kedi e kamei-ellig ni nangkeliputan hu ulu yu, et mukun kamemunnumunnu nemnem yu niya endi amleng yu. 6 Meippalpud ulu yu ingganah di dapan yu ey heni kayu nangkeliputan. Eleg malinihan niya eleg meha-adan ni agah ida liput yu. † 1:6 [5-6] Humman idan liput idan helag Israel ey beken ni makulug ni liput, nem humman kei-elligan ni kalinawah dad hinanggan Apu Dios. (Ang-ang yu hu Isaiah 53:4-5.)
7 Anin ya bebley yu et binahbah idan buhul yu ‡ 1:7 Yan eman ni ketaggun Isaiah ey kagubbagubbataddan tutu-ud Israel, ya Syria, ya Assyria, ya Edom niya Pilistia hu Judah. et giheben da. Yuka itettekel ey daka pan-al-an emin hu lameh ni intanem yu niya daka pambahbahan emin hu wadad bebley yu. 8 Ngannganih ni maka-apput kayun iJudah, tep ebuh law hu Jerusalem e bebley diman ni eleg bahbahen idan buhul yu. Nem eleg kabaeli idan tuudman ni mekihhanggan buhul da. Tep hellikuben ni buhul da humman ni bebley da. Heni etan ni payew ni endi law kaman-eddug, tep neani law hu neitnem et ebuh law etan hukyawwin wadadman.
9 Gullat ni eleg iebulut Apu Dios e Kabaelan tun emin ni wada hahhakkey ni metdaan di gubat, et netey idan emin hu tutu-ud Jerusalem et henin neipahding di Sodom niyad Gomorrah e nakabbahbah ida. § 1:9 Yadda kamangngenghay nan Apu Dios ey nanna-ud ni mebahbah ida. Nem ay, gapuh ni hemek Apu Dios ey in-abulut tun wada metdaan ni hi-gada. (Ang-ang yu hu Romans 9:29 et ya Isaiah 4:3, ya 10:20-23, ya 11:11, 16, niya 43:3-4.)
10 Hi-gayun aap-apu niyadda tutu-ud Jerusalem ey heni kayuddan aap-apu niyadda tutu-ud Sodom niyad Gomorrah ni nunman e nemahhig kalinawah da. Nemnem yudda kaituttuddun Apu Dios e Dios tayu niya dengel yu eya tuka pan-e-helan hi-gayu. 11 Kantuy “Kaw kanyu nem nakka um-amleng ida etan ni dakel ni yuka i-enappit ni hi-gak? Nehingla-ak law idan dakel ni animal ni yuka i-appit. Hiyya! Isiked yu law ni man-appit ni hi-gak idan nuntan ni yuka gihheban kalneroh, niyadda tabaddan animal yu, anin idan kuheyaw ni babakka yu, yadda kalneroh yu niyadda gelding yun yuka i-appit.
12 Entan aliali yu eyad Tempol ku, tep endi silbin yuka pan-appisi, tep ya kakulugan tu ey endi-ak di nemnem yu. 13 Isiked yun mengi-lin endi silbi tun yuka i-enappit ni hi-gak. Eggak law pinhed ni hahhammuyen ida bangbanglun yuka gihheban yuka i-appit. Ey eggak law pinhed hu yuka pehpehding ni Piyestah yun Kaketellakin Bulan, ya yuka pehpehding ni Sabbath, niyan yuka keemmuemmungin mandeyyaw. Nambalin ida emin huyyan endi silbitu, tep nemahhig hu liwat yu. 14 Em, anggebe-hel kudda huttan ni yuka pehpehding ni Piyestah yun Kaketellakin Bulan niyadda edum ni piyestah yu. * 1:14 Yadda importanteh ni piyestah idan helag Israel ey ya Piyestah ni Passover, ya Piyestah ni Pentecost niya Piyestah ni Tabernacle. (Ang-ang yu hu Exodus 23:14-17, ya 34:18, ya Leviticus 23:1-44 et ya Deut. 16:1-7.) Impeinglay ku law ni peteg.
15 Hedin mandasal kayu et itta-gey yu ngamay yu ey eggak hengnguda, anin ni ian-anteng yu dasal, tep mapetey kayu et heni etan ni nekukkuheyaw hu ngamay yu. 16 Pantuttuyyu kayu et isiked yudda lawah ni yuka pehpehding ma-lat malinih kayun heni kayu neulahan. Em, isiked yuddan emin hu lawah ni yuka pehpehding, 17 et ya kayyaggud hu ipahding yu. Ey ang-ang yu et ya meandeng niya limpiyuh hu meippahding. Baddangi yudda hu anggehemmek ni kapanligligat idan edum ni tuu niya iehneng yudda nepu-hig niyadda nebalu.”
18 Immehel mewan hi Apu Dios e kantuy “Imay, keyuy et man-uungbal itsu. Anin ni nakalliwtan kayu e heni kayu nekammansaan ni madlang, et liwwanen kudda liwat yu. Heni dakeyu paka-ullahan et maka-kal lugit yu, et heni kayu dallallun paka-gah tu. Ey anin ni makadlang mansa yu et pambalin dakeyun makablah e henin dutdut ni kalneroh. 19 Hedin et anhan u-unnuden yuwak, et ebbuluten yun baddangan dakeyu, ey hi-gayu mengngan idan kayyaggud ni lameh ni kameittennem eyad bebley yu. 20 Nem hedin kahing kayu et ngenghayen yuwak, man petteyen dakeyun buhul yu. Hi-gak ni Ap-Apu e Dios yu hu nanghel nunya.”
