1 Lɛgŋ ab ɛm a, Farisiɛl ɛm ecʼɛgŋ nyam anŋ eke wɛl bʼɛsŋ Nikodɛm, lʼel Jwifɛl ecʼanym ɛsɛl ab ɛm ecʼɛgŋ nyam. 2 Ncok nyam, lʼow nʼɛŋn Jesu ɛtŋ nʼam ibrm ow lʼɛsɛ: «Low yɛgm agŋ ɛs, sʼuw any eke Nyam ɛrmʼŋ ow eke ki yɛgm ɛy low, aŋke ow it ke Nyam ánŋ ɛgŋ ab ab gbuŋ ke lʼↄ́tu li kok mɛny ɛwr amua ɛsɛ elel eke am kok ab af.» 3 Jesu dadʼr ninɛ: «Low nawrɛ mʼam dadʼŋ: ɛgŋ kaka kʼↄtum ɛknm Nyam e gbreŋgbi usu a, eke ow elm afr ecʼabusu ɛm wɛl ewrmʼn ɛm.» † Jwifɛl bi tutr eke -li bʼow -lʼok Nyam e gbreŋgbi usu a eke -li bʼↄsu ol a sosiɛm. Jesu am ↄny tutr na oc ɛl es nuŋ ɛm. Ow it ke ɛgŋ a nimum ítŋn yɛ. 4 Nikodɛm ibrm Jesu ninɛ: «Ɛgŋ ekʼusu a, ayaf wɛl ↄtu eke kʼewar ɛm ee? Kↄ lʼↄtu eke li kʼim lʼɛy lis e lokm wɛl ewar ɛm ee?» 5 Jesu dad ninɛ: «Ɛɛ, low nawrɛ mʼam dadʼŋ, ɛgŋ kaka kʼↄtum ɛym Nyam eci gbreŋgbi usu a eke wɛl ewmʼn mij ɛm lele abŋ ab ɛm. † Amani Sig a eke Nikodɛm uw any sɛnyn sɛnyn a, mij el ɛrm ɛm itŋn lele sayl ab eci mɛny ɛwr. Eke Jesu dad abŋ e low, ow el ɛgŋ ɛm ecʼitŋn owi. Ezekiɛl 36.25-27. 6 Lʼow yecʼeke bʼanŋ agŋ ɛm ow a, bʼel sos megl eci; ɛtŋ low yecʼeke bʼanŋ Nyam ecʼAbŋ ɛm ow a, bʼel Abŋ eci. 7 Eke mi dadʼŋ eke ↄny fɛŋ wɛl kʼewr ↄny ɛm afr ecʼabusu ɛm, ke ow kʼítiʼŋ any. 8 Yogŋ eke lɛf † Lɛf lele abŋ ab a, odad nyam coco Grɛk ɛm. Odad eke wɛl am wɛwlm mɛny. bʼerur a, li bʼɛlu nʼimn; bʼiri in ecʼɛlu a, gbɛkↄ úwm yogŋ eke li bʼanŋ lʼow lele yogŋ eke li bʼim ab any. Ɛgŋ fɛŋ eke wɛl ew Nyam ecʼAbŋ ɛm a, ɛbɛn ekʼow bʼɛcr ana.»

9 Af yogŋ, Nikodɛm dadʼr ninɛ: «Kↄ ayaf ow ↄtu eke kʼɛcr ee?» 10 Jesu dadʼr ninɛ: «Ŋ kʼel Israɛl wus af eci low yɛgm ɛs ligbɛl nyam, ke kʼúwm ów amua any ee? 11 Ɛɛ, low nawrɛ mʼam dadʼŋ: low yecʼa eke sʼuw any a, ow ecʼodad sʼam dad, ɛtŋ low yecʼa eke sʼɛkn a, sʼam ij ow eci daŋku; gbɛkↄ ɛy eci daŋku ij a, ɛ́gŋmn ebmn. 12 Eke mi bi dad ↄny wus ecʼów a, úbmnʼm nawrɛ; eke sica mʼam dad ↄny Afr ecʼów, ke ayaf bʼow ubrʼm nawrɛ ab ee? 13 Ɛgŋ kaka uyum afr ekʼow elm ɛgŋ ecʼIy sↄny cɛ ekʼanŋ afr us es a! † Jwifɛl bɛb bi tutr eke Mois uyu afr im eb ol. 14 Ɛsɛ elel eke Mois oc lowi ɛm lorŋn ucu likŋ kʼigbl ogŋ loj a, † Ɛ̀kn Awl 21.4-9. ɛbɛn ow it eke wɛl kʼigbl ɛgŋ ecʼIy yɛji ogŋ, 15 yecʼɛtŋ ke ɛgŋ kaka fɛŋ eke bʼow ubʼr nawrɛ a, ɛ́ŋn sel ekʼↄnym uwr. 16 Tasi ɛm a, Nyam erur wus ecʼagŋ a afŋn es toŋ nʼↄŋ wɛl in ecʼIy ekpↄbi a, yecʼɛtŋ ke ɛgŋ kaka fɛŋ ekʼↄny ↄmn in ɛm a kʼúwm, kↄ ke nʼɛ́ŋn sel ekʼↄnym uwr. 17 Tasi ɛm a, Nyam ↄↄm in ecʼIy owm wus ecʼagŋ ogŋ eke li kʼↄb wɛl low, kↄ ke Jim ɛm a, li sↄ́g wɛl. 18 Ɛgŋ ekʼub Iy a nawrɛ a, Nyam kʼow ↄbmʼn low; gbɛkↄ ɛgŋ ekʼubm nawrɛ a, ke Nyam ↄbʼr low ŋ̂, aŋke lʼubm Nyam ecʼIy ekpↄbi a nawrɛ. 19 Sica kin elel eke low ↄb a bʼɛcr: usuayl ow wus ecʼagŋ ogŋ, ɛtŋ agŋ erur ncebn akm usuayl aŋke -li bi kok ów eŋuŋ. 20 Ɛgŋ kaka fɛŋ ekʼam kok low ŋuŋ a, ↄny usuayl eci sifn ɛtŋ am kpabʼr es lís, aŋke nʼam uru eke in ecʼów eŋuŋ a kʼok ↄkm usuayl ɛm. 21 Gbɛkↄ agŋ a eke bi kok Nyam ecʼerur a, bʼim titm usuayl, yecʼɛtŋ ke agŋ ɛ́kn sɛnyn sɛnyn eke ɛl ecʼów a e kok a ɛcr Nyam ɛm.»

