16
Timote am ɛwl Pↄl lele Silas ab
1 Pↄl im ɛy Dɛrb ɛtŋ ɛmɛny im ɛy Lisr. † Bɛ̀bmn Ob Kok 14.8,21. Yogŋ, jam ɛs nyam anŋ eke wɛl bʼɛsŋ Timote; lis a Jwif ekʼin yɛji ↄny ↄmn; ɛs a gbɛ Grɛk. 2 Agŋ lisijimɛl a e kʼir Lisr lele Ikoniↄm baŋn ab a, bi dad Timote e lís ecʼów amamn nↄnↄ. 3 Pↄl erur eke kʼↄny ɛcmʼn ab; lʼoc ow ab nʼim ɛtŋ lʼubr ow likr es, Jwifɛl a ekʼanŋ yogŋ a eke -li bʼow -lʼɛc a sosiɛm, aŋke agŋ a fɛŋ uw any eke ɛs a Grɛk. † Eke Timote lis el Jwif a, wɛl bʼoc Timote yɛji Jwif. Gbɛkↄ gbuŋ ke Jwifɛl a ócʼr tasi ɛsɛ Jwif mamn af a, ow it ke lʼúbr likr es. Pↄl ↄŋ wɛl ubrʼr likr es yecʼɛtŋ ke lʼél Krist eci daŋku ij ɛs mamn Jwifɛl ab ɛm. 4 Ɛb a fɛŋ ɛm eke -nʼam ɛc a, -nʼam dad agŋ a ekʼↄny ↄmn a ów a fɛŋ eke ɛrm ɛsɛl a lele Jerusalɛm ecʼagŋ ekpekp ab ab dad ucu es a, ɛtŋ -nʼam ibrm eke wɛl kʼɛlum ów amua. † Ɛ̀kn Ob Kok 15.23-29. 5 Sinyamel a am ɛy lɛc ↄmn ɛm, ɛtŋ lɛgŋ liy nyam nyam fɛŋ agŋ am bobn.
Pↄl ɛrur mɛmn Troas
6 Abŋ Lala ɛ́gbm Pↄl lele Silas ab es eke -li ki dad Nyam ecʼodad a Azi ogog a; ow ↄŋ -lʼubr Friji lele Galasi ab eci wus ab af. 7 Eke -li titmn Misi wus af a, -nʼam bɛbm eke -li kʼim Bitini wus af, gbɛkↄ Jesu ecʼAbŋ a yɛbm ɛl. 8 Ow sosiɛm -lʼubr Misi ɛtŋ -nʼim Troas baŋn eci nanu a. 9 Ncok ɛm a, Pↄl ɛrur mɛmn: lʼɛkn Maseduan iy nyam ekʼinym es ke am ŋↄŋnʼn dad ɛsɛ: «Ɛ̀c Maseduan ke ów ɛlum ɛy abu!» 10 Kpɛkŋ eke mɛmn ɛrur na bʼoc es a, si bɛbm sos sʼus ejagb Maseduan im eci, † Akr lɛw na ɛm eke Luk am dad ɛsɛ “ɛy” a, ke ow am yɛgm eke yogŋ anake Pↄl ab -lʼokar af -nʼam kok juma a. aŋke sʼub nawrɛ eke Nyam ɛsŋ ɛy eke si kʼɛwl yogŋ ecʼagŋ a Amani Mamn a.
