1 Eke sɛgŋ bɛb ɛc a, nɛnɛgŋ nyam, Jesu lele in e jam ɛsɛl ab ab am ɛcr segb ↄgm eci. Jam ɛsɛl a namn am ↄny ɛtŋ am bubm egbey a ij. 2 Eke Farisiɛl bʼɛkn a, -li dad Jesu ninɛ: «Ìs any ɛkn, ŋ e jam ɛsɛl a am kok low eke ɛy ecʼol a ↄↄm abusu eke wɛl ki kok nɛnɛgŋ e lɛgŋ!» † Ekʼusu im ɛsɛl am ɛcr ↄgm nyam eci ɛtŋ namn am ↄny ɛl a, ol ↄŋ abusu eke -li kʼub egbey -lʼij (Ol Ɔkn 23.25-26). Kↄ nɛnɛgŋ e lɛgŋ gbɛ Jwifɛl eci low yɛgm ɛsɛl a ɛdŋn eke wɛl ki kok. Eke batŋ ub kↄkↄtu nyam, ke egb ub e juma anake am kok a, ɛtŋ juma kaka fɛŋ wɛl ɛdŋn ow e kok nɛnɛgŋ e lɛgŋ (Ɔkm Ok 34.21). 3 Jesu dad ɛl ninɛ: «Awlmn low a eke ɛb ebu David in obi in obi lele in ecʼagŋ ab ab kok lɛgŋ nyam eke namn am ↄny ɛl ab ee? 4 Lʼɛy Nyamel ɛm, ɛtŋ in ecʼagŋ ab ab -lʼij egb waw e futufutu a; ke -nʼↄnym ow ecʼij ecʼabusu kaka. Ɛy ecʼol a ↄŋ abusu eke egb waw ɛsɛl sↄny coco kʼij. † Ɛ̀kn 1 Samiɛl 21.2-7; Ob Ap 24.5-9. 5 Ɛtŋ ɛmɛny awlmn Mois ecʼol ab ɛm eke nɛnɛgŋ e lɛgŋ, egb waw ɛsɛl ekʼↄny juma Nyamel gbɛl ab ɛm a, ↄ́sum nɛnɛgŋ ecʼol a, ke ow élm ɛl ecʼów ↄbr ab ee? † Ɛ̀kn Awl 28.9-10. 6 Kↄ mʼam dad ↄny ekʼaŋa low nyam anŋ ekʼↄny any akm Nyamel gbɛl a! 7 Blel uwr Nyam Lɛl a e sodad amua ekʼam dad ɛsɛ: mi bʼerur ɛrm mamn owi mʼakm ndey ɛm e segb waw e nyandrɛ any tasi ana, † Ose 6.6. ke agŋ amua ekʼɛknm low a, blel ↄbmn ɛl low. 8 Tasi ɛm a, ɛgŋ ecʼIy anake el nɛnɛgŋ ecʼes ɛw ɛs a.»

9 Eke Jesu ŋgboŋ yogŋ im ɛy ɛl eci Nyam nuŋ igŋ usu a, 10 ɛgŋ nyam ekʼabu wɛw es anŋ yogŋ. Agŋ a ekʼanŋ yogŋ a erur eke kʼok Jesu ów af; ow sosiɛm -lʼibrm ow ninɛ: «Kↄ ɛy ecʼol a ↄŋ abusu eke wɛl kʼewlm ɛgŋ nɛnɛgŋ e lɛgŋ ee?» † Jwifɛl ecʼol a eke ok Mois ecʼab ɛm a ↄŋ abusu eke nɛnɛgŋ e lɛgŋ wɛl kʼɛlum ɛgŋ cɛ eke luw am ibi a abu. 11 Jesu dad ɛl ninɛ: «Ekʼↄny ɛm ecʼɛgŋ nyam ↄny licɛb nyam coco ɛtŋ licɛb a ɛy nↄmu croŋ ɛm nɛnɛgŋ e lɛgŋ a, li kʼow nʼiim nʼↄnym lʼocm ow es ee? 12 Ɛgŋ il an akm licɛb! Ow sosiɛm ɛy ecʼol a ↄŋ abusu eke wɛl ki kok low mamn ↄŋ ɛgŋ nɛnɛgŋ e lɛgŋ.» 13 Jesu dad ɛgŋ a ninɛ: «Ɛ̀gŋm abu es.» Lʼɛgŋm abu a es ɛtŋ ow ɛwl akpl ɛsɛ yecʼab af. 14 Ow ↄŋ Farisiɛl a ok ↄkm Nyam nuŋ igŋ usu a, -nʼim -nʼam as luku -lʼↄl elel eke -li kʼↄnyn Jesu bake -lʼibi ow.

