1 Tuja nuigtu Job chichaak:

“Wika nuwa muntsujut aidaunak

makichkish wakejukchatin

atajai tumamiuwaitjai.

2 Wi nuwa aidaun diisan wakegá wekaetaik

Apajuí ashí senchigtin

nayaimpinum puja nunú

minak dekas suwimkan sujumainai.

3 Atumek aents pegkegchauwa nuna

Apajuík suwimkan susa

waitkawai tajume.

4 Wisha wajinak dutikaja

nunak Apajuí dekawai,

tuja wisha wajuk pujajaki

nunashkam nigki dekawai.

5 Wika makichkish tikich aentsnak

pegkegchauk awagmachuitjai,

tuja makichik aentsnakesh tsanugchauwaitjai.

6 ¡Apajuí minak kijin dekapatayai

waji dekapatiama numamtuk dekapa diijus,

mina anentaig pegkeja nuna dekaattawai!

7 “Tuja wi pegkeg pujutan idaikun,

pegkegchauwa nuna wekaetutaik,

tuja wi wakegamun taka wekaetaik,

nuigtu wi kasamkamujun ejetujiajag

8 wi ajakmamua nunak

tikich aents aidau ashí yajuaktinme.

9 Tuja tikich nuwa aishinnun wakekau ataik,

nuniachkunush wijai ijunja pujutaiju nuwen

pakijimatasan wakejuku ataik,

10 mina duwajuk inaku waitkatai wajasti,

nunikmatai aents tikich nugkanmaya aidau

kanutjatnume.

11 Wi nuwajai pegkegchaun

takamsau ataik,

apu aidau minak

suwimkan sujumain ainawai.

12 Wi pegkegchaun takamsau ataik,

jii kegak apea tsaika ajapama numamtuk

mina wajiig aidaunak

ashí tsaika ajapmainai.

13 “Wika mina inakeg aidau segatainakuig,

dita sumamunak tuké umijin ayajai.

14 Wika ditan waitkasuitkunuk,

Apajuí suwimka sujakuish

ayamjumamaitsujai.

Tuja ame takamsamu ujatkata

tujutkuishkam, wika dekaskea nuna

ashí ujamainaitjai,

dutika ai nuna diis

suwimkanak sujumainai.

15 Apajuí mina najatuauwa duke

mina inakeg aidaunashkam najanauwai.

Dutika betek pujutan amasui.

16 Tuja ujudauch aidau

atsumainak segatainakuig,

yaitskek idaisachuitjai,

tuja nuwa waje aidaunash

nujantai waittsatnume

tusanuk idaisachuitjai.

17 Yujumka yuwaknush bitaik aidaunash

ajamtsukek yuwachuitjai.

18 “Makichik múun uchijin

kuitamaina imatiksan

bitaik aidaunak tuke kuitamkauwaitjai.

Tuja waje aidaunashkam

tuke kuitamin ayajai.

19 Makichik aents jáanchji atsujam

tsetsekai jaun wainkunuk,

tuja jáanchji asepamain atsujunashkam,

20 mina uwigjun ujejai jáanch apagbaun

asepakti tusan suyajai,

dutika ai shiig anenjin aajabi.

21 Wika apu chichama epegkin aina nunú

mina kumpag ainakuish,

ditajai ijunjanuk uchi bitaikanak makichkish kajegchauwaitjai.

22 Wi taja nunú dekaskechuitkuig,

mina kuntujun kupigtugtinme,

dutikawag ichiajag ajapatnume.

23 Wika Apajuí suwimkenak ishamajai,

¡wagki wika niina senchijijaig

betekchauwaitjai!

24 “Wika oro kuashat ajutkuish,

nunuapi shiig pujutan

sujustinuk tusankesh,

ima nuig anentaimsanuk

pujujakchauwaitjai.

25 Wika wiakuch akunush,

tuja kuichik kuashat ajutkuigkish,

ememaku shiig aneamuk atsugtinai.

26 Etsag nantujai shiig pegkeg ainawai,

27 tujash wika makichkish uumkankesh,

nuniachkunush aents aidau

emtinish nu aidaunak emematmaitsujai.

28 Nuna emematiu ataik,

Apajuí minak suwimkan sujusu amainai,

¡wagki niina umigkachu asamtai!

29 Tuja mina shiwaajunu utugchat ajakuish,

wika dushikchauwaitjai.

Tuja ditan waitkainak

pegkegchaun chichajuinakuish,

wika makichkish dushikjachuitjai.

30 Wika mina shiwajunak makichkish

pegkegchaunmak yumigchauwaitjai,

tuja utusag jaka

tusagkesh tuchauwaitjai.

31 Tuja wijai ijunag batsamin aidau

aents tikich nugkanmaya aidaun

waitkastag tuinakuish,

32 wika nunú aents aidaunak

agá kajigtinme tusanuk idaisachuitjai,

aents tikich nugkanmaya aidau yujaunash

mina jegajui awayan ikannaitjai.

33 “Wika tikich aents aidau

ditá pegkegchaujin

ugmamin aina nuniknukesh

makichkish ugmamchauwaitjai,

tuja uumkan pegkegchaun takamsatag tusankesh anentaimchauwaitjai.

34 Wika aents aidau

dushiktugchagtimpash tusanuk puyatjatsjai,

nuadui wika ashí pan iwainajan takajai,

patatjukchagtimpash tachau asan

mina jegajuig epeminuk pujatsjai.

35 ¡Utusag makichik aentskesh antugtuka tajai!

Wi taja nuna dekaske titinme tusan

papiinum agagjai.

¡Apajuí ashí senchigtina nunú yamai aigkati tajai!

Tuja wi pegkegchaun takamsamu ataik,

papiinum agatjugtinme.

36 Nunú agagbauwa nunak

eme aneasan jukin,

atsejutaijai betek atsejuktatjai.

37 Tuja wi takasbau aidaunak

Apajuín ashí ujaktatjai, dutikau asan,

apu pegkeg utugchatjinchau amaina iman

wajasan Apajuín jegantattajai.

38-39 “Wika mina aentsug aidaunak

makichkish waitkachuitag duwi,

mina nugkajuk pegkegchaunmak yumigtuchui,

wika mina inakeg aidau

ajakmamujinak kasagchauwaitjai,

nuadui nugka tai

ijumja ajakmamu aina dushakam

wake besemag

anentaimkug buutuinatsui.

40 ¡Untsu wi taja nunú dekaskechu ataik,

mina nugkajuig trigo

tsapatsuk jagki tsapaktinme,

tuja cebada tsapamainun dupa tsapakti!”,