Filip ɛb ɛm, Lidi ub Ɛs Kↄtↄkↄ nawrɛ
11 Sʼeb mijɛtŋ Troas, sʼigb yogŋ kpɛkŋ kpɛkŋ toŋ sʼim sʼok Samotras lekr ɛm, ɛtŋ eke lɛgŋ ɛny a, sʼim sʼok Neapolis baŋn. 12 Sʼigb yogŋ sʼim Filip, Maseduan eci wus a eci ɛb gbɛl ekʼanŋ Rom ecʼes ɛw ɛm a. † Eke ɛb anŋ Rom ecʼes ɛw ɛm, ow el low mamn. Ɛb eyŋ a bʼɛŋn ów nↄnↄ ecʼabusu eke ɛb ɛjecʼa ↄ́tum ɛŋnm. Sʼanŋ ɛb ab ɛm si kok sɛgŋ wa cɛ. 13 Nɛnɛgŋ e lɛgŋ a, sʼok ↄkm baŋn a sʼim mij nɛny a; yogŋ si tutr eke si bʼow sʼɛŋn Jwifɛl ekʼanŋ Nyam ŋↄŋn ɛm usu nyam. † Filip yogŋ, Jwifɛl agŋ egŋ lɛw anm eke ow kʼↄŋ wɛl ↄny Nyam nuŋ igŋ usu tasi. Ow sosiɛm, Jwifɛl bʼɛŋanin gbeŋ, mij saw eke it ɛl eci sos ayal a ecʼów e kok eci. Ow kʼↄdm Rom ecʼes ɛwɛl a ↄↄm Jwifɛl a abusu eke kʼɛŋanin baŋn a. Mij ewl mij a ogŋ eke anŋ a lele baŋn ab ab a, ow ij kilo nyahan. Sʼok es yogŋ ɛtŋ ↄyↄw a ekʼas luku anŋ yogŋ a, si dad ɛl odad. 14 Ɔyↄw ab ɛm e nyam e nin el Lidi, Tiatir baŋn yↄwi eke bʼↄl sigbad ebl amamn ij ke bʼigŋ Nyam nuŋ. Nʼam iri ɛy ecʼodad a, ɛtŋ Nyam ↄŋʼn abŋ eke li kʼɛw Pↄl e sodad a ɛrm af. 15 Ow ↄŋ wɛl okʼr mij nuŋ, in lele in ecʼakŋ ab ab. † Bɛ̀bmn Ob Kok 16.33; 18.8. Lʼɛw ɛy abu li dad ninɛ: «Eke am ɛkan eke mʼub Ɛs Kↄtↄkↄ nawrɛ tasi, ke òwr anŋn ɛm ogŋ a.» Ɛtŋ lʼatrm ɛy sʼɛgŋ sʼeb.
Wɛl ok Pↄl lele Silas ab sobel ɛm Filip ɛb ɛm
16 Lɛgŋ nyam sʼaam Nyam ŋↄŋn ɛm, ɛtŋ adyↄwli nyam am ↄbr ɛy. In ɛm a, abŋ ŋuŋ nyam † Abŋ ŋuŋ a el lorŋn ecʼabŋ. Lorŋn na anake bʼↄsu nyàm nuŋ igŋ usu gbɛl nyam eke wɛl bʼɛsŋ Dɛlfi a. Agŋ nↄnↄ bʼim yogŋ ibrm sos. anŋ eke bʼↄŋʼn lʼɛkn efi e low ekʼam ow a li dad. Ów amua eke li bʼɛkn li dad a bʼↄŋ in ecʼes ɛwɛl a os nↄnↄ. 17 Ɛy lele Pↄl ab, nʼam us ɛy jam lʼɛlu lebl li dad lʼɛsɛ: «Agŋ amua, Afr Kpekpe e Nyam a e juma kok ɛsɛl! -Nʼam dad ↄny ejagb a eke bʼɛwl ɛgŋ sel ɛŋn ɛm a ecʼodad!» 18 Yↄwli a am kok ɛbɛn sɛgŋ nↄnↄ. Ow bʼafŋn es a, Pↄl ɛrm ebl toŋ batŋ ɛwl mɛny dad abŋ ŋuŋ a ninɛ: «Jesu Krist e nin ɛm, ɛ̀y ↄkm in ɛm!» Ɛtŋ wanci ab af cɛ abŋ a ɛy ↄkm yↄwli ab ɛm.