15 Eke Jesu iri in e luw ecʼamani a, nʼŋgboŋ yogŋ ɛtŋ agŋ nↄnↄ am usʼr jam. Nʼam ewlm ↄ́lu a fɛŋ, 16 ɛtŋ nʼam ijl wɛl nɛny lʼɛwar eke wɛl kʼulamʼn es. 17 Li kok ɛbɛn yecʼɛtŋ ke kokoba ↄb ɛs Esayi eci sodad amua eke dad a íy nɛny:

22 Sica ɛmɛny wɛl oc any eflu nyam eke el ɛbrm yɛji, abŋ eŋuŋ ekʼanŋʼn ɛm a sosiɛm is Jesu. Jesu ewlm ɛgŋ a; ow ↄŋ nʼam dad ów ɛtŋ nʼam ɛkn es yɛji. 23 Agŋ a fɛŋ low iti any ɛtŋ am dad ɛsɛ: «Kↄ sↄŋ Jesu na David eci lilaw li kʼel ee?» 24 Eke Farisiɛl iri odad na a, -li dad ninɛ: «Ɛgŋ na am ogŋ abŋ eŋuŋ aŋke ɛl ecʼes ɛw ɛs Bɛlsebul anake am ↄŋʼn abusu a.»

25 Jesu uw ɛl e sow tutr ab any ɛtŋ dad ɛl ninɛ: «Es ɛw fɛŋ eke in ecʼagŋ a ubr ɛm a bʼuŋ. Ɛb fɛŋ, oglog akŋ fɛŋ ekʼin ecʼagŋ a ubr ɛm a, bʼuŋ. 26 Eke sica Satan am ogŋ abŋ ekʼel Satan eci, ke in sosi nʼam ogŋn ar a; kↄ in ecʼes ɛw a ↄtu eke kʼanŋ ee? 27 Am ubr eke mʼam ogŋ abŋ eŋuŋ Bɛlsebul ecʼabusu ɛm; ɛtŋ ↄny agŋiyɛl ecʼa eke bʼogŋ a, kↄ bwo bʼↄŋ ɛl abusu ee? Ɛl obi ɛl obi -nʼam yɛgm eke ↄnymn low ij! 28 Tasi ɛm a, Nyam ecʼAbŋ ɛm anake mʼam ogŋ abŋ eŋuŋ a; ow am yɛgm eke Nyam ecʼes ɛw a ow ↄny ecʼaraŋn ŋ̂. † Jesu fifn Satan ecʼes ɛw ab es. Ɛ̀kn Luk 10.18. 29 Eke wɛl erur eke kʼim ɛy lɛc ɛs nyam ecʼakŋ iyʼr mil a, ow it ke wɛl íkŋ anym ↄny awŋʼn gbuŋ ke wɛl ↄ́tu ɛy in ecʼakŋ ot in eci mob a fɛŋ.

30 Ɛgŋ ekʼanm ɛm ab a, el ɛm ecʼifnu, ɛtŋ ɛgŋ eke ɛ́luam im abu sʼasm Nyam ecʼey luku a, am ↄmun ɛl es. 31 Na sosiɛm a, mʼam dad ↄny: wɛl ↄtu eke kʼoc agŋ e sikpl owi lele wɛwr owi eke dad ab ab a ap ɛl; † Wɛwr owi eke dad a:odad na Grɛk ɛm a, wɛl ↄtu eke kʼitŋn ɛjecʼɛm dad ɛsɛ wɛwr owi eke wɛl dad ok Nyam af. gbɛkↄ ɛgŋ eke dad odad ŋuŋ ok Abŋ Lala af a, Nyam kʼow ocm apmʼn. 32 Ɛgŋ fɛŋ eke dad odad ŋuŋ ok ɛgŋ ecʼIy af a, Nyam bʼow oc apʼr; kↄ ɛgŋ yecʼeke dad odad ŋuŋ ok Abŋ Lala af a, ke ow él yɛfɛnyna, ke ow él efi, Nyam kʼow ocm apmʼn.»

33 «Kòkr likŋ akpl, in ecʼey a yɛji bʼow akpl; kòkr likŋ él likŋ ŋuŋ, in ecʼey a yɛji kʼow akplm, aŋke wɛl bʼuw likŋ fɛŋ any in ecʼey ↄsu ab ɛm. 34 Ɔny morŋn, ayaf ↄtur eke ki dadr ów amamn, ↄny ekʼeel agŋ eŋuŋ ab ee? Low yecʼa ekʼiy ɛrm ɛm gbↄŋ a anake nɛny bi dad ɛlu ↄkm a. 35 Ɛgŋ mamn, in ɛm ecʼów amamn eke bʼanŋ a anake li bʼoc lʼɛlu ↄkm a; ɛtŋ ɛgŋ ŋuŋ, in ɛm ecʼów eŋuŋ eke bʼanŋ a anake li bʼoc lʼɛlu ↄkm a. 36 Mʼam dad ↄny eke jɛj ok e lɛgŋ a, sodad eke agŋ dad ɛsɛ odad ↄfr ↄfr af a, -li bʼow -lʼawl; 37 aŋke ŋ ecʼodad ebl ɛm wɛl bʼow jɛj ŋ e low ok ɛgŋʼŋ low oglog ↄbʼŋ low.»

