1 Abŋ Lala dad ɛrum mar ninɛ: sɛgŋ es abal el ɛm a, agŋ bɛb bʼow igŋ ɛl ecʼↄmn a ɛlu es, ke ús sow tutr yadŋ lele low yɛgm eke bʼanŋ abŋ eŋuŋ ɛm ow a jam. 2 Agŋ ɛnyɛmbri yony yony ɛsɛl lel ayadŋu ab bʼow irmn ɛl. Agŋ amua, el agŋ eke Nyam owi am dadm low kaka, ke ɛl e sow tutr a anŋ ɛsɛ ob eke wɛl oc lowi gbagba ɛwr mɛny af. † wɛl oc lowi gbagba ɛwr mɛny:el low ekʼanŋ wɛl bi kok lɛgŋ anym ɛm a ów eŋuŋ kok ɛsɛl lele madu e bʼuru es ab ab. Ob eke wɛl bʼoc lowi gbagba at a, el ob eke bʼitr, ob eke bʼuw. 3 Agŋ amua ɛl eci low yɛgm ab ɛm bʼow dad ekʼow itm ekʼagŋ kʼɛbirir, -li bʼow -lʼɛdŋn mob bɛb eke wɛl bʼij a. Kↄ Nyam kok ob ij amua yecʼɛtŋ ke agŋ a ekʼub nawrɛ, ke uw low nawrɛ any a, ↄ́ŋʼn bia ke íj. 4 Ob fɛŋ eke Nyam kok a akpl; † Bɛ̀bmn Nuŋ Ɔb 1.31. kaka anm ɛm eke wɛl kʼigŋ ɛlu es, gbɛkↄ bʼeb a kʼↄ́pim eke kʼɛlu Nyam bia, 5 aŋke Nyam odad lele Nyam ŋↄŋn ab bʼↄŋ ob fɛŋ el nimamn Nyam ecʼany af.

6 Eke bʼoc low yɛgm na ɛlu ↄkm agŋ lisijimɛl ɛm, bʼow el Jesu Krist e juma kok ɛs mamn, ɛtŋ bʼow yɛgm ekʼↄmn e sodad ebl a lele low yɛgm tasi a ekʼɛŋn Abŋ ɛm a, bʼiyrʼŋ lok. 7 Gbɛkↄ ìgŋ sawl odad eke low kaka anm ɛm ke ókrm af ↄmn ab a ɛ̀lu es, ke ↄ́tur sos akŋm Nyam ab ŋ ecʼɛb ir ɛm. 8 Sos ↄtur sos megl af ecʼa el low akplu, kↄ low tɛl ɛm cɛ. Kↄ Nyam ecʼakŋm ab a el low ekʼakpl low fɛŋ ɛm, aŋke ow bʼↄŋ ɛy sʼir ɛb Nyam ab yɛfɛnyna ɛm ɛtŋ ow bʼɛwar ɛy lɛgŋ anym ɛm ecʼɛb ir a. 9 Na el odad ebl tasi ekʼit eke agŋ fɛŋ kʼɛgŋ eb. 10 Tasi ɛm a, sʼam ij gbre si kok juma ɛtŋ sʼam atr sos es, aŋke sʼoc ɛy e low ↄmn sʼɛlu Nyam ekʼanŋ owr ke el agŋ fɛŋ e Sↄg Ɛs ab ɛm, ab brobro agŋ a ekʼub nawrɛ a. 11 Kin ów eke kí dad ke yɛ́gm agŋ.

12 Kì yɛb ɛgŋ kaka kʼiirʼŋ es aŋke el ŋgbafrɛli sosiɛm; kↄ èl agŋ ekʼub nawrɛ a e sɛwl: ŋ e sodad ebl ɛm, es an ɛm, erur ɛm, ↄmn ɛm lele ŋ e lala el tasi ɛm ab. 13 Gbuŋ ke mʼów a, àt any awl Nyam e Silɛl a dedeku ecʼany af, ↄm ɛl ów ke yɛ́gm ɛl low. 14 Kʼìjl Nyam ecʼob ap a ekʼↄny anŋʼŋ ɛm ab es, yecʼa ekʼɛŋn lɛgŋ a eke ŋ e Nyamel ab ɛm e kokoba ↄb ɛsɛl dad ow e low, ke agŋ ekpekp a atʼŋ abu nuŋ a. 15 Àt any kok ów amua fɛŋ, òcr ŋ sosi nimum ɛlu juma eke wɛl abulʼŋ ab ɛm, yecʼɛtŋ ke agŋ a fɛŋ ɛ́kn ŋ ecʼanym imn a. 16 Ɔ̀sur ŋ sosi lele ŋ e low yɛgm ab ab. Ìnym es kikri ow af. Tasi ɛm a, eke bi kok ɛbɛn, bʼow ebr ŋ sosi ɛlu es ɛtŋ bʼow eb agŋ a eke bʼiri ŋ e sodad a yɛji.