1 Isaac artwa ampwanemarl irrek, ra annga aparrng-anem irrek. Ra alerikw ikwerenhek arlkek Esau.

2 Isaac angkek, “Ayeng artwamp-anem. Arrer-anem ayeng ilwetyekan.” 3 Isaac-el renh ilanthek, “Ntwa aker atyeng atwerl-alpa. Pewenarr ngkwenh aknga! 4 Peleyn-warl alha! Aker amperna peleyn ilenhek, mwerr-angker inetyek, mwerr-angker atha arlkweyek. Ayeng mwerr-angkwarr ngkweng angketyek ayeng ilwey-alenty, INGKARTel ngenh arntarnt-aretyek.”

5 Rebekah awelhenh, Isaac rarl angkenh. Esau anpenhek awangk, akerek aretyek. 6-7 Rebekah Jacob-ek angkek, “Atha awek Isaac-elarl Esau ilanthek aker ikwer atwerl-alpetyek ltyakert-anem ampernemel. Artwamp ilwey-alentyel arlkwetyek, awayengkw ngkwenhek mwerr-anem ra angketyek, INGKARTel renh arntarnt-aretyek.” 8 Amikw angkek, “Awelha atyeng! 9 Nanikwet akely atherr atwerl-alpa akngey-alpemel. Atha ampernetyek aynengkw ngkwenhek. 10 Ntwa ikwer-warl akngetyek, ra arlkwetyek ra mwerr-angkwarr angkey-alhenty, ra ngkweng inkwerelhemel.”

11-12 Jacob angkek, “Awayaty atyenh altangketyarr. Ayengan arrangkw, alteweny. Artwampel ayenh iterl-arekerr, atha irrtywerremel ilerl-anenty. Apmwangkwarr atha ilerl-anentyek, ra akengenty atyeng angkekerr.”

13 Amikw ikwerenh angkek, “Mwerr, atyengarl ra iterrem. Akngeyel ayenh ayntarrp-iletyek. Kel nga alha aker atwetyekantarl.”

14 Jacob-el aker renh atwerl-alpek. Amikwelarl renh ampernek, aynikw-kenh impen. 15 Esau-kenh arnkwa amikwel Jacob renh anthek, ra aylpetyek. 16 Nanikwet-penh yenp ra mpwarek, Jacob ikwer-warl arrernek, itep-atherr-warl, itewarl, Esau-apeny. Aynikw-warl aker akngetyek. 17 Amikwel Jacob amern-then aker ltyethen ra anthek.

18 Jacob aynikw-warl alhek. Aynikw-warl ra angkek, “Kel, ayeng apey-alpek.”

“Nthenh-apeny ngan?” Aynikwel ayernek.

19 Jacob irrtywerremel ikwer ilelhek, “Ayeng arrwekelenyan ngkwenh Esau. Atha aker atwerl-alpek, ntwarl ayenh ilanthek-angkwarr. Aker nhanyeman arlkwa ntwa mwerr-angkwarr angka atyeng iletyek, Akngeyel ayenh arntarnt-aretyek.”

20 “Alyarnpel-anem ntwa akeran atwerliwek! Ilek-kety?” Isaac-el renh ayernek. Jacob-el irrtywerremel ilek, “Akngey INGKARTel ayenh aker anthek.”

21 Isaac angkek, “Arrer-apeny irray, atha ngenh arnep-arnetyek, Esau-ek apek atha ngenh arnep-arnetyek.”

22 Jacob arrer-apeny irrek ikwer-warl. Isaac-el renh arnep-arnek. Artwamp angkek, “Jacob-apenyarl nga angkeyelan, Esau-apenyarl nga arlkan.” 23 Angka mwerr innga ra angkek Esau-ek-arrpantey. 24 “Nga alerey atyenh Esau innga?” Isaac-el ayernek.

“Ya, ayengan alerengkw ngkwenharl, Esau-arl,” Jacob-el irrtywerremel ilek.

25 “Aker-rnem atyeng akngetya, angka mwerr atha ngkweng iletyek. Jacob-el renh anthek aker-then wayn-then. Isaac-el arlkwek, antywek.” 26 Isaac angkek alerikw ikwerenhek, “Apetya! Ayenh arrwantyetyek. Kel, atha ngkweng iletyek, atharl ngenh kel ilek-angkwarr.”