19 Eke adyↄwli a ecʼes ɛwɛl a am ɛkn eke -li kʼow -nʼɛŋnmn os ow ɛm ij a, -nʼↄny Pↄl lele Silas ab -lʼow ɛbɛrŋ ɛm es ɛwɛl ecʼany af. 20 -Lʼot wɛl -nʼim Rom e jɛj ok ɛsɛl ekʼanŋ yogŋ a ecʼany af, ɛtŋ -li dad ninɛ: «Agŋ amua am is odad ɛy ecʼɛb na ɛm; 21 ɛl Jwifɛl, ɛtŋ -nʼam yɛgm agŋ ɛb ir owr. Ɛy Rom eyŋ; ɛy ecʼol a ↄↄm abusu eke si kʼɛgŋ sʼeb oglog si kok ow e low.» † Rom ↄŋ Jwifɛl abusu eke kʼigŋ Nyam nuŋ ɛl ecʼelel eke -nʼam erur a, kↄ -lʼérurm eke wɛl ki dad agŋ ɛjeci Nyam odad. 22 Dedeku a yɛji ebl ɛrm ok Pↄl lele Silas ab af. Jɛj ok ɛsɛl a ↄŋ wɛl eb Pↄl lele Silas ab mob sos ɛtŋ ↄŋ abusu eke wɛl kʼↄr ɛl likŋni ɛm. † Agŋ a ekʼelm Rom eyŋ a, jɛj ok ɛsɛl a bʼↄŋ wɛl ↄr ɛl gbuŋ ke wɛl jɛ́j ɛl e lís e low ok. Agŋ ekʼel Rom eyŋ a, wɛl ɛdŋn eke wɛl ki kok ɛl ɛbɛn. Pↄl lele Silas ab a, Rom eyŋ; ow itm eke wɛl kʼↄr ɛl. 23 Ɛtŋ eke wɛl ↄr ɛl sɛnyn sɛnyn bake ow uwr a, wɛl ok ɛl sobel ɛm, ɛtŋ wɛl ↄŋ usu ↄsu ɛs eke kʼɛw ɛl nyamn af sɛnyn sɛnyn. 24 Eke nʼɛŋn abusu ikŋ na a, lʼot lʼok wɛl sobel ab ɛm ecʼakŋni nyam ekʼanŋ sobel a e nuŋ kↄkↄ a, ɛtŋ nʼawŋm wɛl akr ekŋ ekpr ab.
25 Ncok eci lɛgŋ uyu nuŋ ɛm a, Pↄl lele Silas ab am ŋↄŋn Nyam ɛgŋ ɛj kↄklmʼn ɛtŋ sobel ɛm ɛsɛl a am iri. 26 Kpru ɛm, wus umu tuↄtuↄ, ↄny sobel a mumu. Kpɛkŋ masany a fɛŋ fifig ok es ɛtŋ sobel ɛm ɛsɛl a eci ŋgbraka a fɛŋ mↄmu es. 27 Usu ↄsu ɛs a ufŋm es, eke li bʼɛkn eke sobel a eci masany a fifig a, lʼↄdu in e lab ler ɛm a lʼɛlu ↄkm eke li kʼibir in sosi, aŋke nʼam tutr eke sobel ɛm ɛsɛl a uru es im. † Ɛ̀kn Ob Kok 12.19 eci akr otar a. 28 Kↄ Pↄl barm in e lɛc fɛŋ ɛm ninɛ: «Kì kokr ŋ sosi low ŋuŋ! Ɛy fɛŋ sʼanŋ aŋa!»
29 Usu ↄsu ɛs a ibrm eke wɛl kʼigŋ al; lʼuru es lʼɛy akŋ a, sos ufŋ ɛm, erŋn ab, lʼok ↄwrↄkp wus Pↄl lele Silas ab ecʼany af. 30 Nʼↄŋ wɛl ok ↄkm ɛtŋ li dad wɛl ninɛ: «Agŋ ɛgbɛl, kↄ ayaf mi ki kokr ke mʼɛ́ŋn sel ee?» 31 -Li dad ow ninɛ: «Ùb Ɛs Kↄtↄkↄ Jesu nawrɛ ke ŋ lele ŋ ecʼakŋ ab ɛ́ŋan sel.» 32 Ɛtŋ -nʼam dad ow Ɛs Kↄtↄkↄ ecʼodad, in lele agŋ a fɛŋ ekʼanŋʼn akŋ ab ab. 33 Ncok a eci wanci ab af cɛ, usu ↄsu ɛs a ot ɛl ab im ɛtŋ yↄyↄg ɛl abi ɛnyɛmbri ab es. Kpɛkŋ in ecʼagŋ ab ab wɛl ok ɛl mij nuŋ. † Bɛ̀bmn Ob Kok 16.15; 18.8. 34 Lʼoc Pↄl lele Silas ab nʼim in ecʼakŋ a ɛtŋ nʼↄŋ wɛl ob ij. Ɛgŋ na lele in ecʼakŋ ab ab sos ɛm am iŋn aŋke -lʼub Nyam nawrɛ.
