3
Bi nayaket tuhan yindariroh mrokfom
1-2 Hingrna yimam turoh tohak yimaroh yinhim tohwa kanjo niko metko bi ram yakhato ramemrom-pno yorhwako niko be ramemroh yinhimn rhukfot. Wom yimam tafi Jisasr hik duhatem niko rroh metkomn rroh yinhim rhuhato tamoh tamohm dborioh yima yuhumpno kfo ptha marnya bomarnyarahkomm, tot nd tkittn nikmoh ramemrom htiruhamn rroh yima yuhum yak kekuthato Jisasr hikrahm. 3 Niko Jisasr hikwa metko, rot hifa tmarim, tirm, wuram, yimbhindangm wondhet bugam korhm yo wondhet wondhet wuskam hmbritko, rot hifa inji wondh hta bohtewuko. To be mirahko be nd thatiproh wondhyuk wondhrpat aha-tohnom. Nhai. Kangko awondhkahtnom tukmoh yindarim ahti yindhormnom, wawanyko. 4 Tukmoh yindarim be dborioh yak marnya bomarnyakfot. Tamoh mrokfom napthorahnom be hifa yima yuhumpno rhuhato naptha marnya bomarnyakfot. Nhai be mfro mfro bahbahnakfot. Tom ndhtet ruhefm yima yuhum wondhkfot. Bro Nkifrar ndhtet nefmn hti yindhorwor. 5 Bingot Juda efkotm nhai thatiproh nefrpamn wondhrmoam. Yima yuhuroh nefmn wondhmoum. Rroh dukefm Bro Nkifrarpar yimoum, nhai riduka adukarmoam. Ndhtet dukefmpno tohmoamn rroh yindarimpno rhu marnyahato tamoh tamohm dborioh dukefmpno rhuhato napthamoum. 6 Serat rhumo rhu nmbuhat fak hik-mom. Serat tuthu ramem Abraham-rhu yinhitn be tohmout. Yufat yutamoahat futamoutr, tohukatohr. Niko Serathu nefm hikhato womm kak marnyewukomm yo nhai wom tamoh tamoh nefm duka yakrmikahko to bi Serathu yon meteko.
7 Niko yindariko bi metetko, mirah-ko metm yakhato arituhaftanomm. Nifn met yindarfn bi rpa yefn nhai wom husfn rhukahfn. Niko yimayeko yo rom yimayem ndnettn nayak marnyahato rpat tohkfot. Bro Nkifrar hiruha dborioh rhu nmbuhat nhai ni yindarirpa yakruhatnt. Nhai. Mett rot nd rhu nmbuhat yakrahtt. Yindariko metmpno toh marnyahato tamohm kfo bruttnaneft nhai wom tamohm hta raforuhatmm nikmoh kfo bruttneft.
Wommpno yiha yiha dborioh nefm nakfot
8 Wuroh mrokfot kforuhant. Niko Kristenko tir nayakitohhato rpa yima yuhur tohkfot. Womm yakyuk krhopam hti dukahekfot. Nahti marsisa duha. Yima najohfi kanjo tohhato nahti yuhuwaf nahti yuhuwafhato hifa yima yuhum nahmbrekfot. Noh hmbre yima yuhum tohhato tuko dborioh nefm nayak nuhaskfot. 9 Wom yimam fasoh nefm newumko mirahko tfit fasoh nefm ananomm. Mirahko tawo tawo fasoh nefm annhenom. Womm inji newumko niko dborioh nefm nakfot. Bro Nkifrarpno kfo bruttnahato Bro Nkifrar yak marnyarahrm. Inji narahko Bro Nkifrar yak marnyarahrko. Ndhtet dborioh nmbuhamn nakumorko. 10 Bro Nkifrarhu rfa borngt kfo kangt,
“Fitoh yimar kangr toh marnya-hato hifa rhu nmbuhat kto ahtiya,
nd yimar mirahr womm faso kfo beb bobebanm yo mirahr womm akfo nhehanm.
11 Nd yimar fasoh nefm mong trohhato
dborioh nefrpam hikkfot.
Wommpno nhai nnakfo baboba inji nakfot.
Be hifa dborioh yima yuhumn nayak marnya hanyhato
rpat rhu marnyakfot.