27 Isaac-el arnkwa Esau-kenh intenhek, Esau-arrpantey iterl-arek, angkek, “Arlka ikwakertarl nhan, ahern atherrkeny kwaty-penh mwerr-angker inteyel-apeny, amern lyapelhelekarl INGKARTel. 28 Akngeyel ngkweng-warl kwaty thwenetyek, ngenh arntarnt-arem, amern-angketyarr, ntang ingwerek-ingwer-then, amern-rnem-then lyapelheletyek. 29 Nga Atyetyart ilkwa anetyek apmer arrpanenhek, ayteyengkw-rnemek, atyetyart ilkwa nga anetyek. Ingwerarl ngkweng akengenty angkenty, ayeng akengenty arrpemarl ikwer angkem. Ingwerarl ngkweng mwerr angkenty, Akngey mwerr arrpemarl ikwer angkem.” Isaac mwerr angkek Jacob ikwer.

30 Esau awangk-angkwarr-penh aremirrek ikwer-warl aker-akert. 31 Aker mwerr-angker ampernek aynikwek aker renh anthemel, “Aker nhenh arlkwa atharl ngkweng akngetyek.”

32 “Angwenharl ngan?” Isaac angkek.

“Ayengan Esau-arl, alerengkw ngkwenh arrwekelenyan,” Esau ikwer ilelhek.

33 Ikwer-penhan Isaac artewentyel arrewemel iterrek. “Angwenhelarl aker arrwekel-antey akngetyek? Atharl arlkwek, mwerr ayeng angkek, atharl arrwekel alhelek-anemarl renh, kel-antey. Kel, yanhey-antey atha ilek.” Artwampel ilek.

34 Esau artewentyel arlkemel artnek, aynikwarl awek-penh, “Kel ayenhan ntwa alhela arrpemarl!” Esau-el ilek.

35 Isaac angkek, “Ayteyengkw ngkwenhel ayenh irrtywerl-ampernek.”

36 Esau angkek, “Atherr-inger ra irrtywerl-ampernek, itna ikwerenh-apeny.”

37 Artwampel ilek, “Jacob-an Atyetyartarl arrekingkerr-angkwarr, ingkerrenh-angkwarr. Arringkerr ingkerrenh ikwer awelhetyek. Atha renh ingkerrenh anthek, amern-rnem-then. Ilek-anem atha ngenh anthem, ingkerrenh-antey atha anthek-kety.”

38 Esau-el aynikw renh ayernek arrpemarl, “Ayenh-anem ilay, Akngeyel ayenh arntarnt-aretyek! Ampwal-rnem anthetyek apek!” Ra artewentyel artnenh.

39 Aynikw ikwerenhel renh ilek, “Apmer arlpawel nga aneyenh. Kwaty aypmerr ayntey-angenh arrangkw, aherrety inngel.

40 Ngethen atwerrerl-ayntem Jacob-kenh-rnem-then aleth-antey. Ayteyengkw ngkwenh ngkweng Atyetyart aneyenh. Ingwer-ingeran, mpwel amentant-atherr irreyenh. Mpwel arlengant-atherr anetyek, ra ngkweng atyetyart-weny aneyenh.”

41 Esau arlkarirrenh Jacob-kety, rarl renh irrtywerl-ampernek-kety. Ra ament iterrenh, “Akngey atyenh ilwentyel, atha Jacob renh ipmek atwem.”

42-43 Rebekah-el awek ingwer-rnemel ikwer ilek, Esau Jacob ikwer mpwelhenh renh atwetyek, Jacob renh ilek, “Nga awayaty atyenh-warl alpa, Laban-warl, rarl apmer Haran-itwek aneyel. 44 Arleng ikwerety aney-alpa. 45 Esau ra iylpelirrenty atha ingwerenty ilanthem ngenh ikngwerl-alpetyek. Mpwel aleth anayntetyek, mwerrant-atherr ipmek atwerrey-angenh anetyek.” 46 Rebekah-el Isaac renh ilek, “Arelh Hitt-kenh-rnem, Esau-kenh anew-rnem, ayeng ikwer-rnem-kety arlkarirreyel. Jacob-el arelh Hitt-kenh ikngwenty-they, ayeng kel ilwemarl. Ayeng ilkelhey-angenh ayeng iteth anetyek, rernem ayenh arlkarewerl-anekerr.”