1 Wajcaw, tbite'u' yi wajbil.

Stza'we'u' yi intzi' yi inkul.

Na cyakil yi na chintzan tan talche'n teru', i'tz yi mero bintzi.

Qui'c la'jil swuch' Ta'.

2 Slajluchaxk swutzu' yi qui'c wetz wil.

Na yi ilu' teru', na el xtxumu' tetz yi mbi na bajij.

3 Na tilu' yi ẍe'n wutane'n, nin na tilu' yi mbi na intxum.

Na yi na el inwatl lak'bal na ocu' tan ma'le'n wajtza'kl.

Ja ocu' tan inma'le'n. Poro qui'c impaltil njal tanu'.

Na bixba'nt wa'n tan qui injuchul wil tan intzi',

4 chi na chiban yi e' mas wunak. Na inmak wib tan qui inxome'n te cyajtza'kl yi e' biyol nak.

5 Ja injoy puntil tan inxome'n te yi teru' be'u', nin tan qui wele'n xlaj be' te yi ca'wlu'.

6 Cho'n na chintzan tan jakle'n ẍch'eybil wetz teru'.

Na jun cu'n yol stbite'u' yi intzi' inkul.

Stza'we' binu' yi na chintzan tan jakle'n teru'.

7 Ẍchaje'u' yi banl talma'u' swetz.

Na yi teru' na ocu' tan chicolche'n yi e' yi na chijak ẍch'eybil cyetz teru'.

8 Chin q'uicy'le'u' ẍchik'ab yi e' mal nak, chi na ban jun yaj tan q'uicy'le'n yi ni'il yi bak' wutz.

Chin cole'u' chi na ban jun xtxuq'uitx scye'j tal, yi na chicol quib tzak' xicy'.

Chin cole'u' Ta' tan yi teru' poreru'.

9 Na yi e' mal naka'tz na chitzan tan imbuchle'n.

Ej nin yi e' incontra'tz na cyaj ẍe'nk tan inquime'n.

10 Na cyocsaj quib nim tu chijilon.

Chin xo'wbil nin chiyol yi na cyal.

11 Xomche' nin tu' tan intz'amle'n.

Na yi cyajbil i'tz tan imbiyle'n cu'n.

12 Na yi e' incontra'tz ni'cu'n e' tu jun león.

Ni'cu'n e' tu jun león yi chin xo'wbil nin wutz, yi cho'n tewa'n tib stzi' yi tetz julil.

Nin yi list atite't tan tele'n tzaj wokp, tan stz'amle'n yi ẍchib.

13 Wajcaw, chin cole'u' ẍchik'ab.

Xcyeke'nu' scye'j incontr.

Tak'e'u' chicaws tan chicwe'n mejlok swutzu'.

Xconken yi sparu' tan incolche'n ẍchik'ab yi e' mal naka'tz.

14 Chin cole'u' ẍchik'ab yi e'a'tz, tan yi teru' poreru'.

Che'lken tanu' wi munt.

Na yi e'a'tz cho'n ajlij chic'u'l te yi ank'i'n tetz tzone'j wuxtx'otx'.

Tak'e' binu' ama'l scyetz.

Jaloken chipu'k.

Chiwanken chinitxa' jalen yil sipij chic'u'l.

Sajken chic'atzaj. Nin ncha'tzk chiban chimamaj.

15 Poro yi in wetz, ntin na waj wil wutzu'.

Nin chintzatzink tan yi jun xtxolbila'tz.

Na swile' wutzu' yil nitz'ij junt tir.