22 Sica eke ów amua ɛc a, Jesu lele in e jam ɛsɛl ab ab im Jude ecʼogog a. Nʼanŋ yogŋ wɛl ab lʼok agŋ mij nuŋ sɛgŋ bɛb. 23 Jan yɛji, Ayinↄn a eke titm Salim a, nʼam ok agŋ mij nuŋ aŋke yogŋ mij nↄnↄ anŋ. Agŋ am ow in ogŋ ok mij nuŋ. 24 Ke wɛl kʼɛlum Jan sobel ɛm.

25 Sica ów es atar ɛy Jan eci jam ɛsɛl bɛb lele Jwif nyam † Jwif nyam:Jan eci silɛl esig oglog ɛm ecʼa, Jwifɛl. ab ecʼaraŋn, ów eke wɛl bi kok Nyam ecʼany af sos ayal ecʼa sosiɛm. 26 -Nʼim -nʼɛŋn Jan ɛtŋ -nʼam dad ow -lʼɛsɛ: «Low yɛgm agŋ ɛs, Jurdɛn jam a ecʼɛgŋ a eke anŋ ŋ ab, ke ij in e daŋku a, kↄ am ↄkn in e low ee? Aŋ! Sicaca ɛm a, nʼam ok agŋ mij nuŋ ɛtŋ agŋ a fɛŋ bʼim am ɛknʼn!» 27 Jan dad ɛl ninɛ: «Ɛgŋ kaka kʼↄtum ɛŋnm low ecʼabusu eke Afr ↄↄmʼn. 28 Ɔtur eke ↄny obi yɛji kʼijr daŋku; mi dad mʼɛsɛ: “Mʼelm Mesi a, kↄ eke wɛl ikŋ anym ɛrmʼm cɛ.” 29 Mɛbi ɛs anake mɛbi lis bʼel in ecʼa; kↄ mɛbi ɛs e lawl a, mɛbi ɛs a e saw li bʼanŋ ke nʼám iri ow e low; ɛtŋ eke li bʼiri mɛbi ɛs a e lebl a, li bʼanŋ sos ɛm iŋn ɛm. Ɛm eci sos ɛm iŋn ab ana, ɛtŋ sicaca ɛm a, ow iy nɛny fɛŋ. 30 Ow it eke in ecʼany gbɛl a ám agb, ke ɛm ecʼa ís es.

31 Ɛgŋ ekʼel Afr ecʼa, anŋ fɛŋ eci nuŋ af; ɛgŋ ekʼel wus ecʼa el wus eci, ɛtŋ bi dad wus ecʼów. Ɛgŋ ekʼow Afr eci nin ɛm a, [anŋ fɛŋ eci nuŋ af;] † Jan eci silɛl esig oglog ɛm a, wɛl ɛ́ŋnm sodad ekʼanŋ ob na [...] ecʼaraŋn a. 32 li bʼij low eke lʼɛkn ke lʼiri a eci daŋku, kↄ ɛgŋ ɛ́gŋm in e daŋku ij a ebm. 33 Ɛgŋ eke bʼɛgŋ in e daŋku ij a eb a, am ɛgŋ eb eke Nyam el low nɛnyɛmbri nyam. 34 Ɛgŋ eke Nyam ɛrm a bi dad Nyam ecʼodad, aŋke Nyam bʼɛlu ɛgŋ a in ecʼAbŋ a nimum fɛŋ ɛm. 35 Nyam erur Iy a ɛtŋ nʼↄŋ ow abusu a fɛŋ. 36 Ɛgŋ yecʼeke ↄny ↄmn Iy ab ɛm a, ɛŋn sel ekʼↄnym uwr; ɛgŋ eke bi yayr Iy a kʼow ɛŋnm sel ikŋ na, ɛtŋ li bʼow nʼanŋ Nyam ecʼɛrm bebl a ecʼany af.»