1 Agŋ lisijimɛl, mʼerur eke mi kʼↄkn ↄny low yecʼa eke ɛŋn ɛy lagŋɛl Mois e lɛgŋ ɛm a. Jru a ekʼanŋ afr ow a nyimn ɛl, † Jru:aŋa ow am ↄkn ɛy Ɔkm Ok e lɛl ab ɛm e jru a ekʼɛy am nyimn Israɛl eyŋ, ke anŋ ɛsɛ mregbn ekʼam iwr uyu im afr ab af e low. Ɛ̀kn Ɔkm Ok 13.21-22; 14.22-29. ɛtŋ -lʼubr okij ebl a, 2 ɛtŋ ow anŋ ɛsɛ mij nuŋ eke wɛl ok ɛl af, Mois e jam us eci. 3-4 Ɛl fɛŋ -lʼij ob nyam a ɛtŋ -lʼɛgŋ mar nyam a ekʼanŋ Nyam ɛm ow a. Tasi ɛm a, lob a ekʼanŋ Nyam ɛm ow am us ɛl jam ab ɛm -lʼɛgŋ mij ɛl fɛŋ, † lob a ekʼanŋ Nyam ɛm ow am us ɛl jam ab ɛm -lʼɛgŋ mij ɛl fɛŋ:aŋa Pↄl am ebr Jwifɛl e low yɛgm ɛsɛl esig a e low e dad ab ɛm. Low yɛgm ab ɛm -li dad eke lob a bʼɛwl Israɛl eyŋ usu fɛŋ loj ab ɛm. Lob na wɛl bʼawl in e low a Awl 20.8-11 ɛm. Ɛ̀kn Ɔkm Ok 16.4-35; Ol Ɔkn 8.3 ɛm yɛji. ɛtŋ lob a, in anake lʼel Krist a. 5 Gbɛkↄ ɛbɛn yɛji, ɛl ɛm ecʼagŋ nↄnↄ kokm Nyam ecʼerur, ɛtŋ ow sosiɛm -lʼuw loj ab ɛm. † Awl 14.16,23, 29-30.

6 Ów amua fɛŋ ɛy eke kʼel sɛwl ɛy eci, yecʼɛtŋ ke si kí kokm ów eŋuŋ eke bʼaw ɛy a ɛsɛ ɛy lagŋɛl ecʼab af. † Awl 11.4,34. 7 Kʼìgŋn sinyam yadŋ nuŋ, ɛsɛ elel ekʼɛl ɛm ecʼagŋ bɛb kok ab af. Kin yecʼeke Nyam Lɛl dad: Dedeku a nimum sig es ob ij lele mar ɛgŋ ab eci. Ɛtŋ ow e jam a, -lʼigb ɛl fɛŋ -nʼam gbɛgbl es.† Ɛ̀kn Ɔkm Ok 32.6. 8 Si kʼócr ɛy e sos a si kí kokr nfaci ij owi, ɛsɛ elel ekʼɛl ɛm ecʼagŋ bɛb kok, ke agŋ fandi likŋ lele nyahan ab uw lɛgŋ nyam coco ab af. 9 Si kʼɛ́bmn Krist, † Krist:1 Korɛnt e silɛl esig bɛb ɛm wɛl bʼɛŋn Ɛs Kↄtↄkↄ, Krist ecʼusu a. ɛsɛ elel ekʼɛl ɛm ecʼagŋ bɛb kok, ke morŋn gúgŋ ɛl -lʼuwr ab af. 10 Ow ecʼuwr ɛm a, mʼam dad mʼɛsɛ: si kʼɛ́nyn abr, ɛsɛ elel ekʼɛl ɛm ecʼagŋ bɛb kok, ke afr ɛrm ɛs a ekʼism luw ab a, ibi ɛl ab af.

11 Ów amua ɛŋn ɛy lagŋɛl, yecʼɛtŋ ke ow él sɛwl ɛy eci. Wɛl nↄn ɛw es ɛy ecʼɛwar eci, ɛy eke sʼanŋ sɛgŋ es abal el ɛm a. 12 Ow sosiɛm, ɛgŋ yeci ekʼam tutr eke nʼinym es kikri a, ɛ́w ɛrm ke li kʼɛ́ym wus. 13 Ɛbm ɛkn a fɛŋ eke ↄbar a el ow a eke bʼɛŋn agŋ fɛŋ a. Nyam el cɛcɛ ɛtŋ li kʼow li yɛbm eke wɛl kʼɛbm ↄny toŋ ow afŋ ↄny e lɛc ab es. Eke ɛbm ɛkn bʼow owr ↄny a, Nyam bʼow ↄŋ ↄny lɛc inymn es kikri ɛtŋ li bʼow nʼↄŋ ↄny sos dogŋn ecʼabusu.

14 Ow sosiɛm a, erur ɛm ecʼagŋ lawlɛl, àrur sinyam yadŋ e nuŋ igŋ owi ɛgbr es! 15 Mʼam dad ↄny odad ɛsɛ nuŋ ɛm es ok ɛsɛl af. Ɔny obi yɛji ↄnyn odad eke mʼam dad a igbal ogŋ ɛkan. 16 Ob ij lala ab ɛm, eke si bʼↄŋ Nyam bia mij kpↄk a e si bʼɛgŋ a ecʼa, ke ow elm af sʼokrm Krist eci mebl ab ab a ee? Kↄ futufutu a eke si bi cɛc sʼↄŋanin ob ij ɛm a, ↄ́nym okrm ɛy af Krist e sos megl ab ab ee? 17 Futufutu a, nyam coco. Ɛtŋ ɛy fɛŋ sʼokr af sʼel sos megl nyam coco, aŋke futufutu nyam coco a ɛy fɛŋ si bʼij.

