1 Cyakil axwok yi atix tcya'j, ak'wok k'ej Kataj, nin ekwok ẍchi'.

Na wi'nin ẍchamil, nin wi'nin k'ej i'.

2 Ak'wok k'ej yi bi' Kataj.

Ak'wok ik'ajsbil xe yi tetz ca'l yi chumbalaj nin.

3 Na yi Kataj, at nin i'-tz bene'n tzi'n.

At yi tetz porer tibaj cyakil yi mar.

Na cyakil yi at bene'n tzi'n, na quibit yi tetz ca'wl.

4 Chin cham nin Kataj tan yol.

Nin wi'nin k'ej i' tan cawu'n.

Nin sbnixok yi tetz yi mbi na tal.

5 Yi na jilon Kataj ni'cu'n na ban chi na cu' jun k'ancyok, yi na xcye' tan puch'le'n e'chk chin wutzile'n tze' cedro yi at wi'wtz Líbano.

6 Na yucan yi wi'wtz Líbano tu Sirión tan yi ẍchamil Kataj.

Na yucan chi na tz'itpun jun tal ne'ẍ wacẍ.

7 Yi e'chk yol yi na eltzaj le stzi' Kataj, cho'n cu'n na ban chi na ban ju' k'ak'.

8 Ncha'tz yi na jilon Kataj, na yucan cyakil yi ama'l tz'inunin tu' yi na bi'aj Cades.

9 Nin na baj ẍchuquil e'chk wi' bakch.

Qui'ct nin tze' na ban cyen tulak e'chk ama'l kale atit wi'nin tze'.

Cha'stzun te cyakil e' yi ate' xe ca'l i' na cyak' k'ej i'.

10 Yi Kataj i' ajcaw tibaj cyakil yi e'chk takle'n.

I' na cawun te yi a'bal.

Nin scawunk i' te'j tetz ben k'ej ben sak.

11 Kataj na ak'on chichamil yi tetz tanum.

I' na ak'on chibanl tu tzatzin paz scyetz.