1 ¡Ilu' Wajcaw! swak'e' ink'ajsbil teru'.

Tetz cu'n walma' swak'e' teru'.

Nin tzintxole' yi balajilu'.

2 Kataj, na waj chinẍch'in tan yi tzatzin yi atin cu'nt.

Na waj lwak' ink'ajsbil teru', na ilu' yi wi'tz Ajcaw tetz tcya'j tu yi wuxtx'otx'.

3 Ja che'l ojk yi e' incontr swutzu' Ta'.

Ja chije' trimp, nin ja chiquim.

4 Na yi ilu' teru' Ta', ilu' yi pujul xtisya' yi qui na je' k'abu' twi' jun.

C'olchiju' wi ẍchemu' tan tak'le'n chicaws yi e' incontra'tz.

5 Wajcaw, ja maku' chiwutz yi e' pajol ca'wl.

Ja che'l cu'n tanu' swutz. Junawes ja chisotz yi e'a'tz tanu'.

6 Ja wi't chiquim yi e' contr.

Nin ja wi't chilo'on yi e' wunak yi na chi'ch chic'u'l.

Ja chilo'on tanu'. Nin qui'c nin mu'ẍ senil chinajbil ncyaj cyen.

7 Na yi teru' Ta', ilu' yi wi'tz Ajcaw tetz ben k'ej ben sak.

Ja bixe' tanu' tan cawune'nu'. Nin quil je k'abu' twi' jun.

8 Tz'ocoponu' tan ma'le'n cyajtza'kl cyakil jilwutz wunak, nin quil je' k'abu' twi' jun.

Chin tz'aknak cu'n ltuleju' yil tz'ocu' tan tak'le'n chicaws.

9 Ma yi e' yi chin q'uixc'uj nin ate' cu'nt, scyuch' yi e' yi buchij che', tz'ocoponu' tan chicolche'n.

10 Cha'stzun te Wajcaw, cyakil yi e' yi na el chitxum tetz yi ẍe'n tane'nu', cho'n k'uklij chic'u'l te'ju'.

Na na el chitxum tetz yi qui na che'l te c'u'lu'.

11 Kak'e' bin kak'ajsbil tetz Kataj yi cho'n na cawun wi Sión.

Katxole' yi banl talma' i' scyetz cyakil wunak bene'n tzi'n.

12 Na yi Kataj na til yi q'uixc'uj yi ate' cu'nt yi e' yi buchij che'.

Nin na tbit i' yi to'kl chic'u'l. Nin i' ltz'ak'on chicaws yi e' yi na chitzan tan buchu'n.

13 I bin jalu' Ta', elk k'ajabu' swe'j.

Til tzaju' yi buchbe'n wetz cyak'un yi e' yi na chi'ch chic'u'l swe'j.

Chin cole'u' ẍchik'ab, na txant tan wele'n cu'n swutz.

14 Kol chin colu', cho'n chinxcyek cu'n swutz yi sawanil Jerusalén tan xtxole'n scyetz cyakil wunak, yi ntin cu'n ilu' balaj.

Nin swale' scyetz yi wi'nin na chintzatzin tk'abu'.

Na ntin cu'n ilu' nchincolon.

15 Ma yi e' mal naka'tz, ja bnix e'chk jul cyak'un tan incwe'n klo' tul, poro e' te'n nchicu' tul.

Ja bnix jun leb cyak'un tan intz'amle'n, poro e' te'n nchitx'amx ta'n.

16 Tan yi xtxolbila'se'j, ja lajluchax yi ẍchamil Kataj.

Na i' mmak'on chicaws yi e' mal naka'tz.

Poro e' te'n nuc'ul tetz yi chitrampa'tz.

17 Na jun cu'n yol, cyakil yi e' mal nak, scyuch' cyakil yi e' yi ja cyaj quilol Ryos, cho'n chopon cyera'tz tq'uixc'uj.

18 Poro yi e' tal prow, yi qui na el Ryos te chic'u'l, at nin i'-tz tan quich'eye'n.

Ilenin at i' tan chiq'uicy'le'n.

19 Wajcaw oku' il te'j.

Quil tak'u' ama'l scyetz yi e' mal nak tan chibnol yi cyetz cyajbil.

Che' ẍchake'u' swutzu' Ta', tan tak'le'n chicaws.

20 Che' xo'wse'u' Ta'.

Ẍchaje'u' scyetz yi e' tu' wunak.