Hibrumpno
yimo gontwat
Barkof kfo nuhas mrokfom
Ndar gontwat Hibru Kristenmpno yimo gontwayet. Hibru Kristenm bok krhopam yak hatohhato memom, “Jisasr ayafhoninomr.” Ndnettn ndar gontwat rroh kfo bmtayuk mrokfom wandfakhato htafmomm. Bro Nkifrar Jisasr yakhato hingrnamo hingrneft Kraisrn Bro Nkifrarhu hingrneft kfo nuhas bonuhasmorm.
Husfirpa bro mrokfom ndar gontwat kfomom. 1) Jisasr tu Bro Nkifrarhu yon mif mifer. Jisasr ndar bbinysoft tohmohat, boknambok krhopam fakmor. Bro Nkifrar inji htihato to be rorn htamor yimaroh tamoh tamoh nefroh htihato yak marnyayuk yimar (2.10). Ror inji namotr ndnetrn profetm, mounmotm, yo Mosesr nd ndm hingrnamo hingrnefm be inji hingrnamomm. Jisasr hingrnamo hingrneftn tu tpiyet hingrneft hingrnamor. 2) Jisasr pris hingrneft fak htamorr. Ror be nd hingrneftn toh nkifranirahr. 3) Judam yakitohmoa nkifra pris hingrnefthu hingrna yuhat rot be inji, Jisasr hingrnamo pris hingrneftn tu tpiyet hingrneft hingrnamor. Judaroh fasoh fasoh nefm yemro tarioh mthahato kur mtha hikmoa nkifra neft ndt be yafotha hingrneft hingrnamoum. Jisasrn tu tpiyet hingrneft hingrnamor. Tot tu yima rifhuroh yak wus bowusyuk hingrneft.
Ndar gontwat met yindariroh kfo bmta mrokfom korhmt. Ndnettn bingot tohmo Isrerroh met yindariroh kfo bmta mrokfom korhm Sapta 11. Nda gontwathu mrokfom inji kfiwum tamoh tamoh nefm o krhopam kekwoko, bmbri riyoh dbhurak duha. Jisasr yakitoh bmta kihhato tohhany tohhany wuroh nohneftpno be myafhonikfot. Jisasr krhopam titahato tohmor. Ndnettn niko nd yuhat hikkfot.
Mounmotm Jisasrhu yinhitn tohwom.
1
(Sapta 1–2)
Bro Nkifrarhu mrokfot Jisasr dhemot
1 Bingot Bro Nkifrar nmoh nkifram mrokfom hemoahat profetmpno pthamoatrm tfit romn kfo nuhasmoumm met yindarim. Mrokfom hemoahat bok yiham bok yuhamn pthamourm. 2 Tfit ndar yiham turhu yon Jisasrn mrokfom yakhato kfo ptha nuhas hanitrnom. Jisasr tu Bro Nkifrarhu yonrn, ndnettn tamoh tamoh hingrnefm tamoh tamoh wuskam rorhu tirtn htamorm. Bro Nkifrarn kfomotrr Jisasr ee Jisasr wanyhato ndar bbinysoft yorhwa tamoh tamohm hingrnamorm. 3 Bro Nkifrar yorhwa ruheft nd yonrn fak nhombramort. Jisasr htineft to mirahko ka Jisasr htitwonom, nhai, Bro Nkifrarhu ruheft htitko. Bro Nkifrarhu ruheft to bi Jisasrn fak nhombramort. Ror tu bro ptha nanyjaretrn ndar bbinysoft ror kfiwatr rorhu tng yuhatn bbinysoft rhu hik hanitwot. Ror nda bbinysofthu yimaroh fasoh nefroh yak thu yuham yak hta bohta marnya tanyhato yimor. Yihato mrhumor tu yura myorhekwa nanyjaret Bro Nkifrarhu tirmifko. Tu bro yufa yakyuk tirko mrhumor.