38 Ɛtŋ ol e low yɛgm ɛsɛl bɛb lele Farisiɛl bɛb ab am dad Jesu ɛsɛ: «Low yɛgm agŋ ɛs, sʼam erur eke kʼɛlu mɛny ɛwr nyam ↄkm yɛgm ɛy.» 39 Jesu dad ɛl ninɛ: «Yɛfɛnyna ecʼagŋ eŋuŋ amua ekʼijm nɛny nyam Nyam ecʼany af a, am ibrm mɛny ɛwr, † Ɛ̀kn 1 Korɛnt 1.22. kↄ wɛl kʼow kokm mɛny ɛwr kaka ↄↄm ɛl ekʼow elm kokoba ↄb ɛs Jonas ecʼa cɛ. 40 Tasi ɛm a ɛsɛ elel eke Jonas anŋ ↄcn gbɛl a lokm ij sɛgŋ nyahan ncok lele lɛgŋ owr ab a, ɛbɛn nyam coco ɛgŋ ecʼIy yɛji bʼow anŋ wus ɛm ij sɛgŋ nyahan ncok lele lɛgŋ owr ab. 41 Jɛj ok e lɛgŋ a, Ninif eyŋ bʼow igb yɛfɛnyna ecʼagŋ ecʼany af, ɛtŋ bʼow ↄb ɛl low, aŋke ɛl, eke -lʼirir Jonas eci Nyam odad a, -lʼitŋn ɛrm ɛm. Ɛtŋ kin ɛgŋ anŋ ekʼagb akm Jonas! 42 Jɛj ok e lɛgŋ a, Seba ecʼes ɛw lis a bʼow igb inym es yɛfɛnyna ecʼagŋ a ecʼany af, ɛtŋ bʼow ↄb ɛl low, aŋke nʼanŋ usu kpekpe lʼow yecʼɛtŋ ke lʼíri eke li kʼiri Salomↄ eci sɛwr e sodad a. † Ɛ̀kn 1 Ɛ́b Ebu 10.1-10. Ɛtŋ kin, ɛgŋ anŋ ekʼagb akm Salomↄ!»

43 «Ekʼabŋ ŋuŋ nyam anŋ ɛgŋ ɛm ɛy ↄkm a, li bʼanŋ usu wɛwɛ nʼam rereb usu a, nʼám ↄl usu eke li kʼir. Eke sica nʼɛ́ŋnm a, 44 ke nʼám dad in ɛm lʼɛsɛ: “Mʼow mʼɛwl mʼim mʼɛy ɛm ecʼakŋ a eke mʼanŋ mʼɛy ↄkm a.” Eke li bʼɛwl mɛny lʼow a, li bʼɛkn eke wɛl apl akŋ ab es ayl, wɛl nyinyimn ow akpl ɛtŋ ɛgŋ irm ɛm. 45 Sica li bʼɛwl nʼim lʼɛsŋ lawlɛl abŋ eŋuŋ lↄbŋ ekʼuŋ akmʼn, -li bʼokr af -lʼir yogŋ. Ow e jam a, abŋ amua bʼijr ɛgŋ na gbre akm krɛkrɛ ecʼa. Yɛfɛnyna ecʼagŋ eŋuŋ ecʼa yɛji, ɛbɛn ow bʼow el.»

46 Eke Jesu odad anŋ nɛnym am dad agŋ a, kpɛkŋ lis lele lisijimɛl ab ow inym es gbeŋ eke ki dadʼr odad. 47 Ɛgŋ nyam dad Jesu ninɛ: «Kin esŋ lele esŋ jimɛl ab ekʼow inym es gbeŋ. -Nʼam erur eke -li ki dadʼŋ odad.» 48 Jesu dad ɛgŋ a ninɛ: «Kↄ bwo el ɛm lis ee? Ɛtŋ kↄ bwo ɛl el ɛm lisijimɛl ee?» 49 Ɛtŋ nʼam ↄkŋ jam ɛsɛl a abu li dad lʼɛsɛ: «Kin ɛm lis lel ɛm lisijimɛl ab ekʼanŋ aŋa, 50 aŋke ɛgŋ kaka fɛŋ eke bi kok Ɛs ekʼanŋ afr ecʼerur a, el ɛm lisijim, ɛm lisijↄw lel ɛm lis ab.»