35 Eke lɛgŋ ɛny a, Rom e jɛj ok ɛsɛl a ɛrm agŋ ow dad usu ↄsu ɛs a ninɛ: «Ɛ̀lu agŋ a es.» 36 Usu ↄsu ɛs a ow dad Pↄl ninɛ: «Jɛj ok ɛsɛl a ↄŋ abusu eke wɛl kʼɛlu ↄny es. Ɔtur eke sica kʼokr ↄkm imn ɛrm es ɛy ɛm.» 37 Kↄ Pↄl dad agŋ a ninɛ: «Wɛl jɛjm ɛy e low okm, ɛtŋ -nʼↄŋ wɛl ↄr ɛy dedeku ecʼany af, ke ɛy Rom ecʼagŋ cɛ! Ɛtŋ -nʼↄny -lʼok ɛy sobel ɛm. Sica -nʼam erur eke -li kʼok ɛy ↄkm es lↄl ɛm ee? Sʼɛgŋm! -Lʼow ɛl obi -lʼok ɛy es!»
38 Agŋ a im ɛwl jɛj ok ɛsɛl a sodad a eke Pↄl dad a. Eke -lʼirir eke Pↄl lele Silas ab el Rom eyŋ tasi a, ɛrmni ɛdŋ ɛl es. 39 -Lʼow -lʼɛgŋ low ij -nʼↄŋ wɛl, ɛtŋ -nʼↄny -lʼok wɛl ↄkm sobel ab ɛm ɛtŋ -ni ŋↄŋn wɛl eke wɛl kʼok ↄkm baŋn a. 40 Eke Pↄl lele Silas ab ok ↄkm sobel ab ɛm a, -nʼim Lidi ogŋ a. Eke -lʼɛkan agŋ lisijimɛl a, ke -lʼatar wɛl sos es a, -nʼim.
†16:1 Bɛ̀bmn Ob Kok 14.8,21.
†16:3 Eke Timote lis el Jwif a, wɛl bʼoc Timote yɛji Jwif. Gbɛkↄ gbuŋ ke Jwifɛl a ócʼr tasi ɛsɛ Jwif mamn af a, ow it ke lʼúbr likr es. Pↄl ↄŋ wɛl ubrʼr likr es yecʼɛtŋ ke lʼél Krist eci daŋku ij ɛs mamn Jwifɛl ab ɛm.
†16:4 Ɛ̀kn Ob Kok 15.23-29.
†16:10 Akr lɛw na ɛm eke Luk am dad ɛsɛ “ɛy” a, ke ow am yɛgm eke yogŋ anake Pↄl ab -lʼokar af -nʼam kok juma a.
†16:12 Eke ɛb anŋ Rom ecʼes ɛw ɛm, ow el low mamn. Ɛb eyŋ a bʼɛŋn ów nↄnↄ ecʼabusu eke ɛb ɛjecʼa ↄ́tum ɛŋnm.
†16:13 Filip yogŋ, Jwifɛl agŋ egŋ lɛw anm eke ow kʼↄŋ wɛl ↄny Nyam nuŋ igŋ usu tasi. Ow sosiɛm, Jwifɛl bʼɛŋanin gbeŋ, mij saw eke it ɛl eci sos ayal a ecʼów e kok eci. Ow kʼↄdm Rom ecʼes ɛwɛl a ↄↄm Jwifɛl a abusu eke kʼɛŋanin baŋn a. Mij ewl mij a ogŋ eke anŋ a lele baŋn ab ab a, ow ij kilo nyahan.
†16:15 Bɛ̀bmn Ob Kok 16.33; 18.8.
†16:16 Abŋ ŋuŋ a el lorŋn ecʼabŋ. Lorŋn na anake bʼↄsu nyàm nuŋ igŋ usu gbɛl nyam eke wɛl bʼɛsŋ Dɛlfi a. Agŋ nↄnↄ bʼim yogŋ ibrm sos.
†16:21 Rom ↄŋ Jwifɛl abusu eke kʼigŋ Nyam nuŋ ɛl ecʼelel eke -nʼam erur a, kↄ -lʼérurm eke wɛl ki dad agŋ ɛjeci Nyam odad.
†16:22 Agŋ a ekʼelm Rom eyŋ a, jɛj ok ɛsɛl a bʼↄŋ wɛl ↄr ɛl gbuŋ ke wɛl jɛ́j ɛl e lís e low ok. Agŋ ekʼel Rom eyŋ a, wɛl ɛdŋn eke wɛl ki kok ɛl ɛbɛn. Pↄl lele Silas ab a, Rom eyŋ; ow itm eke wɛl kʼↄr ɛl.
†16:27 Ɛ̀kn Ob Kok 12.19 eci akr otar a.
†16:33 Bɛ̀bmn Ob Kok 16.15; 18.8.