18 Lɛ̀ɛr Israɛl eyŋ: ɛl a eke bʼij mindey eke wɛl bi wawr egb anŋ egb waw usu a, okr af Nyam ab. 19 Nɛnɛ a, bla lowi mʼam erur eke mi ki dad ee? Kↄ mindey eke wɛl bi wawr egb ↄŋ sinyam yadŋ a lele sinyam yadŋ a ɛl obi ab a el low tasi ee? 20 Njaŋ! Mʼerur cɛ eke mi ki dad eke segb waw amua, abŋ eŋuŋ a wɛl bi kok ↄŋ, kↄ ow elm ɛy e Nyam a. Ɛtŋ mʼerurm eke kʼokar af abŋ eŋuŋ ab ab. 21 Kʼↄtumn am ɛgŋn Ɛs Kↄtↄkↄ e mij kpↄk a, ke ám ɛgŋn abŋ eŋuŋ e mij kpↄk a yɛji. Kʼↄtumn am ijr Ɛs Kↄtↄkↄ ecʼob ij lala a, ke ám ijr abŋ eŋuŋ ecʼob a yɛji. † Nyam any uwm ɛsɛl a bi waw egb ↄŋ ɛl e sinyam yadŋ a ba ow bʼuwr a, ow ɛcm ɛl ab eke -li bʼij ob usu nyam ɛl fɛŋ. Ob ij a el ɛl e nyàm a e sos usr ecʼob ij. 22 Kↄ Ɛs Kↄtↄkↄ sʼam erur eke si kʼↄŋ nyamnɛyr ↄny ee? Kↄ sʼↄny lɛc sʼakmʼn ee?

23 Ɔny ɛm ecʼagŋ bɛb bi dad ɛsɛ: «Fɛŋ e kok ecʼabusu ɛru es.» Nawrɛ, gbɛkↄ ɛm, mʼam dad eke ow elm fɛŋ akplm ɛy eci. «Fɛŋ e kok ecʼabusu ɛru es.» Nawrɛ, kↄ ow elm fɛŋ ↄↄm Nyamel agbm ↄmn ɛm. 24 Ɛgŋ kaka kʼↄ́l in obi cɛ e low mamn es, kↄ ke lʼↄ́l agŋ ɛjecʼa nana ecʼes.

25 Ndey fɛŋ eke wɛl bʼↄl ij an ɛjɛm a, ìjr ɛrm es ɛy ɛm, ke ów awl kaka kʼánm ɛm. 26  Tasi ɛm a, ob a fɛŋ Ɛs Kↄtↄkↄ eci: wus lele ob fɛŋ ekʼanŋʼn ɛm ab ab.† Selu 24.1.

27 Kin low ɛbmn nyam: eke Nyam any uwm ɛs nyam ɛsŋ ↄny ob ij ɛm ɛtŋ ɛgŋn ebr imn a, ow akpl eke kʼijr ob a eke wɛl ↄŋ ↄny a ɛrm es ɛy ɛm, ke ów awl kʼánm ɛm. 28 Gbɛkↄ eke ɛgŋ nyam dad ↄny ninɛ: «Ndey a ekʼam ijr a sinyam yadŋ ecʼegb waw,» ow akpl eke kʼíjmn ɛgŋ a e dad ↄny odad a e sos keskes eke ow kʼɛwm lele in ecʼelel eke li bʼɛkan ów ab ab sosiɛm. 29 Eke batŋ fɛŋ akpl ↄny eci yɛji, ow ↄtu eke kʼákplm ɛgŋ a eci. Sica bla sosiɛm ɛgŋ ki yɛb ɛgŋ ɛjeci, in ecʼelel eke li bʼɛkan ów ab ɛm, jɛj in ecʼabusu a ekʼɛruʼr es a e low ok ee? 30 Eke lʼↄtu eke li kʼↄŋ Nyam bia ob a eke nʼam ij a eci, bla sosiɛm wɛl ki cacakʼr ob ij a sosiɛm ee? 31 Ow cɛ eke mi ki dad a: eke am ijr ob, am ɛgŋn mar ɛtŋ am kokr low fɛŋ yɛji, kòkr fɛŋ Nyam ecʼanygbɛl a eci. 32 Kʼɛ̀lul ɛgŋ kaka wus ↄny ecʼelel eke bi kokr ab ɛm: ke ow el Jwifɛl, ke ow el agŋ ekʼelm Jwifɛl, ke ow el Nyamel; kʼɛ̀lul ɛgŋ kaka wus. 33 Kòkr ɛsɛ ɛm af! Mi bi kok eke ɛm e low kok fɛŋ ɛm, ɛm e low kʼakpl agŋ a fɛŋ sos ɛm. Mʼↄ́lm ɛm obi e low mamn es, kↄ agŋ fɛŋ e low mamn mi bʼↄl es yecʼɛtŋ ke ɛl fɛŋ -nʼɛŋn sel.