Ya ngehay idan iJerusalem nan Apu Dios
21 Huttan ni bebley yun Jerusalem ey nambebleyan ida lan kamekangngu-unnud nan Apu Dios e daka ikkahhakey hu daka penaydayaw ni hi-gatu. Nem yan nunya ey dakel hu beken ni makulug ni dios ni yuka daydayawadtan. Et humman hu, hi-gayun iJerusalem ey heni kayu etan ni biin makilakin tuka pebeyyad annel tu.† 1:21 Jeremiah 3:6-14, Ezekiel 16:25-26. Endi law hu kayyaggud niya limpiyuh ni nambebley ditan, tep yan nunyay mangkapetey ida wadadtan.
22 Hi-gayun bimmebley di Jerusalem, yan nunman ey kayu kamei-ellig di silber, nem yan nunya ey endi law ni hekey balol yu. Ey kayu kamei-ellig ni nunman di mebanglun meinnum, nem yan nunya ey kayu kamei-ellig di danum ni endi tamtam tu. 23 Mangkanghay ida aap-apu yu niya ida kamekiddagyum idan mangkatekew. Daka ella kameidwat ni hi-gada niya daka ebbulutan mebeyyadan ma-lat ipahding da lawah. Ey eleg da i-ehneng ida nebalu niyadda nepu-hig.
24 Et humman hu, hi-gak e hi Apu Dios, e Kabaelan tun emin e Dios idan helag Israel ey kangkuy “Nambalin kayu law ni buhul ku. Paka-ibbaleh kun hi-gayudda hu impahpahding yu, ma-lat gibeken yu hu nemahhig ni bunget ku. 25 Kastiguen dakeyu et ekalen kudda lawah ni elaw yu, ma-lat yumaggud kayu henin kapehding ni gumek e kaeyyuga ma-lat memahmah. ‡ 1:25 Ang-ang yu hu Isaiah 4:4 et ya 48:10. 26 Weddaen kulli kayyaggud ni aap-apu yun heni dedan lan nunman. Et yallin nunman ni tsimpuh ey ngeddanan alin tutu-u hu bebley yun Jerusalem ni ‘Bebley ni Kayaggud kapehpehding ni bimmebley niya kamannananeng hu daka pengu-unnud nan Apu Dios.’ ”
27 Kayyaggud ni peteg hi Apu Dios, et mukun ihhehwang tu huttan ni bebley yu e Jerusalem niyadda etan tutu-udtan ni mantuttuyyun liwat da. 28 Nem yadda etan manliwwat tep ya ngehay da niya pengiwwallengan dan Apu Dios, ey mebahbah ida niya mettey ida.
29 Nemahhig ali baing yu hedin ninemnem yu hu nan-enappitan yuddan beken ni makulug ni dios di hengeg ni keyew, niya nengipenahdingan yun lawah di yuka ngillinan leguntan yuka penaydayawin nunman idan dios yu. § 1:29 Ang-ang yu hu Isaiah 65:3 niya 66:17. 30 Mei-ellig kayullid keyew ni kamangkekpit bulung tu, niya mei-ellig kayullid neitnem ni eleg medennumi. 31 Nemnem yu huyya: Ya etan tuun et-eteng kabaelan tu ey bahbahen ni lawah ni tuka pehpehding, ey endi mabalin ni mengippesikked ni kebahbahan tu. Henin dagemi e anin ni ngalab ni ebuh et megihheb niya endi mabalin ni mengdep ni apuy ma-lat eleg magiheb.
*1:4 1:4 Isaiah 5:24
†1:6 1:6 [5-6] Humman idan liput idan helag Israel ey beken ni makulug ni liput, nem humman kei-elligan ni kalinawah dad hinanggan Apu Dios. (Ang-ang yu hu Isaiah 53:4-5.)
‡1:7 1:7 Yan eman ni ketaggun Isaiah ey kagubbagubbataddan tutu-ud Israel, ya Syria, ya Assyria, ya Edom niya Pilistia hu Judah.
§1:9 1:9 Yadda kamangngenghay nan Apu Dios ey nanna-ud ni mebahbah ida. Nem ay, gapuh ni hemek Apu Dios ey in-abulut tun wada metdaan ni hi-gada. (Ang-ang yu hu Romans 9:29 et ya Isaiah 4:3, ya 10:20-23, ya 11:11, 16, niya 43:3-4.)
*1:14 1:14 Yadda importanteh ni piyestah idan helag Israel ey ya Piyestah ni Passover, ya Piyestah ni Pentecost niya Piyestah ni Tabernacle. (Ang-ang yu hu Exodus 23:14-17, ya 34:18, ya Leviticus 23:1-44 et ya Deut. 16:1-7.)
†1:21 1:21 Jeremiah 3:6-14, Ezekiel 16:25-26.
‡1:25 1:25 Ang-ang yu hu Isaiah 4:4 et ya 48:10.
§1:29 1:29 Ang-ang yu hu Isaiah 65:3 niya 66:17.