Bro Nkifrarhu yonrn buriwurm mounmotm
4 Tirmifko mrhuhato rorn bromorm mounmotm. Yo nhaft rorn tu Bro Nkifrarhu yonr rhumor. Mounmotmn tfit rorhu hingrna yimam rhumom. Tamohmpno Jisasr nd bro yufat yakmor? 5 Yimbu yuhat inji korht. Bingot toh hnamo mounmotm nhai Bro Nkifrar womr kfo marimorr,
“Ni nanhu yone.
Hrek na bi ninhu yifema.” Sng 2.7
Yo nhaft Bro Nkifrar nhai wom mounmotr kfo marimorr,
“Ni nanhu yonn rhurahn.
Nann yifemruhann.” 2 Sml 7.14
Nhai. 6 Bro Nkifrarhu nkati yonrpar kfo tkrurafhato ndar bbinysoft yawihna thombat mounmotm kfo mirahrm, “Nd yonrn kfo yuta hagrhakfot.” 7 Bro Nkifrarhu yonrhu mrokfot kfonihato tfit mounmotroht riyakhato kfo memor,
“Mounmotm rom be hingrna yimayem.
Wiforti kaht kanjo hingrnewum.
Hingrneft afo hingrnaknitamt buha tfit mnoh hmbritm.
Hingrnakni tfit buha mnoh hmbritm.
Inji hingrnewumt rroh hingrneft.” Sng 104.4
8 To tawo turhu yonrn kfo memorr,
“O Bro Nkifraye, ninn kingn toh nkifranirahn.
Ni tohukatohruha kmim tu hifa dborioh nefrpam yak hta bohtarahnm.
9 Ninhu toh nmbuhat fasoh fasoh nefm faso hti bebwonm.
Tu hifa dborioh nefrpam hti yindhorwonm.
Ndnatn tunhu yifem Bro Nkifrar hti yindhorhato kfo memorn,
‘Ninn kingn tohrahn.
Kingn tohhato ndar bbiny-softhu wuskam ninn hti yukatohaf hanyruhann
yima yuhur yindhorrahrn.
Nhai wom yimam ni yakmo rhu nmbuhat o yufat kanjo yakrmom.’ ” Sng 45.6-7
10 Inji kfonihato tfit wom mrokfot kfo memor,
“Bingot ni Bro Najomnn kfomotn bbinysoft trhamot.
Ni tunhu tire hingrnamont mount.
11 Nd mounti bbinysoft rof mibatini-ruhatf
yimanom hti hambrafrahnomf.
Ni nhai. Ni nhai hti hambraf-ruhatnomn
ni be tahi nrwin kekutrahn.
12 Ndar bbinysofthu wuskam tamoh tamohm hwe nmbia manym kanjo
hwihany hwi hanyhato mskta-hato yakrirak rihtefiwa kanjo
inji narahnf mounti bbinysoft.
Yatk wuskam riyak htefiwa kanjo inji riyak htafruhanf
tfit nfrim yakhato wondhwa kanjo inji tfit wondh hmbrirahnf nfri wuskaye.
Ninhu ruheft nhai wom yihar rhu kriyohnihato
tfit wom yihar rhu marnya inji nakahn. Nhai.
Ninhu ruheft to be inji rpahtet ruheft korhn.” Sng 102.25-27
13 Bro Nkifrar nhai wom mounmotr kfo won marimorr,
“Nanhu tirmifko warhukahnn nd ni tone dbombhiwa yimam nann afo htiruhanm.
Afo htitwa. Nd yimam mirahm,
‘Finji ananomn,’ tfit nann yakrhoyanmn
ninhu yinhitn yak htaruhanm.
Tfit ninn brohato tohukatoh-rahnm.” Sng 110.1
14 Mounmotm mirahko, “Tamohem?” Rom Bro Nkifrarpno rhuhato rorhu hingrneft hingr-niwayem. Fitoh yimam Bro Nkifrar kangr, “Hifa rhu nmbuhat ahiyanm,” nd yimam mounmotm yitamn thu bmtewumm.