12 Nd mrokfom nhai be sfno inji kfokahm.
Dborioh metm o yindarim Brorko toh tamnourahrm
rroh wiyauyau toh nmbuham.
To tfit nd metm o yindarim toh nmbuham faso tohwom,
ror nhai toh tamnoukahrm rroh wiyauyau
toh nmbuham. Nhai.
Hti namburworm.” Sng 34.12-16
Dborioh nefmpno krhopam yakneft hifa
13 Yimako dborioh dborioh nefm narahko, nhai wom yimar yak beb-ruhatrko. Nhai. 14 To dborioh nefm niwatko womm kangm finjina finjinemko ndt to nhai mrokfom. Be yindhorkfot. Mirahko ayakrmekah-nomn bok dukfm ayaknom. 15 Kraisr nmoh Nungotheter, rorhu mongko mitohkfot. Rorn toh raforahrko tamoh nefm. Niko dborioh rhu nmbuhat toh gari hasiwa nmbuhat kfo ttiwonwomko, kfo nuhashekfot. 16 To mrokfom kfo ptha nuhasheneft, mrokfom be duka marnyahato dborioh yima yuhurn kfo nuhas marnya bomarnyakfot. Mrokfom faso faso kforahkomm, tfit tuko yima yuhum krhorahmko. Mrokfom hifa kforahkomm, nd yimam niko Jisasr hikwa nmbuhatpno faso kfoyukm niko pthayuk mrokfom wanyruhamn tfit tum yimtnarahm. 17 Be tunmoh dborioh nefmpno Bro Nkifrar kangr krhopam wayakko, a to nhai mrokfom. Bro Nkifrar ndt yindhorwor. Tunmoh fasoh nefm krhopa yakneft, ndt Bro Nkifrar nhai yindhorkahr.
Nmoh nrfa htiyakneftn Kraisr nohhato tfit sinyamor
18 Kraisr nohmo yuhat dukakfot. Kraisr nhai wom tofspno wasrmomr. Nhai. Nmoh fasoh nefm rorn yakmorm mfha htamorm. Rorn mfha htamotr be nd gribt wafakmot. Bro Nkifrar nhai bi wom mrokfom nompno. To be nd yiharpa nohmorn to be. Nohmohat thatiprpat nohmot. Yafothat nhai nohrmot. Yafothat rot rhumot. 19 Yafothat rhuhato Maringour yimot. Maringour yihato Maringour kalabus tohyuk noheh yimaroh yafotham mrokfom hemorm. 20 Nd yafotham nhai be sfno ndha toh furarmom. Bingot Noar sift hingrna hanyhato Bro Nkifrarhu mrokfom kfo pthamoahat nd yimam hanyjbornamoumm Noar pthayuk mrokfom. Nhai wany yakio-hato hikrmomm. Hanyjbornamoahat Bro Nkifrar nhai bi finji narmorm. Noar sift hingrna hanyhato Bro Nkifrarhu mrokfom kfo pthamoahat, 8-pela met yindarirpam nd Noar hingrnayuk sift fknimomn nhai bro hnut fune habohirhato miptkormom. Wom womtn bati bugamom. 21-22 Nd tekt be kfo nhombra mrokfoyet. Bro Nkifrar ndar yiha hingrnewa hingr-nefthu kfo nhombra mrokfoyet. Ariha yimam baftais yekwohat, nd yiha Bro Nkifrar yekwarm rorpno rim tohwom. Baftais yekwohat nhai yima kifthu yukthuneftn yukkahm. Nhai. Yimam Jisasr Kraisr hikhato rorhu dborioh nefm hiketm, baftais neftpno wom womm kak nuhaswotm ror Jisas Kraisr hikwa yuhat. Ndt nhai be sfno nd hingrneft rhukaht nhai. Nd baftais hingrneft mnetet. Jisas Kraisr nohhato yopt tohmohat Bro Nkifrarn kasinya-morr. Ndnettn yimam Kraisr frtkaf-hato baftais yekwohat Bro Nkifrar kasinyewarm rorpno rim tohwom. Jisasr nohmohat Bro Nkifrar kasinyak-nimorr hefenr hamuhmorr. Hefenr hamuhhato bro yufat hemorr. Bro yufat hemotrr nd yufet mounmotm, bbuket mounmotm rorhu yinhirpat tohwom.